Kenet 14 - Bibilia Buk na Ŋun nagon koti luŋu a

Ŋutu kulo a renya MATAT

¹ A momoret liŋ luluöddi ki; a ŋutu gwine gwien lu tukwaje.

² A ŋutu liŋ ti Yisaraele woŋe ko Mose ko Arona; a momoret liŋ kulyani ko se adi, Ködyö a na ’but koyi ködyö a twatwa i jur lo Ejipeto! Kode ködyö a na ’but koyi ködyö a twatwa i na yöbu!

³ Ko nyo MATAT a joŋdya yi tojo ko lo jur anyen ko tatua ko baŋdujin? Wate kaŋ ko lupudiet kaŋ mo ryaryaka; bia ködyö koyi yitö bot Ejipeto.

⁴ A se tokulyaki ko ’börik adi, Ti yi wuluŋdye ta lele duma anyen yi yitö bot Ejipeto yu.

⁵ A Mose ko Arona ’dorone kak rupu i komor na pepenet liŋ na momoret na ŋutu ti Yisaraele.

⁶ a Yosua ŋuro lo Nun ko Kaleba ŋuro lo Yepune, logon gwon a kulye ti kawirak ti lu jur kulo kekereŋdi boŋgwat kase,

⁷ a kulyani ko momoret liŋ na ŋutu ti Yisaraele adi, Jur logon yi aje tiri lukata i wiŋa na lepeŋ lu a jur lo ’but, a lo ’but parik.

⁸ Ko ködyö MATAT a lyöŋön koyi, a nye mo tolupödöi yi tojo ko ŋilu jur logon ko le ko siwatat ’do ’dokon kata lu, a mo tikiŋdye yi lepeŋ.

⁹ Ama tuŋ an ta ko renya MATAT; köti ko kujönö ta ŋutu ti lu jur, kogwon se a kinyo likaŋ; a tölimöt nase iŋge ’dumaji kaŋo kase, a MATAT lo gwe koyi; ko kujönö ta se.

¹⁰ Ama a momoret liŋ kulyani adi, Ti yi gugu-bune gugubu lepeŋat ko gurupö.

¹¹ A minyo lo MATAT puköki ko ŋutu ti Yisaraele liŋ i kemia torumet ti A MATAT kulyani ko Mose adi, Diŋit ŋoman nagoŋ kilo ŋutu lauŋdya nan? Diŋit ŋoman nagoŋ se ti yuŋ nan, ko kweyesi liŋ nagoŋ nan a kon kase kiden?

¹² Nan mo ririŋ se ko twanti iŋgo, a nan mo renyakiŋdye se lomore nase, a nan mo koŋdi do a jur duma ko riŋit totogun se.

¹³ A Mose kulyani ko MATAT adi, ŋutu ti Ejipeto mo yiyiŋ kine kulya, kogwon do a toyuuŋdyö kulo ŋutu kaŋo kase kiden ko riŋit inot,

¹⁴ a se mo takiŋdye ŋutu ti lo jur. Kilo ŋutu a yiŋ adi do MATAT gwon i kiden na kulo ŋutu; kogwon do MATAT a meta a lokomor, a luru ilot gwo ’de kase loki, a do iti kase ŋerot i bilili lo luru i tuparan se ko i bilili lo kimaŋ i tukwaje.

¹⁵ Nyena ko do a tatuja kulo ŋutu gwoso ŋuto geleŋ, a jurön logon a yiŋ kwön inot kulo mo kulyani adi,

¹⁶ MATAT ti bulö tolupödöu kulo ŋutu tojo i lu jur lo milyekin nye i tiŋdu na se lu, nyenagoŋ a nye tatuje se i yöbu nyu.

¹⁷ Soŋinana böŋö ti riŋit inot na MATAT gwe a duma gwoso na jambi do nu adi,

¹⁸ MATAT a ’dikö i woran ko a jore ko nyaŋu nagoŋ ti ’duddyö kwöŋ, lepeŋ pipitökiŋdyö lyaŋesi ko toronjin na kona aka, lepeŋ kwöŋ ti kulya adi katoronyak ’bak kulya, lepeŋ roropakiŋdya lyaŋesi ti komonye i kusik ti ŋwajik kase, ko i kusik ti nyakwariat tomusala ko toiŋwan.

¹⁹ Böŋö pitökiŋdye lyaŋesi ti kulo ŋutu gwoso i todumalan na nyaŋu inot nagoŋ ti ’duddyö kwöŋ na, ko gwoso nagoŋ do aje pitökiŋdyö kulo ŋutu suluja Ejipeto tojo ko soŋinana na.

Ŋun a riŋga ŋutu ti Yisaraele

²⁰ A MATAT kulyani adi, Nan aje pitökin se gwoso na kulyari do na;

²¹ ama ’diri gwak gwoso na gwoŋdi nan na, ko gwoso nagoŋ kak liŋ babaraŋdu ko minyo liŋ lo MATAT na,

²² kulu ŋutu liŋ logon a met minyo liŋ, ko kweyesi kwe na kon nan Ejipeto ko i yöbu yu kunu, logon a temba nan daŋin puök a gwe a ko yiŋ gworo liŋ kilo,

²³ se kwöŋ mo tine met lu jur lo milyekin nan merenyejin kase adi nan titin se lu. Se liŋ logon a lauŋdya nan kilo mo tine met lu jur.

