Kenet 15 - Bibilia Buk na Ŋun nagon koti luŋu a

Saresi i kulya ti wuki na rubaŋgajin

¹ A MATAT kulyani ko Mose adi,

² Taki ŋutu ti Yisaraele ko jamakiŋdye lepeŋat adi, Na ’durökiŋdye ta i lu jur logon ta mo sisi ’dari, logon nan mo titin ta lu,

³ a ta ’yurakiŋdye MATAT ŋo, kode rubaŋga lo ’yu ’yura ’buluŋ, kode lele rubaŋga logon ta a milyekin tiŋdu, kode rubaŋga lo tupali-kan na töili, kode rubaŋgajin lo wuki i roriot kasu lo wulwe kulo anyen möara paleleŋ ko MATAT yu. Kilo rubaŋgajin ködyö ’dumwe i teŋon ti kisuk kode ti yidin.

⁴ ŋuto lo joŋdya ’doket nanyit lo ködyö wukiŋdya MATAT ’doket na ’bolot nagoŋ a swöt topuökit na wuyit nagon a epa na ’bolot na jiö a naliliŋök a ŋola ko welet, nagoŋ a swöt geleŋ na iŋwan na temet nagoŋ a yin;

⁵ a do ködyö teteŋdi binyo a rubaŋga ’bu ’bu-ket nagoŋ a swöt geleŋ na iŋwan na yin. Kine binyo ködyö wuki ko rubaŋga lo ’yu ’yura ’buluŋ i pirit na geleŋ, kode ko lele rubaŋga, kweja adi ŋina temet na binyo wuki ko yisi liŋ geleŋ geleŋ.

⁶ Ama i kulya ti lopijot, a do ködyö tetenakiŋdye ’doket na ’bolot nagoŋ a swöt topuökisi murek ti epa na ’bolot na jiö a naliliŋök, nagoŋ a ŋola ko swöt geleŋ na musala na yin na welet;

⁷ a do ködyö wukiŋdye swöt geleŋ na musala na yin na binyo nagoŋ a rubaŋga ’bu ’buket, anyen moaja paleleŋ ko MATAT yu.

⁸ A nagoŋ do tetenakiŋdya dwöt a i ubaŋga lo ’yu ’yura ’buluŋ, kode a lele rubaŋga logon ta a milyekin tiŋdu kode a lo rubaŋgajin ti taliŋ a ti MATAT nu,

⁹ a ti ŋuto wukiŋdye ko lu dwöt i pirit na geleŋ ’doket na ’bolot, nagoŋ a swöt topuökisi musala ti epa na ’bolot na jiö a naliliŋök a ŋola ko swöt na yin na welet.

¹⁰ A do ködyö wukiŋdye rubaŋga ’bu ’buket logon a swöt na yin na binyo, anyen ’yu ’yura, anyen möara paleleŋ ko MATAT yu.

¹¹ A ködyö konani sona i dwönin liŋ geleŋ geleŋ, ko i lopijoki liŋ geleŋ geleŋ, ko i yisi mönikön liŋ geleŋ geleŋ, ko i torela ti yidin.

¹² A do ködyö konakiŋdye se liŋ geleŋ geleŋ gwoso i kenet nase na teteŋdi do nu.

¹³ A ŋutu liŋ lo yuŋwe i jur kulo ködyö koŋdi kine kulya gwoso i lo keri, i wukiŋdya na ŋo na ’yu ’yura, anyen möara paleleŋ ko MATAT yu.

¹⁴ A ko lele lwakatyo si ’da kasu kiden kode ko lele ŋuto gwon kasu kiden temba i nyakwariat kasu, a ko nye yöŋö ’yurakiŋdya MATAT nene ŋo anyen möara paleleŋ ko lepeŋ yu, a ti nye koŋdi gwoso na koŋdi ta na.

¹⁵ Saret geleŋ kata logon a losu lo momoret, ko a lo lwaka lo si ’da kasu kiden kulo, ŋilo a saret ŋupi lo wuröki ta temba i nyakwariat kasu; ta se ko lwaka gwon jojo ko MATAT i komor.

¹⁶ Saret geleŋ kata ko keri geleŋ kata a losu ko a lo lwaka lo si ’da kasu kiden kulo.

¹⁷ A MATAT kulyani ko Mose adi,

¹⁸ Taki ŋutu ti Yisaraele adi, Na lupödöi ta i lu jur logon nan joŋgi ta lu,

¹⁹ a na nyesi ta kinyo lo lu jur nu, a ta ködyö korakiŋdye nan MATAT lele swöt.

²⁰ Ta ködyö teteŋdya ambata i ’bolot kasu saora nagoŋ ŋera a kokwe a gwe a ko jiö a naliliŋök kune; a ta wukiŋdye lepeŋ gwoso ’doket na jwe i pirit gwutet na ’bolot na.

²¹ Kweja adi ta ködyö wukiŋdya MATAT ’doket nagoŋ a na ’bolot kasu saora, nagoŋ ŋera a kokwe a gwe a ko jiö a naliliŋök kune temba i nyakwariat kasu.

