Kenet 18 - Bibilia Buk na Ŋun nagon koti luŋu a

Kinyojin logon ködyö gwegwelaki koanejin ko Lewijin

¹ A MATAT kulyani ko Arona adi, Do se ko ŋwajik kulök ko kötumit na merenyu i pirit na geleŋ ködyö ’doggu toronjin i kulya ti pirit nake na rurwan; a do se ko ŋwajik kulök ködyö ’doggi toronjin i kulya ti tokoaŋan nasu.

² A ta ködyö joŋdi luŋösurök kasu köti logon a kötumit na Lewi, kweja adi kötumit na munyi, anyen se morakiŋdya kasu i parakiŋdya na ta, i diŋit na gwoŋdi do ko ŋwajik kulök i komor na kemia na ŋurupö tökoresi nu.

³ A se ködyö parakiŋdye do a kitani kitajin liŋ ti nu kemia; ama a se tine mijun nyona i tito ti pirit nake na rurwan ko i pirit ’yuret na rubaŋgajin, an se twatwa mora ko ta.

⁴ A se ködyö morakiŋdye konut, anyen koŋdya kitajin liŋ ti kemia torumet; a ŋuto logon ’bayin a Lewityo lo ködyo tine mijun kasu nyona.

⁵ A ta ködyö kitani kitajin ti pirit nake na rurwan ko kitajin ti pirit ’yuret na rubaŋgajin, an woran ko pokin köti ko ŋutu ti Yisaraele loki.

⁶ Mete, nan aje ’dumara luŋösurök logon a Lewijin kulo kaŋo i kiden na ŋutu ti Yisaraele; lepeŋat a ’dokari ta, kweja adi ’dokari nan MATAT anyen koŋdya kita na kemia torumet.

⁷ A do se ko ŋwajik kulök i pirit na geleŋ ködyö kitani a koanejin i kulya ti ŋo liŋ ti pirit ’yuret na rubaŋgajin ko i kulya ti ŋo na gwon i lukata na boŋgo koret kune; ŋina a kita nasu. Nan a ’dogga ta i kita a koanejin. Ŋuto logon ’bayin a Lewityo lo mijun nyona lo ködyö tatatua.

⁸ A MATAT kulyani ko Arona adi, Mete, nan aje tiŋdu konut i könin ŋo kwe nagoŋ ŋutu ti Yisaraele a ’dumun i ’dokesi kase nake liŋ na rurwan; iŋkoi nan a tin do se ko ŋwajik kulök a koret nasu nagoŋ ködyö titiki ŋupi.

⁹ A kine mo gwe a kunök ti ŋo nake parik na rurwan nagoŋ a ko tiki i kimaŋ kune, kweja adi rubaŋgajin kase liŋ logon a ’dokesi kase liŋ ti ’bolot, ko a rubaŋgajin kase liŋ ti toron, ko a rubaŋgajin kase liŋ ti lyaŋesi logon se a wukiŋdya nan kulo, kilo ködyö gwon a loke parik konut se ko ŋwajik kulök.

¹⁰ A ta ködyö nyesi se i pirit nake parik na rurwan; ŋutu lyan liŋ bubulö nyesu se; se a loke kasu.

¹¹ A ŋina mo köti gwe a inot, kweja adi ’dokesi nagoŋ a ’dumwe i ’dokesi kase, iŋkoi kilo a rubaŋgajin liŋ lo kweya logon a ti ŋutu ti Yisaraele kilo; nan a tiŋdu do se, ko i ŋwajik kulök lulyan ko nawate i pirit na geleŋ a saret lo wurö anyen yeyeŋon ŋupi; ŋutu liŋ logon a loke i kulya ti keri konut midi kilo bubulö nyesu se.

¹² Nan a tin do welesi na ’but liŋ na nyunyumwe, ko binyo na ’but liŋ na nyunyumwe, ko ’bolot lo ’but liŋ lo nyunyumwe, logon a waŋesi ti ŋo lo wukin se MATAT kulo.

¹³ A kinyojin waŋesi ti kokwe ti ŋo liŋ nagoŋ gwon ka ’de i jur na jon se ko MATAT kune mo gwe a kunök; ŋutu liŋ logon a loke i kulya ti keri konut midi kulo bubulö nyesu se.

¹⁴ ŋo liŋ na gelwe a na rurwan kune i jur lo Yisaraele gwe a kunok.

¹⁵ ŋo liŋ lo ŋaju pelela ti ŋo liŋ lo gwon jörun, kode a ti ŋutu kode a ti toro ’bo lo wukin se MATAT kulo gwe a kulök; ama a do ködyö daggi kayujin ti ŋutu, a do köti daggi kayujin ti toro ’bo logon a lut i kulya ti keri.

