Kenet 16 - Bibilia Buk na Ŋun nagon koti luŋu a

Korak ko Datan se ko Abiram a renya sara

¹ A Korak ŋuro lo Yisar, ŋuro lo Kowat, ŋuro lo Lewi, ko Datan se ko Abiram ŋwajik ti Eliaba, se ko On ŋuro lo Pelet, nyakwariat ti Rubena ’dumuŋdye ŋutu;

² a se gwo ’de ko Mose i komor se ko kulye ŋutu ti Yisaraele i pirit na geleŋ gwoso temejik ti momoret miajin murek ko merya mukanat, lo wulwe i pepenet na ŋutu, logon a ŋutu lokukwön;

³ a se pepenakiŋdye ’börik i pirit na geleŋ i rerenya ko Mose ko Arona, a kulyani ko se adi, Kulya kasu aje lwöŋgu parik! Momoret na ŋutu liŋ geleŋ geleŋ a loke liŋ, a MATAT gwe kase kiden; ko nyo ta a ’dukukin ’börik ki i ŋerot na pepenet na MATAT?

⁴ a Mose ko yiŋge kine kulya a nye ’dorone kak rupu;

⁵ a nye kulyani ko Korak ko teŋ nanyit liŋ adi, Ko ’bure MATAT kwekwe ŋuto logon a lonyit ko logon a loke, a nye mo tomijuŋdye lepeŋ kanyit nyona; iŋkoi ŋuto logon nye a wulun lo a nye mo tomijuŋdye lepeŋ kanyit nyona.

⁶ Koŋdi ta sona: do Korak ko teŋ inot ’dumuŋdye ta ta ’doka;

⁷ tiŋdi ta kimaŋ i se, ko tiŋdi ta bökur loki ko MATAT i komor i ko ’bure, aŋuto logon MATAT a wulun lo mo gwe a loke. Ta ŋwajik ti Lewi kulya kasu aje lwöggu parik!

⁸ A Mose kulyani ko Korak adi, Ta ŋwajik ti Lewi yiŋge ta:

⁹ ŋina a ŋo na ’dit kasu le nagoŋ Ŋun lo Yisaraele a geluŋdya ta kaŋo i momoret na Yisaraele, i tomijuŋdyö na ta kanyit nyona, i koŋdya na kita i kemia nanyit na MATAT, ko i gwo ’dan i komor na momoret i kitakiŋdya na se?

¹⁰ A ŋo na ’dit kasu le nagoŋ nye aje tomijuŋdyö ta kanyit nyona, se ko luŋasirik kasu i pirit na geleŋ logon a ŋwajik ti Lewi? Ta köti ga ’yu gwon a koanejin le?

¹¹ Nyenagoŋ do se ko teŋ inot a momoruŋdya i ŋisa ko MATAT, ama Arona a ga anyen ta rerenya ko lepeŋ?

¹² A Mose soŋdi ŋutu i dogga na Datan ko Abiram ŋwajik ti Eliaba; a se waddi adi, Yi tine tu nyu.

¹³ Ŋina a ŋo na ’dit le nagoŋ do a toyuuŋdyö yi kaŋo i jur logon le ko siwatat ’do ’dokon kata lu; anyen ko tatuja yi i yöbu, a do köti ’duŋökiŋdye mugun a matat kayaŋ ŋerot?

¹⁴ Nyenagoŋ köti do a ko tolupödöu yi i jur logon le ko siwatat ’do ’dokon kata lu, do a ko tiŋdu yi i morga na meleseno kode luköbiöt ti kaden ti binyo. A do ’deke tutu ’yö konyen ti kilo ŋutu le? Yi ti tu nyu.

¹⁵ A Mose iŋge woran a tömönik, a nye kulyani ko MATAT adi, An do ko ruk ’dokesi kase. Nan a ko ’dumuŋdya ma ’di kaine geleŋ kase, nan a ko konakiŋdya lele lose arabat kwöŋ.

¹⁶ A Mose kulyani ko Korak adi, Ko ’bure do ko teŋ inot liŋ, do ko lepeŋat ko Arona gwe ta ko MATAT i komor;

¹⁷ ko ti ŋutu kasu liŋ geleŋ geleŋ ’dumuŋdye ta ’doka kase, ko ti tiŋdi bökur i loki nase, ko ti ta liŋ geleŋ geleŋ joŋdi ta ’doka kasu ko MATAT i komor, gwoso ta ’doka miajin murek ko merya mukanat; do köti se ko Arona, ŋuto geleŋ ko nanyit ta ’dök.

¹⁸ A ŋutu liŋ geleŋ geleŋ ’dumuŋdye ta ’doka kase, a tiŋdi kimaŋ i se a tiŋdi bökur i loki nase, a se gwo ’de i kötumit na kemia torumet ko Mose ko Arona i pirit na geleŋ.

¹⁹ A Korak pepenuŋdye momoret na ŋutu liŋ i rerenya ko se i kötumit na kemia torumet. A minyo lo MATAT iŋge pukökin i nu momoret liŋ.

²⁰ A MATAT kulyani ko Mose ko Arona adi,

²¹ Koruŋdye ta ’börik kaŋo i ŋina momoret kiden, anyen nan tutuŋgö se ’de ’de kijek.

²² A se ’dorone kak rupu, a kulyani adi, Pon Ŋun, do a Ŋun lo ködu dwölön ti ŋo liŋ lo gwon jörun lo, ko ŋuto geleŋ a toroŋdya, a do wore woran ko momoret liŋ le?

²³ A MATAT kulyani ko Mose adi,

²⁴ Taki ŋina momoret adi, Ti se iti kaŋo i pirit na si ’dari Korak, ko Datan se ko Abiram nu.

