Kenet 28 - Bibilia Buk na Ŋun nagon koti luŋu a

Rubaŋgajin lo wuki temba i lor

¹ A MATAT kulyani ko Mose adi,

² Saŋi ŋutu ti Yisaraele ko taki lepeŋat adi, Meddi ta ’bura i wukiŋdya na nan rubaŋga lo wuki nan, ko kinyojin kwe lo ’yu ’yura anyen mŋun paleleŋ köyö ni i diŋitan kase.

³ A do ködyö takiŋdye lepeŋat adi, Lo a rubaŋga lo ’yu ’yura ’buluŋ logon ta ködyö wukin MATAT temba i lor a rubaŋga lo yeŋon kona, kweja adi yisi mönikön murek logon ko kiŋa geleŋ logon ’bak yuyukesi.

⁴ A ta ködyö wukiŋdye lele kilolor temba i ko ’bure ko lele temba i sömukö;

⁵ köti ko swöt topuökit na wuyit nagoŋ a epa na ’bolot na jiö a naliliŋök a ’doket na ’bolot, nagoŋ a ŋola ko swöt geleŋ na iŋwan na temet nagoŋ a yin na welet na jujukö.

⁶ A nye gwe a rubaŋga lo ’yu ’yura ’buluŋ lo yeŋon kona, logon a saraki i mere Sinai anyen möara paleleŋ, ŋilo a rubaŋga lo ’yuraki MATAT.

⁷ A rubaŋga ’bu ’buket logon wuki ko lepeŋ i pirit na geleŋ ködyö gwe a swöt geleŋ na iŋwan na temet nagoŋ a yin i yisi liŋ geleŋ geleŋ; a ta ködyö ’bukökiŋdye MATAT rubaŋga lo yawa napötwör i pirit nake na rurwan.

⁸ A ta ködyö wukiŋdye lele kilolor i sömukö mora ko ’doket na ’bolot se ko rubaŋga ’bu ’buket gwoso lo kona i ko ’bure lu; a ta ’yuŋe lepeŋ anyen möara paleleŋ ko MATAT yu.

Rubaŋgajin lo wuki i sabata ko lo wuki temba i yapa

⁹ Rubaŋga lo wuki i lor lo sabata gwon a yisi mönikön logon ko kiŋa geleŋ logon ’bak yuyukesi, mora ko swöt topuökisi murek ti epa na ’bolot na jiö a naliliŋök a ’doket a ’bolot, nagoŋ a ŋola ko welet, se ko rubaŋga ’bu ’buket logon wuki ko lepeŋ i pirit na geleŋ.

¹⁰ Ŋio a rubaŋga lo ’yu ’yura ’buluŋ temba i sabatajin liŋ, mora ko rubaŋga lo ’yu ’yura ’buluŋ lo yeŋon kona se ko rubaŋga ’bu ’buket logon wuki ko lepeŋ i pirit na geleŋ.

¹¹ A i suluesi ti yapala kasu a ta ködyö wukiŋdye MATAT rubaŋga lo ’yu ’yura ’buluŋ logon a dwönin lo ’di ’dik murek, ko lopijot geleŋ, ko yisi mönikön buryo logon ko kiŋa geleŋ, logon ’bak yuyukesi;

¹² koti swöt topuökisi musala ti epa na ’bolot na jiö a naliliŋök a ti ’doket na ’bolot, nagoŋ a ŋola ko welet, a ti dwönin liŋ geleŋ geleŋ; ko swöt topuökisi murek ti ’bolot na jiö a naliliŋök a ti ’doket na ’bolot, nagoŋ a ŋola ko welet, a ti lopijot;

¹³ ko swöt topuökit na ’bolot na jiö a naliliŋök nagoŋ a ŋola ko welet, a na ’doket na ’bolot na yisi liŋ geleŋ geleŋ. A kine gwe a ti rubaŋga lo ’yu ’yura ’buluŋ lo mon paleleŋ, logon ’yuraki MATAT.