¹⁶ Do ködyö daggu se i mukök na yapa geleŋ, a do ködyö keŋdi dakesi kase a pödöjin nagoŋ temuŋdya a sekelejin mukanat, gwoso i temet na sekele na pirit nake na rurwan, nagoŋ a gerajin merya murek.

¹⁷ Ama a do tine daggu kayu lo kiteŋ, kode kayu lo köbilityo, kode kayu lo meetyo, kogwon se a loke lo rurwan. A do ködyö gwagwaddi rima kase i pirit ’yuret na rubaŋgajin loki, a ’yuŋe welesi kase a rubaŋga, anyen möara paleleŋ ko MATAT yu;

¹⁸ ama a lokore nase gwe a inot, gwoso nagoŋ jujuk na kwekweya ko nyuti lo swöt lutaten a kulök kulo.

¹⁹ Nan aje tiŋdu do ŋo liŋ nagoŋ ŋutu ti Yisaraele a ’dumun i rubaŋgajin loke, lo wukin se nan MATAT kulo, ko i ŋwajik kulök lulyan ko nawate, gwoso saret lo wurö anyen yeyeŋon ŋupi; na a tomoret na ’balaŋ kweja adi a na töjulin na tetenaki ŋupi ko MATAT i komor i kulya kunök se ko ŋwajik kulök.

²⁰ a MATAT kulyani ko Arona adi, Do ködyö ti gwon ko kak lomore a na mede inot kase i kak, iŋkoi do ti gwon ko koret kase kiden; nan logon a koret ilot ko a lomore ilot i kiden na ŋutu ti Yisaraele.

²¹ Nan aje tiŋdu Lewijin swöt topuökisi liŋ ti Yisaraele a kak lomore na midijik kase, anyen gwon a ropet na kita nase na kitari se i kemia torumet nu.

²² A ŋutu ti Yisaraele ködyö tine mijun nyona köti i kemia torumet, an se ko ’doggu toronjin kase an se twatwa.

²³ Ama a Lewijin ködyö kitani kita na kemia torumet, a se mo ’doggi toron nase; a gwe a saret lo wurö anyen yeyeŋon ŋupi temba i nyakwariat kasu; a se ködyö tine gwon ko kak lomore i kiden na ŋutu ti Yisaraele.

²⁴ Kogwon nan a tiŋdu Lewijin topuökisi ti ŋutu ti Yisaraele na wukin se a ’dokesi kwe ti MATAT kune; nye ŋina kwe nagoŋ nan a jambu ko se adi se ködyö ti wuju kak jin lomoriot kase i kiden na ŋutu ti Yisaraele.

²⁵ A MATAT kulyani ko Mose adi,

²⁶ Do ködyö kulya ko Lewijin adi, Na ’dumaddi ta ko ŋutu ti Yisaraele swöt topuökisi nagoŋ nan a tin ta a lomoriot i ŋo kasu nu, a ta ködyö wukiŋdye i kine topuökisi ’doket na ’dumaki nan MATAT, kweja adi a topuökit na kine topuökisi.

²⁷ A ŋo na ’doggi ta kune ködyö kenani kasu gwoso ’bolot ti pirit gwutet na ’bolot, ko gwoso binyo jore ti pirit ryoket na ludweki ti binyo.

²⁸ Nyena a ta köti ködyö wukiŋdye nan MATAT ’dokesi na ’dumwe i topuökisi kasu liŋ nagoŋ ta a wu ko ŋutu ti Yisaraele i könin kune; a ta ködyö tiŋdi Arona ’doket na ’dokari nan MATAT kune i kine topuökisi kata.

²⁹ A ta ködyö nyumun-dye ŋo liŋ na ’but i ’dokesi liŋ na ’dokari ta kune anyen wukin nan MATAT, kweja adi ta tiŋdu nan koret na gelwe a nake na rurwan.

³⁰ Nyena a do ködyö takiŋdye se adi, Ko ta aje nyumuŋdyö ŋo na ’but i kine ŋo anyen wukin nan, a pitönö gwe i Lewijin gwoso ludweki ti pirit gwutet na ’bolot, ko gwoso ludweki ti pirit ryoket na ludweki ti binyo;

³¹ a ta se ko midijik kasu ködyö nyesi se abur i nene pirit; kogwon a ropet nasu i kulya ti kita nasu i kemia torumet.

³² A nagoŋ ta aje nyumuŋdyö ŋo na ’but i kine ŋo nu, a ta mo gwe ’bak kulya. A ta ködyö tine köŋu ŋo nake na rurwan ti ŋutu ti Yisaraele, an ta twatwa.