Kenet 24 - Bibilia Buk na Ŋun nagon koti luŋu a

¹ A Balam ko mete adi a na ’but ko MATAT i metet i ’boroja na ŋutu ti Yisaraele, a nye tine tu i jwö jwöŋgu na ŋutu ko winikö gwoso i kunie diŋitan kune, ama a nye löpuköd-di komor nanyit i swöt lo yöbu.

² A Balam ’bi ’yi konyen kanyit ki a meddi ŋutu ti Yisaraele aje ’beggu merajin gwoso i kötumitön kase; a Mulökötyo lo ŋun poki ko lepeŋ loki,

³ a nye tokoŋ adi, ŋilo a nan Balam ŋuro lo Beor lo ’do ’yu, ŋina a ’dolet nio nan ŋuto logon konyen kwe gwon ŋa,

⁴ ŋina a ’dolet nio nan kayiŋanit lo kulyaesi ti ŋun. Nan memet kulya ti Kabulönit lo ŋo liŋ köyö i töili, a nan ’dorone kak, ama a konyen kwe gwe a ko mukö.

⁵ Nan ’do ’yu adi, Pon Yakobo, kemialan kunök kwekwelen, do Yisaraele, merajin kunök a nake!

⁶ Merajin kunök gwoso luruki lo ririkörö pajo, ko gwoso meleseno na kuru nyona ko kare, gwoso kaden alim logon MATAT a ’yut kulo, köti gwoso kaden araja logon gwon nyona ko pioŋ.

⁷ A pioŋ mo jorene kanyit i kerya, a nyakwariat kanyit mo gwe gwoso karya jore, a mor lonyit mo toŋuŋdye Agaga, a tumatyan nanyit mo bulani bula.

⁸ ŋun joŋdya lepeŋ kaŋo Ejipeto yu; a nye gwe ko oŋgwora gwoso ti mekor, a nye mo nyesi merok kanyit logon a ŋutu ti jurön, a mo ’be ’beleŋgi kuyu kase i tupesi, a mo tutu ’ye se ko loya kanyit.

⁹ Nye a rupakiŋdya kak, nye a piriki kak gwoso kömiru, iŋkoi gwoso kömiru nanakwan; ŋa logon totoŋi lepeŋ? Ŋutu liŋ lo ’boroja kötumit inot kulo mo ’bo ’boria, a ŋutu liŋ lo lömbu kötumit inot kulo mo lömöni lömö.

Keju na Balam

¹⁰ A Balak iŋge woran parik ko Balam, a nye naŋgi könisi kanyit; a Balak kulyani ko Balam adi, Nan a luŋgu do i lömbu na merok kwe, ama mete, do aje ’boroja se kine daŋin musala.

¹¹ Iŋgo, wöki soŋinana konut i pirit; nan a jambu adi, ’Diri nan mo bu ’ya do, ama MATAT aje teŋgu do i bula.

¹² A Balam kulyani ko Balak adi, Nan a ko takin luyökie kulök lo son do köyö yu kulo le adi,

¹³ Ma ’di ködyö Balak a tiŋdu nan kadi nanyit a jore ko pödö ko dakap, a nan ködyö tine bulö lwöŋgu saret lo MATAT, i koŋdya na kulya na ’but kode narok nagoŋ po köyö i töili; ama ŋo nagoŋ MATAT a jam kune nan ŋona ti jambu se le?

¹⁴ Soŋinana mete, nan lo iti i ŋutu kwe; poŋdi a nan de jujuje do ko kilo ŋutu mo konakin ŋutu kulök ada i perok lo popo.

¹⁵ a nye tokoŋ adi, Ŋilo a nan Balam ŋuro lo Beor lo ’do ’yu, ŋina a ’dolet nio nan ŋuto logon konyen kwe gwon ŋa,

¹⁶ ŋina a ’dolet nio nan kayiŋanit lo kulyaesi ti Ŋun. Nan a kuruŋdyö denesi ti Katoŋa-nit lo ki liŋ, nan memet kulya ti Kabulönit lo ŋo liŋ köyö i töili, a nan ’dorone kak, ama a konyen kwe gwe a ko mukö.

¹⁷ Nan ’do ’yu adi, Nan memet lepeŋ, ama ’bayin soŋinana; nan didir nye, ama ’bayin nyona; a kaseroköti mo puku kaŋo i kötumit na Yakobo, iŋkoi ture lo tumatyan mo pupukun kaŋo i ŋutu ti Yisaraele; a nye mo gwuddye temeneŋan ti Moaba, a mo ’bitökiŋdye ŋutu liŋ logon a kaŋisak kak.

¹⁸ A jur lo Edom mo mokani moka, a jur lo ŋutu ti Seir koti logon a merok kanyit kulo mo mokani moka, a ŋutu ti Yisaraele mo koŋdi ko tuwalan.

¹⁹ A tumatyan mo puku kaŋo ko kötumit na Yakobo, a ŋutu lo wökön kaŋo i köjinö kata kulo mo tukarani tukara.

²⁰ A Balam diŋe Amalek, a tokoŋ tökoŋu adi, Amalek a kwe na juron. ama a ’dutet nanyit mo gwe a tukara.

²¹ A nye diŋe ŋutu ti Keni, a tokoŋ adi, Pirit si ’daet nasu yeŋ nyin, a kadi nasu gwe i lurutat gwoso kadi na kwenti;

²² ama kölumbö a ta ŋutu ti Keni mo totumöni totumö. Diŋit ŋoman nagoŋ ŋutu ti Asur baraŋdi ta a lo momoka?

²³ A Balam tokoŋ adi, Wöidiö, ŋa mo lo gwon jörun na koŋdi Ŋun kine kulya nu?

²⁴ Ama a ki ’bojin mo poŋdi kaŋo Kitim yu a se mo yöyöŋgi Asur, a mo yöyöŋgi Eber; a nye köti mo tukarani tukara.

²⁵ A Balam ŋine ki, a yitöni kanyit i pirit; a Balak köti morgi kiko lonyit.