Kenet 21 - Bibilia Buk na Ŋun nagon koti luŋu a

Ŋutu ti Kanana a pokin i mörö ko ŋutu ti Yisaraele

¹ A mor lo Arada Kananatyo lo si ’da i jur lo loki lo ko yiŋge adi ŋutu ti Yisaraele kulo gwe i poŋdya i kiko lo Atarim nu, a nye poki i mörö ko Yisaraele, a nye momokaddi kulye kase.

² A ŋutu ti Yisaraele nyökiŋdye MATAT milye adi, Ko do ’diri gwak a tiŋdu kulu ŋutu kayaŋ i könisi, a yi mo tukaŋi köjinö kase asut.

³ a MATAT yiŋge gworolo ti ŋutu ti Yisaraele, a pakiŋdye ŋutu ti Kanana kase i könisi, a se tukaŋi lepeŋat ko köjinö kase asut; a karin ti nu pirit luŋuni a Korma.

Munuö logon kutusen a kimaŋ

⁴ A se giörö i mere Or ko kiko lo tiri Tör Nator i logaddu na jur lo Edom; a töilyet ti ŋutu iŋge ’dua kogwon kiko a lojo.

⁵ A ŋutu jambi arabat i kulya ti Ŋun ko Mose adi, Nyö ta a joŋdya yi kaŋo i Ejipeto anyen ko twatwa i yöbu? Kogwon kinyo ko pioŋ ’bayin, a kamulak kaŋ tine ’dekan ŋilo kinyo logon ’bak ’bulit.

⁶ A MATAT soŋdi munuö logon ko kutusen a kimaŋ i kiden na ŋutu, akököji ŋutu, a ŋutu ti Yisaraele jore iŋge twatwa.

⁷ A ŋutu kulo poŋdi ko Mose ni a kulyani adi, Yi a toroŋdya, kogwon yi a jambu arabat i kulya ti MATAT ko do i pirit na geleŋ; momo ’yi MATAT i joŋga na kilo munuö kaŋo kayaŋ. A Mose mumulukiŋdye kilu ŋutu.

⁸ A MATAT kulyani ko Mose adi, Nitökiŋdye mugun munu logon kutuk a kimaŋ ko ’biliki nye i ködini ki; a koŋuto logon a koa ko munu ko a diŋa lepeŋ a mo rune ru.

⁹ A Mose niddye mölwö a munu, a ’bikikiŋdye nye i ködini ki; a ko munu a koja lele ŋuto, a nye diŋe lu munu logon a mölwö lo a nye rune ru.

Ŋutu ti Yisaraele a jölöji logaddi Moaba

¹⁰ A ŋutu ti Yisaraele giörö giörö, a se mönuŋdye Obot yu.

¹¹ A se giörö kaŋo Obot, a se mönuŋdye lye-abarim, i yöbu na gwon i komor na Moaba, i swöt lo nyeruŋdye kolor.

¹² A se ŋiörö kaŋo nyu, a mönuŋdye i pirit na ’dir na Jereda.

¹³ A se Ŋiörö kaŋo nyu, a mönuŋdye i nu pele na kare Arenon nagoŋ gwon i yöbu na suluja i lokökorit lo ŋutu ti Amori; kogwon Arenon a koret na Moaba, i kiden na Moaba ko Amori.

¹⁴ Nyenagoŋ a jama i Buk na Möröjin ti MATAT adi, Waeba i kak na Supa, ko piritön na ’dir ti Arenon,

¹⁵ ko dudulesi ti piritön na ’dir na ’dirörö teŋ ko köji na luŋu a Ar, na tikö ko lokökorit lo Moaba.

¹⁶ A nyu se iti ŋerot tojo Bera, kweja adi ŋilu kidi logon MATAT a kulyari ko Mose adi, Momoruŋdye ŋutu i pirit na geleŋ, a nan mo tiŋdi se pioŋ.

