Kenet 3 - Bibilia Buk na Ŋun nagon koti luŋu a

Kenet na Lewijin ko kitajin kase

¹ A kilo gwe a nyakwariat ti Arona se ko Mose i diŋit nagon MATAT jambi ko Mose i mere Sinai yu nu.

² A kine gwe a karin ti ŋwajik ti Arona; Nadaba logon a kayu, a gwe a Abiu, ko Elejara, ko Itamar;

³ kine a karin ti ŋwajik ti Arona logon a koanejin lo welaki, logon nye a ’börökiŋdya anyen kita a koanejin kulo.

⁴ Ama Nadaba ko Abiu a twatwa ko MATAT i komor na wukiŋdye se kimaŋ na gwon ka ’de ko MATAT i komor nu, i yöbu na Sinai yu; a se gwe ’bak ŋwajik. A Elejara ko Itamar kitani a koanejin ko Arona monye lose i komor.

⁵ A MATAT jambi ko Mose adi,

⁶ Tomiju kötumit na Lewi nyona, ko ti lepeŋat gwo ’de ko koane Arona i komor anyen se böŋö kitakiŋdya lepeŋ.

⁷ A se ködyö parakiŋdye lepeŋ se ko momoret na ŋutu liŋ i komor na kemia torumet, i koŋdya na kita na ŋinu kemia;

⁸ a se tiji tito liŋ ti kemia torumet, a se ködyö parakiŋdye ŋutu ti Yisaraele a koŋdi kitajin ti nu kemia.

⁹ A do ködyö geluŋdye Lewijin a ti Arona ko ŋwajik kanyit, se a tiki lepeŋ asut i kiden na ŋutu ti Yisaraele.

¹⁰ A do ködyö wuluŋdye Arona se ko ŋwajik kanyit anyen kita a koanejin; ama ko ŋuto logon ’bayin a koane a mijun nyona i koŋdya na ŋina kita, a nye ködyö tatuani tatua.

¹¹ A MATAT jambi ko Mose adi,

¹² Mete, nan aje ’dumaddu Lewijin i kiden na ŋutu ti Yisaraele i pirit na kayujin liŋ logon ŋaju pelela kilo i kiden na ŋutu ti Yisaraele. A Lewijin mo gwe a ŋutu kwe,

¹³ kogwon i ŋilu lor lo tatuje nan kayujin liŋ ti jur lo Ejipeto nu, a nan joŋgi kayujin liŋ a go kwe; kweja adi nan a gelakiŋdya mugun kayujin liŋ ti Yisaraele kode a ti ŋutu kode a ti toro ’bo; a se gwe a go kwe; nan logon a MATAT.

¹⁴ A MATAT jambi ko Mose i yöbu na Sinai yu adi,

¹⁵ Keŋdi nyakwariat ti Lewi gwoso i kötumitön ti merenyejin kase ko gwoso i midijik kase; do ködyö keŋdya lyan liŋ suluja i se logon ko yapa geleŋ tojo ko ŋerot.

¹⁶ Nyena a Mose keŋdi lepeŋat gwoso nagon MATAT a sarakiŋdye lepeŋ nu.

¹⁷ A kilo gwe a ŋwajik ti Lewi ko karin kase logon a ko Gereson, ko Kowat, se ko Merari.

¹⁸ A kine gwe a karin ti ŋwajik ti Gereson gwoso i midijik kase, logon a ko Libeni ko Simei.

¹⁹ A ŋwajik ti Kowat gwoso i midijik kase gwe a ko Ameram, ko Yisar, ko Keberon, se ko Ujiele.

²⁰ A ŋwajik ti Merari gwoso i midijik kase gwe a ko Makeli ko Musi. Kine a midijik ti Lewijin gwoso i kötumitön ti merenyejin kase.

²¹ A mede na ŋutu ti Libeni se ko mede na ŋutu ti Simei gwe a ti Gereson; kine a midijik ti ŋutu ti Gereson.

²² A kenet nase gwe a ŋutu alipan buryo ko miajin mukanat, gwoso i kenet na lyan liŋ suluja i se logon ko yapa geleŋ tojo ko ŋerot.

²³ A midijik ti ŋutu ti Gereson ködyö ’beggi kemialan kase i ki ’diŋ na nu kemia i swöt lo tokotyaŋ.

²⁴ A matat lo kötumit na merenyejin ti ŋutu ti Gereson gwe a Elayasap ŋuro lo Laele.

²⁵ a kita nagon a saraki ŋutu ti Gereson i tiju i kemia torumet na gwe a kemia, ko boŋgwat kanyit, ko mukesi ti ŋinu kemia, ko boŋgo muket na kötumit na kemia torumet,

²⁶ ko boŋgwat na leleyo a mariŋ, ko boŋgo muket na kötumit na nu mariŋ na lorga nu kemia se ko pirit ’yuret na rubaŋgajin, se ko patala kanyit; kweja adi kita na kine go liŋ.

²⁷ A mede na ŋutu ti Ameram, ko mede na ŋutu ti Yisar, ko mede na ŋutu ti Keberon, se ko mede na ŋutu ti Ujiele gwe a ti Kowat; iŋkoi kine a midijik ti ŋutu ti Kowat.

²⁸ A kenet na lyan liŋ suluja i se logon ko yapa geleŋ tojo ko ŋerot gwe a ŋutu alipan budök ko miajin buker lo tiju nu pirit nake na rurwan.

