Katokuönit 1 - Bibilia Buk na Ŋun nagon koti luŋu a

Ŋo liŋ a köpuröt kana

¹ Kulo a kulyaesi ti Katokuönit, ŋuro lo Dawidi, logon a mor Yerusalema yu.

² A Katokuönit kulyani adi, Kulya liŋ a köpuröt kana, liŋ a köpuröt kana! Liŋ a ŋo kana.

³ Ŋuto ryeju ’bulit a nyo i kitajin kanyit liŋ nagon nye a kitari i kak ni?

⁴ Nyakwariat twatwa a kulye yuyuŋwe, ama kak yeyeŋon ŋupi.

⁵ Kolor nyenyerun a ’dorone ’doro, a rurumaddi i pirit na nyerundyenye nu.

⁶ Kobuŋot wukoddu i swot lo loki, a loraddi i swot lo lobot; kobuŋot wukoddu loloraddu a yitwene i pirit na suluje nye na.

⁷ Karya liŋ ’buköddu i tor, ama a tor tine jore; a karya yitöni i piriton nagon se ’dukun kata anyen suluja ’dokon koti.

⁸ Ŋo liŋ a daraesi; ŋulo ’bayin logon bubulo jambu se liŋ; konyen ti yimönö meddya kode swo i yiŋga.

⁹ Ŋo nagon ’beron gwon kata na mo gwögwön, ŋo nagon koju a kona na mo kokona koti; a nene ŋo gwe ’bayin nagon a ludukotyo nagon kitarikin i kak ni.

¹⁰ Nene ŋo kata le nagon kukulyarikin adi, Meddi, na a ludukotyo? ’Bayin, na ŋo koju ’beron kata i ŋerot nagon yi a ko nyuŋ yuŋwe nu.

¹¹ ŋutu ti na diŋit ti bulo yeyeju ŋo ti ’beron, a nyakwariat kase molu tine yeyeju se koti.

Ŋo na denun katokuonit

¹² Nan Katokuönit a mor lo Yisaraele Yerusalema yu.

¹³ A toili liŋ gwe a lokoŋ i ga ’yu ko i ryöundyo kaŋo ŋo liŋ nagon aje kona i na kak kune, ŋina gwon a dara na mugun nagon ŋun aje tikin ŋutu i kita na.

¹⁴ Nan aje met kitajin liŋ nagon kitarikin i kak ni; meddi se liŋ a köpuröt kana, ko a köbuŋöt logon ti bulö moka.

¹⁵ Ŋo nagon a nakwölöŋ ti bulö ririki gwogwo, ŋo nagon ’bayin ti bulö kena.

¹⁶ A nan kulyani ko mugun adi, Nan aje ryeju koŋon duma parik a lwöŋ na ŋutu liŋ logon a kasarak ti Yerusalema köyö ŋerot; a toili liŋ iŋge diniki koŋon parik se ko kurundyö na kulya.

¹⁷ A nan tindi töili liŋ liŋ i dendya na koŋon ko i dendya na tumalyan se ko tu ’böno. A nan iŋge met adi kine ŋo köti a köbuoöt logon ti bulö moka.

¹⁸ Kogwon koŋon duma parik jondya durwe duma parik, Ŋuto logon ’ya ’yu dendya lo, lepeŋ ’ya ’yu delya.