¹⁴ A rubaŋgajin ’bu ’bukesi logon wuki ko lepeŋat i pirit na geleŋ kulo ködyö gwe a swöt lo temet nagoŋ a yin na binyo a ti dwöt, ko a swöt geleŋ na musala na yin na binyo a ti lopijot, ko a swöt na iŋwan na yin na binyo a ti kilolor; ŋilo a rubaŋga lo ’yu ’yura ’buluŋ logon a lo yapala liŋ geleŋ geleŋ temba i yapala ti kiŋa.

¹⁵ Ko köti meetyo mönik a lo rubaŋga lo toron logon wuki MATAT; a nye ködyö wukine mora ko rubaŋga lo ’yu ’yura ’buluŋ lo yeŋon kona se ko rubaŋga ’bu ’buket logon wuki ko lepeŋ i pirit na geleŋ lo.

Rubaŋgajin lo wuki i roriot lo wulwe

¹⁶ A Pasaka lo MATAT konani i perok puök wot iŋwan ti yapa togeleŋ.

¹⁷ A rorwe konani i perok puök wot mukanat ti lo yapa; a ambata nagoŋ ’bak kape ködyö nyeni ko perok buryo.

¹⁸ A pepenet loke gwe i lor lo kokwe; a ta ködyö tine koŋdya kita na ŋo,

¹⁹ ama a ta ’yurakiŋdye MATAT rubaŋga lo ’yu ’yura ’buluŋ, logon a dwönin lo ’di’dik murek, ko lopijot geleŋ, ko yisi mönikön buryo logon ko kiŋa geleŋ logon ta a met adi se ’bak yuyukesi.

²⁰ A ta ködyö wukiŋdye ’dokesi ti ’bolot na jiö a naliliŋök a ŋola ko welet i pirit na geleŋ ko lepeŋat, nagoŋ a swöt topuökisi musala ti epa a ti dwöt geleŋ, ko swöt topuökisi murek ti epa a na lopijot,

²¹ a ta ködyö wukiŋdye swöt topuökit geleŋ na epa a na yisi buryo liŋ geleŋ geleŋ;

²² ko köti meetyo geleŋ a lo rubaŋga lo toron, anyen tokelarikin ta.

²³ A ta wukiŋdye kine ŋo mora ko rubaŋga lo ’yu ’yura ’buluŋ, logon yeŋon ’yura lo i ko ’bure.

²⁴ A ta ködyö wukiŋdye temba i lor kinyo lo ’yu ’yura gwoso ŋina ko perok buryo anyen möara paleleŋ ko MATAT yu; a nye wukine mora ko rubaŋga lo ’yu ’yura ’buluŋ lo yeŋon kona, se ko rubaŋga ’bu ’buket logon wuki ko lepeŋ i pirit na geleŋ.

²⁵ A i lor toburyo lonyit a ta ködyö gwe ko pepenet loke, a ta ködyö tine koŋdya kita na ŋo.

²⁶ A ta ködyö gwe ko pepenet loke i lor lo kinyojin waŋesi ti kokwe, na wukiŋdye ta MATAT ’doket na ’bolot ludukö i rorwe losu lo jimalan nu; a ta tine koŋdya kita na ŋo,

²⁷ ama a ta ködyö wukiŋdye rubaŋga lo ’yu ’yura ’buluŋ anyen möara paleleŋ ko MATAT yu, logon a dwönin lo ’di ’dik murek, ko lopijot geleŋ, ko yisi buryo logon ko kiŋa geleŋ;

²⁸ köti ko ’dokesi ti ’bolot na jiö a naliliŋök a ŋola ko welet, nagoŋ wuki ko lepeŋat i pirit na geleŋ kune. Swöt topuökisi musala ti epa a na dwönin liŋ geleŋ geleŋ, ko swöt topuökisi murek ti epa a na lopijot geleŋ,

²⁹ ko swöt topuökit geleŋ na epa a na yisi buryo liŋ geleŋ geleŋ;

³⁰ se ko meetyo mönik geleŋ anyen tokelari ta.

³¹ A ta ködyö wukiŋdye se ko rubaŋgajin ’bu ’bukesi logon wuki ko lepeŋat i pirit na geleŋ kulo, logon ta a met adi se ’bak yuyukesi, mora ko rubaŋga lo ’yu ’yura ’buluŋ lo yeŋon kona se ko ’doket na ’bolot nagoŋ wuki ko lepeŋ i pirit na geleŋ na.