Kenet 19 - Bibilia Buk na Ŋun nagon koti luŋu a

Tokela na ŋutu logon a lut i kulya ti keri

¹ A MATAT kulyani ko Mose ko Arona adi,

² Lo a saret lo wurö logon nan MATAT aje saŋu adi, Taki ŋutu ti Yisaraele anyen se jakiŋdya do tagwok nator nagoŋ a na ’but nagoŋ ’bak yuyuket, nagoŋ gwulugi a ko nyuŋ toraki ko lepeŋ i murut na.

³ A ta tiŋdi koane Elejara, a tagwok joŋani kaŋo i mera, a ’dugöni ’duŋö kanyit i komor;

⁴ a koane Elejara ködyö sukiŋdye morinet lonyit i lima kata, a gwataddi kine rima daŋin buryo ko-morga komor na kemia torumet.

⁵ A tagwok ködyö ’yurani ’yura Elejara memeddya; a ŋober nanyit, ko lokore nanyit, ko rima kanyit, ko moyok kanyit i pirit na geleŋ ködyö ’yurani ’yura;

⁶ a koane ködyö ’dumuŋdye ködini logon gwoso tika, ko lömuryeje, ko boŋgo nator, a gubaddi se i kiden na kimaŋ na ’yurari tagwok na.

⁷ A koane lalaji boŋgwat kanyit a tukwöji mugun nanyit, a i mukök a nye lupödöi i mera; a koane ködyö gwe a lut i kulya ti keri tojo ko sömukö.

⁸ A nye lo ’yuŋa ŋina tagwok lo ködyö lalaji boŋgwat kanyit, a tukwöji mugun nanyit, a nye gwe a lut i kulya ti keri tojo ko sömukö.

⁹ Aŋuto logon a loke i kulya ti keri lo ködyö yunaddi kurök ti tagwok, a ’delakiŋdye se i kaŋo na mera i nene pirit nagoŋ a nake; a se ködyö ’delakine momoret na ŋutu ti Yisaraele. Kine kurök a ti pioŋ nagoŋ lalarikin lut ti keri, kogwon tagwok a rubaŋga lo toron.

¹⁰ Aŋuto lo yuŋdya kurök ti tagwok lo ködyö lalaji boŋgwat kanyit, a gwe a lut i kulya ti keri tojo ko sömukö. A lo gwe a saret lo wurö anyen yeyeŋon ŋupi i ŋutu ti Yisaraele ko i lwaka lo si ’da kase kiden kulo.

¹¹ Ŋuto logon a ’bo ’yu öpu na ŋuto lo twan lo ködyö gwon a lut i kulya ti keri ko perok buryo;

¹² a ŋilu ŋuto toke ’yi mugun ko kine pioŋ i lor tomusala lonyit ko i lor toburyo lonyit, a nye mo gwe a loke; ama ko nye a ko toke ’ya mugun i lor tomusala lonyit ko i lor toburyo lonyit, a nye ködyö tine gwon a loke.

¹³ Ko ŋuto logon a ’bo ’yu öpu naŋuto lo twan, a nye gwe a ko toke ’ya mugun, ŋilo ŋuto toluddya kemia na MATAT, a nye ködyö riköjine kaŋo i Yisaraele; kogwon pioŋ nagoŋ lalarikin lut ti keri a ko pokaki kanyit i mugun, a nye gwe a lut i kulya ti keri; a lut kanyit nyuŋ gwe kanyit.

¹⁴ A koŋuto a twan i kemia lukata, a ŋilo gwe a saret adi ŋutu liŋ logon a lupö i nu kemia lukata se ko ŋutu liŋ lo gwon i nu kemia kulo ködyö gwe a lut i kulya ti keri ko perok buryo.

¹⁵ A tito liŋ na ŋon gwon ŋa nagoŋ ’bak mukesi na toraki i lepeŋat kune, gwe a lut i kulya ti keri.

¹⁶ Ko ŋuto lo gwon mu ’diŋ a ’bo ’yu ŋuto lo tatua ko baŋdu, kode ’bo ’yu öpu naŋuto logon a twan, kode ’bo ’yu kuyu ti ŋuto, kode luŋa gulöm lo, ŋiloruto ködyö gwon a lut i kulya ti keri ko perok buryo.

¹⁷ A ŋutu ködyö ’dumuŋdye kunie kurök ti rubaŋga lo ’yura a lo toron lo, a pioŋ na lelek ködyö ’yalakine nyin i titoni lukata a kine ködyö lalarikin kine lut.

¹⁸ Ŋuto loke i kulya ti keri ködyö ’dumuŋdya lömuryeje, a jurutökiŋdye i pioŋ lukata, a gwagwaddi pioŋ i kemia loki, ko i tito kanyit liŋ, ko i ŋutu logon gwon nyu kulu, ko i ŋuto lo ’bo ’yu kuyu, kode a ’bo ’yu ŋuto lo tatua, kode logon a twan, kode a ’bo ’yu gulöm,

¹⁹ kweja adi ŋilu ŋuto loke ködyö gwagwaddu ŋuto logon a lut i kulya ti keri i lor tomusala lonyit ko i lor toburyo lonyit; a i lor toburyo lonyit a nye toke ’yi lepeŋ, a lu ŋuto ködyö lalaji boŋgwat kanyit a tukwöji mugun, a nye mo gwe a loke i kulya ti keri i sömukö.

²⁰ Ama koŋuto logon a lut i kulya ti keri a gwe a ko toke ’ya mugun lo, ŋilo ŋuto ködyö riköji kaŋo i kiden na momoret, kogwon nye aje toluddya pirit nake na rurwan na MATAT; kweja adi pioŋ lalaesi ti lut i kulya ti keri gwe a ko pokaki kanyit i mugun, a nye gwe a lut.

²¹ Ŋilo a saret lo wuröki lepeŋat anyen yeyeŋon ŋupi. A kaŋwatanit lo pioŋ lalaesi ti lut i kulya ti keri lo ködyö lalaji boŋgwat kanyit; a ŋuto lo ’bo ’yu pioŋ lalaesi ti lut i kulya ti keri lo gwe a lut tojo ko sömukö.

²² A ŋo liŋ nagoŋ ŋuto logon a lut i kulya ti keri a ’bo ’yu lo ködyö gwe a lut koti; a ŋutu liŋ lo ’bo ’yu nene na kine ŋo kulo ködyö gwe a lut tojo ko sömukö.