Kenet 27 - Bibilia Buk na Ŋun nagon koti luŋu a

Ŋwajik wate ti Selopekada a piyuŋdya kak lomore nase

¹ A ŋwajik wate ti Selopekada miju nyona. Selopekada a ŋuro lo Keper, ŋuro lo Gilada, ŋuro lo Makir, ŋuro lo Manase, i midijik ti Manase ŋuro lo Yosepa. A karin ti ŋwajik kanyit nawate gwe a ko Makela, ko Noa, ko Ogela, ko Mileka, se ko Tiresa.

² A se gwo ’de ki ko Mose i komor, ko koane Elejara i komor, ko i komor na ŋutu lokukwön se ko na momoret liŋ, i kötumit na kemia torumet, a kulyani adi,

³ Monye likaŋ a twakin i yöbu; a nye gwe ’bayin i kiden na pepenet na ŋutu lo pepenakiŋdya ’börik ko Korak kase kiden i rerenya ko MATAT kulu, ama nye aje twan kogwon toron nanyit; a nye gwe ’bak ŋuro lulalet.

⁴ Nyö nagoŋ karin ti monye likaŋ joŋa kaŋo kanyit i kötumit, kogwon nye ’bak ŋuro lulalet na le? Tiŋdi yi pirit lomore nikaŋ i kiden na luŋasirik ti monye likaŋ.

⁵ A Mose joŋgi putet lose ko MATAT i komor.

⁶ A MATAT kulyani ko Mose adi,

⁷ Ŋwajik ti Selopekada a pija ’bura; do ködyö tiŋdu se i ’debba na lomore i kiden na luŋasirik ti monye lose, a do nyökökiŋdye lepeŋat lomore na monye lose.

⁸ A do ködyö takiŋdye ŋutu ti Yisaraele adi, Ko ŋuto a twan, a nye gwe ’bak ŋuro lulalet, a do ködyö nyökökiŋdye ŋuro nanyit nanakwan lomore nanyit.

⁹ A ko nye ’bak ŋuro nanakwan, a do ködyö tiŋdi luŋasirik kanyit lomore nanyit.

¹⁰ A ko nye ’bak luŋasirik, a do ködyö tiŋdi luŋasirik ti monye lonyit lomore nanyit.

¹¹ A ko monye lonyit ’bak luŋasirik, a do ködyö tiŋdi meetyo lonyit lomore nanyit, a nye ’debbi lepeŋ. A ŋilo gwe a saret lo wurö ko a jujuwet nagoŋ a saraki ŋutu ti Yisaraele, gwoso na saŋi MATAT Mose nu.

Mose a wuluŋdyö Yosua anyen ruddya pirit nanyit

¹² A MATAT kulyani ko Mose adi, Kije ki i lu mere Abarim, ko meddi jur logon nan a tikin ŋutu ti Yisaraele lu.

¹³ A nagoŋ do aje met nye nu, a do köti mo nukakine ko merenyejin kulök i merete, gwoso na nukaki ’e Arona luŋaser ilot nu;

¹⁴ kogwon ta aje renya kulyaet liŋ i yöbu na Sin i diŋit na woggi momoret nu, adi ta ködyö a geluŋdya nan a loke kase i konyen. (Kine a pioŋ ti Meriba na Kadesa i yöbu na Sin)

¹⁵ A Mose kulyani ko MATAT adi,

¹⁶ Ti MATAT logon a ŋun lo ködu dwölön ti ŋutu liŋ lo ti nye wuluŋdye lele ŋuto a kwe na momoret,

¹⁷ logon mo tu kaŋo kase ŋerot a mo lubbe lukata kase ŋerot, logon mo nyömöddu se kaŋo a mo tolupödöi se lukata; an momoret na MATAT ko gwon gwoso köbilu nagoŋ ’bak kayukunit.

¹⁸ A MATAT kulyani ko Mose adi, Joŋgi Yosua ŋuro lo Nun, lepeŋ aŋuto logon ko Mulökötyo lo ’but, ko sopakiŋdye könisi kulök kanyit loki;

¹⁹ ko togwi ’dikiŋdye lepeŋ ko koane Elejara i komor se ko i komor na na momoret liŋ, a do sarakiŋdye lepeŋ a se memeddya.

²⁰ A do tikiŋdye lepeŋ kido inot, anyen momoret liŋ na ŋutu ti Yisaraele ködyö twötwö nye.

²¹ A nye mo gwo ’de ko koane Elejara i komor, a koane mo galakiŋdye nye kulya kanyit ko MATAT i komor gwoso i ’duget na Urim; a ko lepeŋ a kulya adi, Iti ta, a se ködyö iti kaŋo, a ko lepeŋ a kulya adi, Lupöni ta, a se lupöni lukata, kweja adi Yosua se ko momoret liŋ na ŋutu ti Yisaraele.

²² A Mose koŋdi gwoso na saŋi MATAT nye nu; a nye ’dumuŋdye Yosua a togwi ’dikiŋdye nye ko koane Elejara i komor ko i komor na momoret liŋ,

²³ a nye sopakiŋdye könisi kanyit ko lepeŋ loki, a sarakiŋdye lepeŋ gwoso na jambi MATAT ko Mose i kutuk nu.