²⁴ Ama Kaleba kölipönit liŋ, kogwon töili lonyit gwon ka ’de ko a kipuŋdyö nan ko töili lonyit liŋ na, nan mo tolupödöu nye i lu jur lo tiri nye kata lu, a nyakwariat kanyit mo morgi lu jur a lomore.

²⁵ Kudyakan ŋutu ti Amalek ko ŋutu ti Kanana si ’dani i piritön na ’dir, nyena ko ’bure wöriŋöni ta ko ŋiörö ta i yöbu ko kiko lo tu i Tör Nator.

²⁶ A MATAT kulyani ko Mose ko Arona adi,

²⁷ Diŋit ŋoman nagoŋ ŋina momoret naron rerenya ko nan? Nan aje yiŋ rerenyesi ti ŋutu ti Yisaraele nagoŋ se rerenyari ko nan kune.

²⁸ Taki lepeŋat adi, Nan MATAT lo kulya adi, ’Diri ’diri gwoso na gwoŋdi nan na, ŋo liŋ nagoŋ ta a jam a nan iŋge yiŋ kine, nan molu kökonakin ta.

²⁹ öpuö kasu mo ’do ’do i ŋina yöbu; a ŋutu liŋ suluja i se logon ko kiŋajin merya murek tojo ko ŋerot logon a rerenya ko nan kilo,

³⁰ mo tine lupö i lu jur logon nan a milyekin adi nan mo tin ta i si ’da nyu lu, ake Kaleba ŋuro lo Yepune se ko Yosua ŋulo lo Nun lo lupö.

³¹ A lupudiet kasu logon ta a kulyari adi mo ryaryaka kilo, nan mo tolupödöu se nyu, a se mo deŋdi lu jur logon ta a lu lu.

³² Ama ko gwe gwoso ta, öpuö kasu mo ’do ’do i ŋina yöbu.

³³ A ŋwajik kasu mo wirte abur i yöbu kiŋajin merya iŋwan, a se mo goŋgi ŋoŋga kogwon ta a ko twöju, tojo ko öpuö kasu aje tutuŋö-kiŋdyö nyu i yöbu.

³⁴ Ta joŋga perok merya iŋwan logon ta wiŋe lu jur, a ta mo goŋgi lyaŋesi kasu ko kiŋajin merya iŋwan, i lor geleŋ kiŋa geleŋ i lor geleŋ kiŋa geleŋ, a ta mo deŋdi ŋoma nio.

³⁵ Nan MATAT aje kulya; ’diri gwak nan mo kökonakin kine kulya i ŋina momoret naron liŋ nagoŋ aje momorakiŋdya i mörö ko nan na; a se mo ’du ’duddye ’du ’duddyö i ŋina yöbu a mo twatwane twatwa nyu.

Twatwa na kawirak lorok puök

³⁶ A kulu ŋutu logon Mose a son i wiŋa na lu jur, logon a yitwe a tiŋdi momoret liŋ i rerenya ko lepeŋ kogwon se a joŋdya lore loron kogwon lu jur kulo,

³⁷ a kulu ŋutu lo joŋdya lore loron lo lu jur kulu iŋge twatwa ko twanti ko MATAT i komor.

³⁸ Ama Yosua ŋuro lo Nun ko Kaleba ŋuro lo Yepune yeŋe gwon jörun i kiden na kulu kawirak ti lu jur.

Tela na ŋutu ti Yisaraele Korma yu

³⁹ A Mose nyönyökökiŋdye ŋutu ti Yisaraele kilo kulyaesi liŋ, a ŋutu delyani delya parik.

⁴⁰ A se ŋine ŋien ko ’bure kobubut, a iti tojo i jur logon a merya kulya adi, Meddi, yi makulo ni, yi de tu tojo ko pirit nagoŋ MATAT a milyekin tiŋdu yi na; kogwon yi aje toroŋdya.

⁴¹ A Mose kulyani adi, Ko nyo nagoŋ ta ’beleŋgu saret lo MATAT? Ta mo ti ryö komor na ’but.

⁴² Ko tu ta ŋerot kogwon MATAT ’bayin kasu kiden, an merok kasu gwugwut ta kak.

⁴³ ŋutu ti Amalek ko ti Kanana gwon nyu kasu ŋerot, a mo totoggi ta ko baŋdujin; kogwon ta aje kö ’yu kebbu na MATAT, a MATAT mo tine gwon ko ta.

⁴⁴ A se iti i jur logon a merya ko dur, ama a saŋduk na tomoret na MATAT se ko Mose gwe a ko tu kaŋo i kiden na mera.

⁴⁵ A ŋutu ti Amalek ko ŋutu ti Kanana lo sisi ’datu i lu jur logon a merya kulo luluru kak, a iŋge te se a riköddi se tojo ko Korma.