Kenet 32 - Bibilia Buk na Ŋun nagon koti luŋu a

Kötumit na Rubena ko na Gada ko swöt lo kötumit na Manase si ’da i swöt lo ’yure na Yardene

¹ A kötumit na Rubena ko na Gada gwe ko teŋon ti toro ’bo nagoŋ a lwöŋgu i tojore nase; a se ko meddi jur lo Yajer ko jur lo Gilada, a nu pirit metani a pirit nagoŋ jujukin toro ’bo.

² A kötumit na Gada ko na Rubena poŋdi po a takiŋdye Mose, ko koane Elejara, se ko temejik ti momoret adi,

³ Atarot, ko Dibon, ko Yajer, ko Nimera, ko Kesebon, ko Eleale, ko Sebam, ko Nebo, ko Beon,

⁴ jur liŋ logon MATAT a te i komor na momoret na ŋutu ti Yisaraele lu a jur lo jujukin toro ’bo; a yi kölipönök kulök kulo gwe ko toro ’bo;

⁵ a se kulyani adi, Koyi a ryeju ’busan konut i komor, ti lo jur tikine yi kölipönök kulök a lomore; an do ko tulapara yi i nu pele na Yardene.

⁶ A Mose kulyani ko kötumit na Gada se ko na Rubena adi, Luŋasirik kasu tu i ŋor a ta si ’dani ni le?

⁷ Nyö nagoŋ ta teŋgu töilyet ti ŋutu ti Yisaraele i laŋaddu i lu jur logon MATAT a tikin se lu?

⁸ Merenyejin kasu köju a koŋdya sona na soŋdi nan se Kadesa-barenea i wiŋa na lu jur nu.

⁹ Kogwon na tiri se tojo ko loro Esekola nu, a se meddi lu jur, a se teŋgi töilyet ti ŋutu ti Yisaraele i tu i jur logon MATAT a tin se lu.

¹⁰ A woran na MATAT iŋge tule i ŋilu lor, a nye milyeji adi,

¹¹ ’Diri gwak lele lo ŋutu logon a po kaŋo Ejipeto yu, suluja i se logon ko kiŋajin merya murek tojo ko ŋerot kulo ’bayin logon mo memet lu jur logon nan a milyekin Abarayama, ko Yisaka, ko Yakobo adi nan mo titin se, kogwon se a ko kipuŋdyö nan ko töilyet kase liŋ;

¹² ake Kaleba ŋuro lo Yepune Kinijityo ko Yosua ŋuro lo Nun lo meddya, kogwon se a kipuŋdyö nan MATAT ko töilyet kase liŋ.

¹³ A woran na MATAT iŋge rölökiŋdyö i ŋutu ti Yisaraele, a nye tiŋdi se i wiŋö i yöbu kiŋajin merya iŋwan, tojo ko toberon liŋ na ŋutu lo koŋdya toron ko MATAT i komor kilo a toliki.

¹⁴ Meddi ta, ta a ŋun i ruddya na merenyejin kasu a teŋ na katoronyak, i ’yalakiŋdya na woran na pape na MATAT i ŋutu ti Yisaraele köti!

¹⁵ Kogwon ko ta a wörigöddu kaŋo i kepöddu na lepeŋ, a nye mo kölökiŋdye se i yöbu; a ta mo tukaŋi kilo ŋutu liŋ.

¹⁶ A se miju ko lepeŋ nyona, a kulyani ko lepeŋ adi, Yi mo ’duggö ŋorwat ti yidin ni, ko köjinö si ’daesi ti lupudiet kaŋ,

¹⁷ a yi mo ’dumbe tito möriesi kaŋ ajo i tu ko ŋutu ti Yisaraele ŋerot, tojo koyi a jogga se kase i piritön; a lupudiet kaŋ mo si ’dani i piritön na ŋo na titiyu kogwon kulya ti ŋutu ti lo jur.

¹⁸ Yi mo ti yitwe kayaŋ i midijik tojo ko ŋutu ti Yisaraele liŋ geleŋ geleŋ a ruddya lomoriot kase.

¹⁹ Kogwon yi mo ti ruddya ko se i pirit na geleŋ i nu pele na Yardene ko i ŋerot nanyit; kogwon lomoriot kaŋ gwe a kayaŋ i na pele na Yardene i swöt lo ’yure.

