Kenet 35 - Bibilia Buk na Ŋun nagon koti luŋu a

Köjinö ti Lewijin

¹ A MATAT kulyani ko Mose i piritön ti Moaba nagoŋ a ’dara nyona ko Yardene Yeriko yu adi,

² Saraki nutu ti Yisaraele anyen se ködyö tiŋdu Lewijin köjinö na si ’dari se a lomoriot kunu; a ta ködyö tiŋdi Lewijin piritön na lologga köjinö kune a yukisi ti toro ’bo kase.

³ A kine köjinö ködyö gwe a si ’daesi kase, ko ti teŋon kase, ko ti ŋo kase liŋ na gwon jörun.

⁴ A piritön ti köjinö nagoŋ ta mo titikin Lewijin a yukisi kine, ködyö yegaddi lokiliŋan aliŋ geleŋ suluja i ŋorom na köji kaŋo i lologga na lepeŋ.

⁵ A i kaŋo na köji a ta ködyö tembi lokiliŋan alipan murek a ti swöt lo ’yure, ko lokiliŋan alipan murek a ti swöt lo loki, ko lokiliŋan alipan murek a ti swöt lo tokotyaŋ, ko lokiliŋan alipan murek a ti swöt lo lobot, a nu köji ködyö gwe kiden; a ŋina ködyö gwe kase a piritön yukisi a ti köjinö kase.

⁶ A köjinö nagoŋ ta ködyö tikin Lewijin a rupisi kune ködyö gwe a köjinö buker nagoŋ ta ruköddu katatuak i wökön kata, a ta köti ködyö ’yalakiŋdye kunie köjinö merya iŋwan wot murek i se.

⁷ Kweja adi köjinö liŋ nagoŋ ta tin Lewijin kune ködyö gwe a merya iŋwan wot budök, ko piritön kase yukisi i pirit na geleŋ.

⁸ A ko gwe gwoso köjinö nagoŋ ta ködyö titikin na ’dumwe i ŋutu ti Yisaraele a lomoriot kase kunu, ta ködyö ’dumaddu jore i kötumitön temejik, ko ku ’dik i kötumitön na ’di’dik; kweja adi kötumitön liŋ gwoso i lomoriot kase ködyö tikiŋdya Lewijin kunie köjinö kase.

Köjinö rupisi

⁹ A MATAT kulyani ko Mose adi,

¹⁰ Taki ŋutu ti Yisaraele adi, Na lagaddi ta Yardene tojo ko jur lo Kanana nu,

¹¹ a ta ködyö wulökiŋdye ’borik köjinö nagoŋ a köjinö kasu rupisi, anyen katatuanit logon a bo-göddu ŋuto lo bubulö wökön lukata.

¹² A kine köjinö ködyö gwe kasu a rupisi i kulya ti karu tŋuto lo tatua lo, anyen katatuanit gwon ti tatua tojo ko lepeŋ a gwo ’dan i komor na momoret i ’duŋöki na putet.

¹³ A köjinö nagoŋ ta ködyö titin kine gwe a köjinö buker nagoŋ ta rupu kata.

¹⁴ A ta ködyö tiŋdi köjinö musala i na pele na Yardene, ko kunie köjinö musala i jur lo Kanana, a se ködyö gwe a köjinö rupisi.

¹⁵ A kine köjinö buker gwe a rupisi ti ŋutu ti Yisaraele, ko a ti lwaka, ko a ti ŋutu lo si ’da a lepelok kase kiden kulo, anyen ŋuto logon a boŋgöddu ŋuto i twan lo bögö wökön nyu.

¹⁶ Ama ko lu ŋuto a gwutöddu ŋuto kak ko wititöt a twane twan, a nye gwe a katatuanit; a katatuanit ködyö tatuani tatua.

¹⁷ A ko nye a gubara lepeŋ kak ko gurupit nagoŋ tatujaŋuto na, a ŋiloruto iŋge twan, a nye gwe a katatuanit; a katatuanit ködyö tatuani tatua.

