Kenet 17 - Bibilia Buk na Ŋun nagon koti luŋu a

Ture lo Arona

¹ A MATAT kulyani ko Mose adi,

² Taki ŋutu ti Yisaraele, ko ’dumuŋdye turya kase, ture geleŋ i kötumit na merenye geleŋ, kötumit na merenye geleŋ ko ture geleŋ, kweja adi i kimak kase liŋ turya puök wot murek, gwoso i kotumiton ti merenyejin kase. Wuröki karin ti ŋutu liŋ geleŋ geleŋ kase i turya,

³ ko wurökiŋdye karin ti Arona i ture lo Lewi. Kogwon ture geleŋ mo gwon a lo matat lo kötumitön ti merenyejin liŋ geleŋ geleŋ.

⁴ A do ködyo tikiŋdye se i kemia torumet i komor na ŋurupö tökoresi, i pirit na momorakiŋdye yi ko do nu.

⁵ A mo gwe sona adi ture lo ŋuto logon nan a wulun lo mo wile wilan; a nan mo togwo ’yi rerenyesi ti ŋutu ti Yisaraele nagoŋ se rerenyari ko ta kune.

⁶ A Mose kulyani ko ŋutu ti Yisaraele; a kimak kase liŋ tiŋdi lepeŋ turya, matat geleŋ tiŋdu ture geleŋ, gwoso i kötumitön ti merenyejin kase, kweja adi turya puök wot murek; a ture lo Arona gwe i kiden na turya kase.

⁷ A Mose petakiŋdye se ko MATAT i komor i lukata na kemia na ŋurupö tökoresi.

⁸ A ko gwe sona i ko ’bure nanyit a Mose lupöni i kemia na ŋurupö tökoresi; a meddi ture lo Arona lo kötumit na Lewi lo aje wilan a turöni turö, a rade ludweki sakeda.

⁹ A Mose ’dumuŋdye turya liŋ kaŋo ko MATAT i komor a jakiŋdye ŋutu liŋ ti Yisaraele; a se gwugwulu ’ye gwugwulu ’ya, a ’dumbe turya kase, ŋuto geleŋ ko ture lonyit.

¹⁰ A MATAT kulyani ko Mose adi. Nyököki ture lo Arona lo i komor na ŋurupö tökoresi anyen ’depa a kweyet i ŋutu karerenyak, anyen do tu ’baka ’yu rerenyesi kase na rerenyari se ko nan kune, an se ko twatwa.

¹¹ A Mose koŋdi sona; nye a koŋdya gwoso na saŋi MATAT nye nu.

¹² A ŋutu ti Yisaraele kulyani ko Mose adi, Mete, yi kulo twatwa, yi totoliki, yi liŋ totoliki.

¹³ Ŋutu liŋ lo mijun nyona i kemia na MATAT kulo mo twatwa. Yi liŋ köti twatwa le?