Kenet 10 - Bibilia Buk na Ŋun nagon koti luŋu a

Burugijin logon a pödö

¹ A MATAT kulyani ko Mose adi,

² Nituŋdye pödö a burugijin murek; a do ködyö luŋgi momoret na ŋutu ko se, a do laikiŋdye toyuöji na merajin ko se.

³ A ko ŋutu kuddya se, a ti momoret na ŋutu momoruŋdye konut ni i kötumit na kemia torumet.

⁴ Ama ko se kuddya geleŋ tuŋ, a temejik logon a kusik ti alipan ti Yisaraele kulo ködyö momoruŋdye ’börik konut ni.

⁵ A ko ta kuddya kutet sörit, a merajin nagoŋ gwon i swöt lo ’yure kune ködyö yuörö yuörö.

⁶ A na kuddye ta kutet sörit daŋ tomurek nu, a merajin nagoŋ gwon i swöt lo loki kune ködyö yuörö yuörö. Se ködyö kuddya sörit kogwon yuörö nase.

⁷ Ama na luŋgi ta ŋutu i momo-ruŋdya i pirit na geleŋ nu, a ta ködyö kuddye kuddya, ama a ta ködyö tine kuddya kutet sörit.

⁸ A ŋwajik ti Arona logon a koanejin kulo ködyö kuddye kilo burugijin. A kilo burugijin ködyö gwe kasu ŋupi a saret lo wurö i nyakwariat kasu.

⁹ A nagoŋ ta mo tu i mörö kasu i jur ko merok logon sasaŋdu ta kulo nu, a ta ködyö kuddye kutet sörit ko burugijin, anyen MATAT ŋun losu böŋö yeyeju ta, a ta mo lwököni lwökö i kaŋisak kasu.

¹⁰ Köti i lor lyöŋit losu, ko i roriot kasu lo wulwe, ko i suluesi ti yapala kasu, a ta ködyö kuddye burugijin na wukiŋdye ta rubaŋgajin kasu lo ’yu ’yura ’buluŋ, ko na ’duŋge ta rubaŋgajin kasu ti taliŋ nu; a se mo toyiyikiŋdye Ŋun losu kulya kasu: nan logon a MATAT ŋun losu.

Ŋutu ti Yisaraele a yuörö kaŋo i yöbu na Sinai

¹¹ A i kiŋa tomurek, i perok merya murek ti yapa tomurek, a luru wusajine ki i loki na kemia na ŋurupö tökoresi,

¹² a ŋutu ti Yisaraele ŋiörö ŋiörö temba i jölö nase i yöbu na Sinai; a luru gwo ’de i yöbu na Paran.

¹³ A se ŋiörö i daŋ togeleŋ i saret lo MATAT ko Mose i kutuk.

¹⁴ A beret na mera na ŋutu ti Yuda yuörö ŋerot a togeleŋ gwoso i teŋon kase; a Nasona ŋuro lo Aminadaba gwe a matat lo teŋ nase.

¹⁵ A Netanele ŋuro lo Suar gwe a matat lo teŋ na kötumit na ŋutu ti Yisakar.

¹⁶ A Eliaba ŋuro lo Kelon gwe a matat lo teŋ na kötumit na ŋutu ti Jebulun.

¹⁷ A nagoŋ kemia aje laka nu, a ŋutu ti Gereson ko ŋutu ti Merari logon a ka ’dokök ti nu kemia kulo ŋiörö ŋiörö.

¹⁸ A beret na mera na Rubena yuörö yuörö gwoso i teŋon kase; a Elisur ŋuro lo Sedeyur gwe a matat lo teŋ nase.

¹⁹ A Salumiele ŋuro lo Surisadai gwe a matat lo teŋ na kötumit na ŋutu ti Simeona.

²⁰ A Elayasap ŋuro lo Ruele gwe a matat lo teŋ na kötumit na ŋutu ti Gada.

²¹ A ŋutu ti Kowat yuörö yuörö ’doggu ŋo nake na rurwan, a kemia iŋge togwi ’diki a kokwe na ’dur nase nyu.

²² A beret na mera na ŋutu ti Epuraima yuörö yuörö gwoso i teŋon kase; a Elisama ŋuro lo Amiuda gwe a matat lo teŋ nase.

²³ A Gamaliele ŋuro lo Pedasur gwe a matat lo teŋ na kötumit na ŋutu ti Manase.

²⁴ A Abidan ŋuro lo Gideoni gwe a matat lo teŋ na kötumit na ŋutu ti Benyamina.

²⁵ A beret na mera na ŋutu ti Dan logon a katutunak ti mukök na merajin liŋ kulo, yuörö yuörö gwoso i teŋon kase; a Akiyejer ŋuro lo Amisadai gwe a matat lo teŋ nase.

²⁶ A Pagiele ŋuro lo Okran gwe a matat lo teŋ na kötumit na ŋutu ti Aser.

²⁷ A Akira ŋuro lo Enan gwe a matat lo teŋ na kötumit na ŋutu ti Napatali.

²⁸ A ŋiörö na ŋutu ti Yisaraele gwoso i teŋon kase gwe sona, a se yuörö yuörö.

²⁹ A Mose kulyani ko Obaba ŋuro lo Ruele, ŋuto lo Midiyan, ŋogwo lonyit adi, Yi kulo yuörö tojo ko nu pirit nagoŋ MATAT a jambu kulya kanyit adi nye mo titin yi na; moraddi koyi, a yi mo konakiŋdye do ’bura; kogwon MATAT a jambu ŋo na ’but i kulya ti Yisaraele.

³⁰ A Obaba waddi lepeŋ adi, Nan ti tu; nan lo tu köyö i jur ko i ŋutu kwe.

³¹ A Mose mo ’yi lepeŋ adi, Ko kölökin yi böŋö, kogwon köti do deden koyi ködyö ’beggu mera ada i yöbu, a do de gwe a konyen kao.

³² A mo gwe sona adi ko do a moraddu koyi i pirit na geleŋ, nyena a ŋo liŋ na ’but nagoŋ MATAT mo kökonakin yi kune a yi mo konakiŋdye do köti.

³³ Nyena a se yuörö koŋa i mere lo MATAT i jölö na perok musala; a saŋduk na tomoret na MATAT aje joŋa kase ŋerot i jölö na perok musala, i galakiŋdya na se pirit yukaet.

³⁴ a luru lo MATAT gwe kase loki i tuparan na ŋiöddi se i mera nu.

³⁵ A ko gwe sona, na toŋiöddi se saŋduk nu, a Mose kulyani adi, Dine ki pon MATAT, ko ti kaŋisak kulök toreani torea; ko ti kamanak kulök wöki wökön konut i komor.

³⁶ A nagoŋ saŋduk a toyuka nu, a nye kulyani adi, Pon MATAT, yitwene i ŋutu ti Yisaraele alipan ti alipan.