¹⁸ Kode ko nye a gwutörö lepeŋ kak ko ködini logon tatatujaŋuto lo, a gijoŋuto iŋge twan, a nye gwe a katatuanit; a katatuanit ködyö tatuani tatua.

¹⁹ A karutyo karopanit lo rima ködyö tatuje katatuanit ko mugun nanyit; a na torumbe nye ko lepeŋ nu, a nye ködyö tatuje lepeŋ.

²⁰ A ko nye a rurujö lepeŋ ko töili loron, kode gumba nye i domba, a ŋiloruto iŋge twan,

²¹ kode nye a jokara lepeŋ kak ko könin lonyit ko tomirikulan, a nye iŋge twan, a ŋilo kajokanit ködyö tatuani tatua; lepeŋ a katatuanit; a karutyo karopanit lo rima ködyö tatuje ŋilo katatuanit, na torumbe nye ko lepeŋ nu.

²² Ama ko nye rurujö lepeŋ a lunya den ’bak tomirikulan, kode a gumba nye ko nene ŋo ’bak domba,

²³ kode ko ŋurupit logon tatatuja ŋuto, kode gumba lepeŋ nagoŋ nye a ko met lepeŋ nu, a ŋilo ŋuto iŋge twan, ma ’di nagoŋ nye ti gwon a miriku lonyit, a nye tine ga ’yu koŋdya lepeŋ arabat;

²⁴ nyena a momoret ködyö ’duŋge i kiden na katatuanit ko karutyo karo-panit lo rima, gwoso i kine ’duŋesi;

²⁵ a ŋina momoret ködyö lwökuŋdye ŋilo ŋuto kaŋo ko karutyo karopanit lo rima i könin, a nu momoret ködyö toyitöddi lepeŋ tojo i köji rupit nanyit na wöggiri lepeŋ kata nu, a nye ködyö si ’dani nyu tojo ko twan na koane duma logon a welaki welet nake na rurwan lo.

²⁶ Ama ko ködyö i nene diŋit ŋilo katatuanit mo tu kaŋo i koresi ti köji nagoŋ nye rupu kata na wöggiri nye nyin nu,

²⁷ a karutyo karopanit lo rima ko ryeji lepeŋ i kaŋo na koresi ti köji nagoŋ nye rupu kata nu, a ŋilo karutyo karopanit lo rima ko tatuje ŋilo katatuanit, a nye ködyö tine gwon ko toron na rima.

²⁸ Kogwon lu ŋuto ködyö si ’da i köji nagoŋ nye rupu kata nu tojo ko twan na koane duma; ama i mukök na twan na koane duma a ŋilo katatuanit bulöni bulö yitö i jur lonyit lomore.

Saret i kulya ti katökorok ko i kulya ti daket

²⁹ A kine kulya mo gwe a saret ’duŋet lo wuröki ta temba i nyakwariat kasu i piritön liŋ na si ’dari ta kune.

³⁰ Ko ŋuto lele a tatuja ŋuto, a katatuanit ködyö tatuani tatua ko katökorok a tökoŋu, ama ŋuto ködyö ti bulö tatua i tokoret na katokoronit geleŋ.

³¹ Ama köti ta ködyö ti wuju daket na dakari ru na katatuanit logon gwon ko toron i tatuja lo; ama nye ködyö tatatua.

³² a ta ködyö tine wuju daket i ŋuto logon a wökön i köji nagoŋ nye rupu kata nu, anyen nye jojo yitö i si ’da i jur a kokwe na twaji koane duma nu.

³³ A ta ködyö tine toluddya jur lo si ’dari ta lu, kogwon rima na toluddya jur, a jur tine bulö tokela kogwon rima nagoŋ a ’buköki lukata kune, ama tuŋ tokela ko rima ti ŋuto lo ’bukökiŋdyö se lu.

³⁴ Ta ködyö ti toluddya jur logon ta si ’da kata lu. logon nan si ’da i kiden nanyit lu; kogwon nan MATAT si ’da i kiden na ŋutu ti Yisaraele.