²⁵ A Mose ŋine ki a iti ko Datan ko Abiram yu, a temejik ti Yisaraele kepoddi lepeŋ.

²⁶ A nye kulyani ko momoret liŋ adi, Böŋö iti ta kaŋo i kemialan ti kilo ŋutu katoronyak, an ta ko ’bo ’yu ta nene ŋo nase, an ta ko tutuŋöji kaŋo i toronjin kase i pirit na geleŋ.

²⁷ Nyena a se iti kaŋo i mara ti pirit na si ’dari Korak, ko Datan, ko Abiram nu; a Datan ko Abiram poŋdi kaŋo a gwo ’de i kötumitön ti kemialan kase i pirit na geleŋ ko wate kase, ko ŋwajik kase, ko lupudiet kase.

²⁸ a Mose kulyani adi, I ŋina ta mo deden adi MATAT aje sunyun nan i koŋdya na kine kitajin liŋ, se a ko lupe köyö i töili.

²⁹ Ko ködyö kilo ŋutu twatwa gwoso i twan na ŋutu liŋ, ama ko se a ’yölö ko nene ’yölit na ’yölörikin ŋutu abur, a MATAT gwe a ko sunyun nan.

³⁰ Ama ko MATAT a gweja nene ŋo ludukötyo, a kak ŋaji kutuk nanyit a wi ’ye se ko ŋo kase liŋ adi mot, a se iti kak jörun tojo i pirit na mulökö, a ta mo dene den adi kilo ŋutu a lauŋdya MATAT.

³¹ A ko gwe sona na tutuŋge nye jambu kilo kulyaesi liŋ nu, a nu pirit na gwo ’di ’e se nu kaŋgi kaŋgu;

³² a kak ŋaji kutuk nanyit, a iŋge wi se liŋ adi mot, mora ko midijik kase, ko ŋutu liŋ ti Korak se ko toro ’bo kase.

³³ A se liŋ ko ŋo kase liŋ iti kak jörun tojo i pirit na mulökö; a nu pirit iŋge kinuru se kak, a se twatwane twatwa i kiden na pepenet na ŋutu.

³⁴ a ŋutu liŋ ti Yisaraele logon gwon kase nyona kulo iŋge wökön i lulujö na kilo ŋutu, gwien adi, An kak köti wilörö yi!

³⁵ A kimaŋ tuleŋ kaŋo ko MATAT yu, a totumbe ŋutu miajin murek ko merya mukanat lo wukiŋdya bökur kulu.

³⁶ A MATAT kulyani ko Mose adi,

³⁷ Taki Elejara ŋuro lo koane Arona adi ti nye ’dumuŋdye ta ’doka i pirit na nonokan nyu; ko ti nye toreara nu kimaŋ pajo. Kogwon se a nake na rurwan,

³⁸ kine a ta ’doka ti ŋutu logon a toroŋdya ru nase kulo; nyena ti se nitöni a na ’döpökök anyen muluja pirit ’yuret na rubaŋgajin, kogwon lepeŋat a wukiŋdya se ko MATAT i komor; nyenagoŋ a se gwe a nake na rurwan. Nyena a se mo gwe a kweyet i ŋutu ti Yisaraele.

³⁹ A koane Elejara ’dumuŋdye ta ’doka nagoŋ a mölwö, nagoŋ ŋutu lo ’yura kulo a wukiŋdye; a se iŋge nitö a muluet na pirit ’yuret na rubaŋgajin,

⁴⁰ anyen gwon a toyeyeet i ŋutu ti Yisaraele, adi ŋuto logon a leŋe koane, kode a leŋe lo nyakwariat ti Arona, ti gwe ti mijun nyona i ’yuŋa na bökur ko MATAT i komor, an nye wora gwoso Korak ko teŋ nanyit— gwoso na kulyari MATAT ko Elejara ko Mose i kutuk nu.

⁴¹ A i ko ’bure nanyit a momoret na ŋutu ti Yisaraele rerenyani rerenya ko Mose ko Arona adi, Ta a tatuja ŋutu ti MATAT.

⁴² A ko gwe sona na pepenuŋdye momoret i rerenya ko Mose ko Arona nu, a se ko metaddi i kemia torumet; a meddi luru aje muk kemia, a minyo lo MATAT lo puku.

⁴³ A Mose ko Arona poŋdi i komor na nu kemia torumet,

⁴⁴ a MATAT kulyani ko Mose adi,

⁴⁵ ŋiörö ta kaŋo i kiden na ŋina momoret, anyen nan tutupöddu lepeŋat ’de ’de kijek. A se ’do ’done kak rupu.

⁴⁶ A Mose kulyani ko Arona adi, ’Dumuŋdye ta ’dök inot, ko tikiŋdye kimaŋ lukata na ’dumwe i pirit ’yuret na rubaŋgajin, ko tiŋdi bökur loki, ko baraddi ’de ’de i nu momoret, anyen tokelari lepeŋat; kogwon woran na MATAT aje rölöddu kaŋo, a twanti iŋge suluja.

⁴⁷ A Arona ’dumuŋdye ta ’dök gwoso na jambi Mose nu, a nye wöki i kiden na nu pepenet; a meddi twanti aje suluja i kiden na ŋutu; a nye tiŋdi bökur i ŋina ta ’dök, a nye toke ’yi kilo ŋutu.

⁴⁸ A nye gwo ’de i kiden na ŋutu lo twatwa ko lo gwon jörun kulo; a twanti iŋge gwo ’dan.

⁴⁹ Ŋutu logon twanti lo tatuja kulo gwe a ŋutu alipan puök wot iŋwan ko miajin buryo, wat ŋutu lo twatwa i kulya ti Korak kulo.

⁵⁰ A Arona yitöni ko Mose yu i kötumit na kemia torumet, a ŋilo twanti iŋge gwo ’dan.