²⁹ A midijik ti ŋutu ti Kowat ködyö ’beggi kemialan kase i swöt lo loki lo nu kemia.

³⁰ A matat lo kötumit na merenyejin ti midijik ti ŋutu ti Kowat gwe a Elisapana ŋuro lo Ujiele.

³¹ A kita nagon a saraki lepeŋat i tiju na gwe a saŋduk, ko misa, ko gwo ’diet lo lombojin, ko piritön ’yuresi, ko tito ti nu pirit nake na rurwan nagon koanejin kita kata nu, ko boŋgo koret; kweja adi kita na kine go liŋ.

³² A Elejara ŋuro lo koane Arona ködyö gwe a duma lo ŋutu temejik ti Lewijin ko i gwon a kametanit lo katiyuk ti nu pirit nake na rurwan.

³³ A mede na ŋutu ti Makeli, ko mede na ŋutu ti Musi gwe a ti Merari; iŋkoi kine a midijik ti Merari.

³⁴ A kenet na lyan liŋ suluja i se logon ko yapa geleŋ tojo ko ŋerot gwe a ŋutu alipan buker ko miajin murek.

³⁵ A matat lo kötumit na merenyejin ti midijik ti Merari gwe a Suriele ŋuro lo Abikayile. A se ködyö ’beggi kemialan kase i swöt lo lobot lo nu kemia.

³⁶ a kita nagon a saraki ŋutu ti Merari i tiju na gwe a baulan ti kemia, ko turya görösi, ko togwi ’diesi, ko gwo ’diesi, se ko go kase liŋ; kweja adi kita na kine ŋo liŋ.

³⁷ Köti a se ködyö tiji togwi ’diesi ti nu mariŋ na logga kemia, ko gwo ’diesi kase, ko kaleto kase, se ko patala kase.

³⁸ A ŋutu logon ködyö ’beggu kemialan kase i komor na nu kemia torumet i swöt lo ’yure lo nyeruŋdye kolor kulo gwe a Mose, ko Arona se ko ŋwajik kanyit logon tiju nu pirit nake na rurwan a na ŋutu ti Yisaraele; a koŋuto logon ’bayin a lele lose a mijun nyona, a nye ködyö tatuani tatua.

³⁹ A kenet na Lewijin liŋ, kweja adi lyan liŋ suluja i se logon ko yapa geleŋ tojo ko ŋerot gwe a ŋutu alipan merya murek wot murek. Mose ko Arona lo keŋdya kilo ŋutu a midijik midijik gwoso na saŋi MATAT nu.

Lewijin a wulwe i pirit na kayujin, a pitönö ti kayujin iŋge dakwe

⁴⁰ A MATAT jambi ko Mose adi, Keŋdi kayujin lyan liŋ ti ŋutu ti Yisaraele, suluja i se logon ko yapa geleŋ tojo ko ŋerot gwoso i kenet na karin kase.

⁴¹ A do ködyö joŋgi Lewijin a ŋutu kwe i pirit na kayujin liŋ ti ŋutu ti Yisaraele—nan logon a MATAT— a do köti ködyö joŋgi toro ’bo ti Lewijin i pirit na kayujin liŋ ti toro ’bo ti ŋutu ti Yisaraele.

⁴² Nyena a Mose keŋdi kayujin liŋ ti ŋutu ti Yisaraele, gwoso na sarakiŋdye MATAT nye nu.

⁴³ a kayujin lyan liŋ gwoso i kenet na karin kase, suluja i se logon ko yapa geleŋ tojo ko ŋerot, se logon a kena kulo gwe a alipan merya murek wot murek ko miajin murek ko merya buryo wot musala.

⁴⁴ A MATAT jambi ko Mose adi,

⁴⁵ Joŋgi Lewijin i pirit na kayujin liŋ ti ŋutu ti Yisaraele, ko toro ’bo ti Lewijin i pirit na toro ’bo kase; a Lewijin ködyö gwe a ŋutu kwe: nan logon a MATAT.

⁴⁶ a kayujin miajin murek ko merya buryo wot musala ti ŋutu ti Yisaraele iŋge lwöŋ kenet na Lewijin, a pitönö kulo ködyö dakwene dakwe;

⁴⁷ a do ködyö ’dumuŋdye sekelejin mukanat i kilo ŋutu geleŋ geleŋ; a do ködyö joŋgi se ko temet na sekele na pirit nake na rurwan (sekele geleŋ a gerajin merya murek),

⁴⁸ a do tiŋdi Arona ko ŋwajik kanyit gurut dakesi ti kilo logon a lwöŋgu.

⁴⁹ Nyena a Mose ’dumuŋdye ’gurut dakesi i se lo lwöŋgu ŋutu logon Lewijin a dakun kulo;

⁵⁰ kweja adi nye a ’dumu ŋdya gurut gwoso sekelejin aliŋ geleŋ ko miajin musala ko merya buker wot mukanat, gwoso i temet na sekele na pirit nake na ruwan i kayujin ti ŋutu ti Yisaraele;

⁵¹ a Mose tikiŋdye Arona ko ŋwajik kanyit kine gurut dakesi, gwoso na kulyari MATAT na, iŋkoi gwoso na saŋi MATAT Mose nu.