Kenet 23 - Bibilia Buk na Ŋun nagon koti luŋu a

¹ A Balam kulyani ko Balak adi, Dipakiŋdye nan ni piritön buryo ’yuresi ti rubaŋgajin, ko tetena-kiŋdye nan ni dwönin buryo ko lopijoki buryo.

² A Balak koŋdi gwoso na kulyari Balam na; a Balak ko Balam wukiŋdye dwöt ko lopijot i piritön liŋ geleŋ geleŋ ’yuresi ti rubaŋgajin.

³ A Balam kulyani ko Balak adi, Gwo ’de i tiju na rubaŋga ilot lo ’yu ’yura ’buluŋ, nan lo iti tu; kode ŋona MATAT de rurumbi nan, a ko nye a jamakiŋdya nan nene ŋo a nan de ko nyönyökö-kiŋdye do. A nye kiyaddi ki i kwe na mere nagoŋ ’bak kaden.

Balam ’boroja ŋutu ti Yisaraele

⁴ A Ŋun rume ko Balam; a Balam kulyani ko lepeŋ adi, Nan aje dibba piritön buryo ’yuresi ti rubaŋgajin, nan aje wukiŋdya dwöt ko lopijot i kunu piritön ’yuresi liŋ geleŋ geleŋ.

⁵ A MATAT tiŋdi kulyaet ko Balam i kutuk, a kulyani adi, Yitöni ko Balak yu, a do de kulyani sona.

⁶ A nye yitöni ko lepeŋ yu, mete, a nye ko ŋutu liŋ lokukwön ti Moaba gwo ’de i tiju na rubaŋga lonyit lo ’yu ’yura ’buluŋ.

⁷ A Balam tokoŋ adi, Balak a joŋdya nan Aram yu, iŋkoi mor lo Moaba a joŋdya nan kaŋo i merya ti swöt lo ’yure kulya adi, Po, lömöki nan ŋutu ti Yakobo, po, senye ŋutu ti Yisaraele!

⁸ A nan lömbi ŋutu logon Ŋun a ko löm kulo ada? Iŋkoi a nan seŋdi se logon Ŋun a ko seŋdya kulo ada?

⁹ Kogwon nan a metun lepeŋat i kusik ti merya, iŋkoi nan a metun lepeŋat i lurwat loki; mete, ŋina a kötumit nagoŋ si ’da geleŋ, a gwe ’bayin i keŋdya na ’börik i kiden na jurön.

¹⁰ Ŋa logon jojo keŋdya ŋutu ti Yakobo? Iŋkoi ŋa logon jojo keŋdya ma ’di swöt geleŋ na iŋwan na Yisaraele? Ti nan twane twan na ŋutu lo rigwo, ko ti ’dutet nio gwe gwoso nase.

¹¹ A Balak pipije Balam adi, Ŋo a nyo nagoŋ do a konakin nan? Nan a joŋdya do i lömbu na merok kwe, ama mete, kölumbö a do aje ’boroja lepeŋat.

¹² A nye waddi adi, Nan ködyö ti tiriku jambu na ŋo nagoŋ MATAT a tikin köyö i kutuk kune le?

¹³ A Balak waddi lepeŋ adi, Böŋö poŋdi, ti yi iti i nene pirit nagoŋ do bubulö meddya se; do de tuŋ memet ŋutu kase lo gwon nyona, a do de tine met se liŋ; a do lömöki nan se nyu.

¹⁴ A Balak joŋgi lepeŋ i kak na Sopim i kwe na Pisiŋa, a nye dibbe piritön buryo ’yuresi ti rubaŋgajin, a wukiŋdye dwöt ko lopijot i se liŋ geleŋ geleŋ.

¹⁵ A Balam kulyani ko Balak adi, Gwo ’de i tiju na rubaŋga ilot lo ’yu ’yura ’buluŋ, na tiri nan i rum ko MATAT nyu nu.

¹⁶ A MATAT rume ko Balam, a tiŋdi kulyaet kanyit i kutuk adi, Yitöni ko Balak yu, a do kulyani sona.

¹⁷ A nye yitöni ko lepeŋ yu, a ko ryeji lepeŋ gwo ’dan i tiju na rubaŋga lonyit lo ’yu ’yura ’buluŋ, a ŋutu lokukwön ti Moaba gwe ko lepeŋ. A Balak pipije lepeŋ adi, MATAT a jambu adi nyo?

¹⁸ A Balam tokoŋ adi, Balak, ŋine ki, ko yiŋge yiŋga;

¹⁹ Ŋun ’bayin a ŋuto anyen nye ’bu ’burönö, nye ’bayin a ŋuto logon a lipo anyen nye löpuggö yeyeesi kanyit. A ko nye a jambu, a nye mo tine koŋdya le? Kode ko nye a kulya, a nye mo tine töjukin gwoso na jambi nye na le?

²⁰ Mete, nan a saraki i ’boroja: nye aje ’boroja, a nan tine bulo löpuggö.

²¹ Delyaesi a ko metaki ŋutu ti Yakobo, iŋkoi daraesi a ko metaki ŋutu ti Yisaraele. MATAT Ŋun lose gwon ko lepeŋat, a pupuresi nagoŋ pupurarikin mor gwe kase kiden.

²² ŋun a toyuuŋdyö se kaŋo Ejipeto yu; a gwe gwoso se gwon ko oŋgwora ti mekora.

²³ Kogwon jwöjwöŋö ’bayin nagoŋ jwöjwöŋöri Yakobo, iŋkoi waŋdu ’bayin nagoŋ wanari Yisaraele; soŋinana ŋutu de jambu i kulya ti ŋutu ti Yakobo logon a Yisaraele adi, Ŋun aje koŋdya nyo?

²⁴ Mete, na kötumit ŋiŋien ki gwoso kömiru nanakwan, a ’bi ’yi mugun ki gwoso kömiru; a mo tine piriki kak tojo ko nye aje nyesu ŋo na dom nye na, ko a möju rima ti ŋo na ko nye nu.

²⁵ A Balak kulyani ko Balam adi, Do kwöŋ tine lömbu se, kode ’boroja se.

²⁶ Ama a Balam waddi Balak adi, Nan a ko takin do le adi, ŋo liŋ na saŋi MATAT kune a nan koŋdi se?

²⁷ A Balak kulyani ko Balam adi, Po, a nan de joŋgi do i nene pirit; kode ŋona de meta a na ’but ko Ŋun i komor ko do a lömökin nan se nyu.

²⁸ A Balak joŋgi Balam i kwe na Peor, na metaddu i yöbu na sese.

²⁹ A Balam kulyani ko Balak adi, Dipakiŋdye nan ni piritön buryo ’yuresi ti rubaŋgajin, ko tetenakiŋdye nan ni dwönin buryo ko lopijoki buryo.

³⁰ A Balak koŋdi gwoso na kulyari Balam na, a nye wukiŋdye dwöt ko lopijot i piritön ’yuresi ti rubaŋgajin liŋ geleŋ geleŋ.