²² Ama ko ta a giran, a ta tine koŋdya kilo saresi liŋ logon MATAT aje jamakin Mose kulo,

²³ kweja adi ta ti kon kine ŋo liŋ nagoŋ MATAT aje sarakin ta ko Mose i kutuk kune, suluja i lu lor lo tiŋdi MATAT saret lu tojo ko ŋerot temba i nyakwariat kasu liŋ,

²⁴ a ko ta a giran ’bak denet a ko momoret gwe a ko met, nyena a momoret liŋ ködyö wukiŋdye dwöt ko kolojityo a rubaŋga lo ’yu ’yura ’buluŋ anyen möara paleleŋ ko MATAT yu, se ko ’doket na ’bolot ko rubaŋga ’bu ’buket logon wuki ko lepeŋ i pirit na geleŋ gwoso i keri, se ko meetyo mönik a rubaŋga lo toron.

²⁵ a koane ködyö wukiŋdye kine ŋo anyen tokelari momoret liŋ na ŋutu ti Yisaraele, a se mo pilökine pitöki. Lepeŋat a giran a ko koŋdya aka, a se iŋge joŋdya rubaŋga lose logon ’yuraki MATAT lo, se ko rubaŋga lose lo toron ko MATAT i komor kogwon giran nase.

²⁶ A momoret liŋ na ŋutu ti Yisaraele mo pitökine pitöki, se ko lwaka lo si ’da kase kiden kulo, kogwon ŋutu liŋ a giran ’bak denet.

²⁷ A ko lele ŋuto a koŋdya toron ’bak denet, a nye ködyö wukiŋdye kine nanakwan nagoŋ ko kiŋa geleŋ a rubaŋga lo toron.

²⁸ A koane ködyö wukiŋdye rubaŋga lo lu ŋuto logon a giran ko a toroŋdya ’bak denet lu ko MATAT i komor anyen tokelari lepeŋ, a nye mo pitökine pitöki.

²⁹ A ta ködyö gwe ko saret lo geleŋ i kulya ti ŋuto lo koŋdya nene ŋo ’bak denet, kode nye a ŋuto lo yuŋwe ko ŋutu ti Yisaraele, kode a lwakatyo lo si ’da kase kiden.

³⁰ Ama ŋuto lo koŋdya nene ŋo aka ko tukaŋan, kode nye a ŋuto lo yuŋwe i pirit kode nye a lwaka-tyo, ŋilo ŋuto aje moru MATAT; a lu ŋuto ködyö riköjine kaŋo i kiden na ŋutu kanyit.

³¹ Kogwon nye aje lauŋdya kulyaet lo MATAT, nye aje ’beleŋgu saret lonyit, a ŋilu ŋuto ködyö riköjine kaŋo asut, a tukwölöŋ nanyit mo gwe kanyit i kwe.

Ŋuto lo köŋu sabata guguba ko ŋurupö

³² A i diŋit nagoŋ ŋutu ti Yisaraele gwe i yöbu nu, a se ryeji lele ŋuto galaddu kaden i sabata.

³³ a se logon a ryeju ŋuto lo ga ’yu kaden lo joŋdi lepeŋ ko Mose ko Arona i komor, ko i komor na momoret liŋ.

³⁴ a se tiŋdi lepeŋ i kadi rereket, kogwon ŋo na konaki lepeŋ na a ko nyuŋ kweya.

³⁵ A MATAT kulyani ko Mose adi, Ti ŋilo ŋuto tatuani tatua; momoret liŋ ködyö gugubuja nye ko gurupö i kaŋo na mera.

³⁶ A momoret liŋ joŋdi ŋilo ŋuto kaŋo i mera, a gugubuje lepeŋ ko gurupö tojo a twan, gwoso na saŋi MATAT Mose nu.

Tetenaki na swalya i ŋogesi ti boŋgwat

³⁷ A MATAT kulyani ko Mose adi,

³⁸ Tamaki ŋutu ti Yisaraele, ko takiŋdye lepeŋat adi, Ti se teteŋdi swalya i ŋogesi ti boŋgwat kase tojo i nyakwariat kase, ko ti se tiŋdi kipita nagoŋ a narwö i swalya ti ŋogesi liŋ geleŋ geleŋ;

³⁹ a mo gwe kasu a swalya nagoŋ ta memet ko anyen yiyiuŋdye saresi liŋ ti MATAT, anyen ta kökon se, ko anyen ta gwon ti kepöddu ’dekesi ti töilyet kasu ko ti konyen kasu nagoŋ tiŋdu ta i bibiryetu gwoso ŋutu kalupök kune.

⁴⁰ Anyen ta yeyeju koŋdya saresi kwe liŋ, anyen ta gwon a ŋutu loke ti ŋun losu.

⁴¹ Nan a MATAT ŋun losu lo joŋdya ta kaŋo i jur lo Ejipeto, anyen nan gwon a ŋun losu. iŋkoi, nan a MATAT ŋun losu.