¹⁷ A kirut ŋutu ti Yisaraele yö ’yi ŋilo köli adi; Do kidi, ti pioŋ leleku ki konut! Yuluku ta kidi köli,

¹⁸ iŋkoi kidi logon temejik lo ’bogga, logon lokukwön ti ŋutu a ’bok lo, ko ture lo tumatyan ko köti ko puriöt kase. A i yöbu a se iti ŋerot tojo ko Matana,

¹⁹ a suluje Matana a se iti tojo ko Nakaliele, a suluje Nakaliele a se iti tojo ko Bamot,

²⁰ a suluje Bamot a se iti tojo i kwake na mere na gwon i kak na Moaba, diŋö ko kwe na Pisiŋa nagoŋ metaddu kak i pirit na sese.

Ŋutu ti Yisaraele a te ’ya Sikon

²¹ A ŋutu ti Yisaraele soŋdi kulye luyökie ko Sikon mor lo Amori yu adi,

²² Kölöddi yi i lwöpöddu kasu i jur; yi de ti lwöpöddu i meleseno kode i luköbiöt ti kaden ti binyo, a yi de tine möju pioŋ ti kidya, ama yi de tiri kiko duma lo mor, tojo yi a lwöpöddu kasu i jur.

²³ Ama a Sikon gwe a ko rukökin ŋutu ti Yisaraele i lwöpöddu kase i jur. A nye momorakiŋdye ŋutu kanyit liŋ i pirit na geleŋ, a se iti i yöbu i mörö ko ŋutu ti Yisaraele, a se ’dure Yasa, a möröni ko ŋutu ti Yisaraele.

²⁴ A ŋutu ti Yisaraele tatuje se ko baŋdujin kase, a morgi jur lose suluja Arenon tojo ko Yabok, tojo ko ŋutu ti Amon; kogwon Yajer a koret na ŋutu ti Amon.

²⁵ A ŋutu ti Yisaraele morgi kinu köjinö liŋ, a si ’dani i köjinö liŋ ti ŋutu ti Amori, i Kesebon ko i turön kanyit liŋ.

²⁶ Kogwon Kesebon a köji na Sikon mor lo Amori, logon köju a mörö ko mor lo Moaba a nye iŋge riŋuŋdya jur lonyit liŋ kaŋo kanyit i könin tojo ko Arenon lu.

²⁷ Nyenagoŋ a kayolok ti tolupesi yö ’yi sona adi, Po ta Kesebon ni, ti yi ’duke ta ’duk nye, ti yi togwi ’dikiŋdye köji na Sikon ki ’bura.

²⁸ Kogwon kimaŋ aje tulörö kaŋo suluja Kesebon, iŋkoi ŋedepa ti kimaŋ aje daŋaddu suluja i köji na Sikon. a iŋge ’yur Ar na Moaba, iŋkoi a ’yur piritön ko ’dulan na gwon i merya ti Arenon.

²⁹ Wöidiö, do jur lo Moaba! Ta ŋutu ti Kemosa, ta a toliki! Nye a tiŋdu Sikon logon a mor lo Amori ŋwajik kanyit lulyan a lo wöwöki, ko ŋwajik kanyit nawate a na momoka.

³⁰ Yi a poŋu se; Kesebon a körö teŋ ko Dibon, yi a tukarara tojo ko Nopak, a yi iŋge tukarara se ko kimaŋ tojo Medeba.

Ŋutu ti Yisaraele a te ’ya Oga mor lo Basan

³¹ A ŋutu ti Yisaraele si ’dani i jur lo ŋutu ti Amori.

³² A Mose soŋdi kawirak i wiŋa na Yajer; a se riŋaddi turön kanyit, a riköddi kaŋo ŋutu ti Amori lo gwon nyu kulu.

³³ a se wöriŋöddi a tiri kiko lo Basan; a Oga mor lo Basan ko ŋutu kanyit liŋ poki i mörö ko se Ederei yu.

³⁴ Ama a MATAT kulyani ko Mose adi, Ko kujönö lepeŋ; kogwon nan aje tikin lepeŋ konut i könin, ko ŋutu kanyit liŋ, se ko jur lonyit; a do ködyö konakiŋdye lepeŋ gwoso na konakiŋdye do Sikon mor lo Amori nu, logon si ’da Kesebon.

³⁵ A se tatuje lepeŋ, ko ŋwajik kanyit, ko ŋutu kanyit liŋ, tojo lele lose a ko pitwe kwöŋ; a se morgi jur lose.