²⁰ A Mose kulyani ko se adi, Ko ta mo a koŋdya sona, ko ta mo a ’dumba tito möriesi anyen tu ko MATAT i komor i ŋor,

²¹ a ko kamörök kasu liŋ mo a lagaddu Yardene ko MATAT i komor tojo nye a rikörö merok kanyit kaŋo kanyit i komor,

²² a lu jur iŋge tela ko MATAT i komor; nyena i mukök na ŋina a ta bulöni bulö yitwe bot, a ta mo gwe ’bak kulya i kine kulya ko MATAT ko i Yisaraele; a lo jur mo gwe a lomore losu ko MATAT i komor.

²³ Ama ko ta mo a ko koŋdya sona, meddi ta, ta aje toroŋdya MATAT; ko dene ta den ’bura adi toronjin kasu mo ryöun ta kaŋo.

²⁴ ’Duköki ta lupudiet kasu köjinö, ko ŋorwat a ti yidin kasu; ko koŋdi ta ŋo nagoŋ ta a jam ko kutusen kasu kine.

²⁵ A kötumit na Gada ko na Rubena waddi Mose adi, Yi kölipönök kulök mo kökon ŋo nagoŋ do a saŋi yi kune pon duma likaŋ.

²⁶ Lupudiet kaŋ, ko wate kaŋ, ko yidin kaŋ, ko toro ’bo kaŋ liŋ mo möŋdu yu i köjinö ti Gilada;

²⁷ ama yi kölipönök kulök, kweja adi kamörök liŋ logon a jupu tito möriesi mo lagaddu yu ko MATAT i komor i mörö, gwoso na saŋi do duma likaŋ nu.

²⁸ A Mose sarakiŋdye koane Elejara ko Yosua ŋuro lo Nun, ko kusik ti kötumitön ti merenyejin ti ŋutu ti Yisaraele i kulya kase,

²⁹ kulya ko se adi, Ko ködyö kötumitön ti Gada ko ti Rubena, kweja adi ŋutu kase liŋ logon a jupu a ti ŋor ko MATAT i komor kulo, ko ködyö se a lagaddu ko ta i nu pele na Yardene a lu jur mo telani tela kasu i komor, nyena a ta ködyö tiŋdi se lu jur lo Gilada a lose;

³⁰ ama ko se ködyö ti laggu ko ta i pirit na geleŋ a jupu tito möriesi, a se ködyö gwe ko lomoriot kasu kiden i jur lo Kanana.

³¹ A kötumit na Gada se ko kötumit na Rubena waddi adi, Yi mo koŋdya sona gwoso na kulyari MATAT koyi kölipönök kulök na.

³² Yi mo lagaddu tojo i jur lo Kanana a jupu tito möriesi ko MATAT i komor, a ŋo kaŋ lomoriot mo gwe kayaŋ i na pele na Yardene.

³³ A Mose tiŋdi lepeŋat tumatyan na Sikon mor lo ŋutu ti Amori, ko tumatyan na Oga mor lo Basan. A nye tiŋdi kötumit na Gada, ko na Rubena, ko swöt lo kötumit na Manase ŋuro lo Yosepa, lu jur ko köjinö kanyit ko lokökoritan kase, iŋkoi köjinö ti swötön liŋ ti lu jur.

³⁴ A kötumit na Gada ’duŋge Dibon, ko Atarot, ko Aroer,

³⁵ ko Atarot-sopan, ko Yajer, ko Yogabea,

³⁶ ko Bet-nimera, ko Bet-aran nagoŋ a köjinö na ŋo na titiyu, se ko ŋorwat ti yidin.

³⁷ a kötumit na Rubena ’duŋge Kesebon, ko Eleale, ko Kiryataim,

³⁸ ko Nebo, ko Bala-meon (a karin kase iŋge lölöpukö), ko Sibema; a se gwije köjinö na ’duk se kune ko kunie karin.

³⁹ A ŋwajik ti Makir ŋuro lo Manase iti Gilada a morgi lepeŋ, a riköddi ŋutu ti Amori logon si ’da nyu kulu.

⁴⁰ a Mose tiŋdi Gilada ko Makir ŋuro lo Manase i könin, a nye si ’dani nyu.

⁴¹ a Yair ŋuro lo Manase iti i morga na turön kase, a gwije se a Kawotyair.

⁴² a Nobak iti i morga na Kenat ko turön kanyit, a gwije nye a Nobak i karin kanyit.