Jakaria 8 - Bibilia Buk na Ŋun nagon koti luŋu a

MATAT kulya adi Yerusalema mo gwon gwoso na koju nu

¹ A kulyaet lo MATAT lo kurumi poki koyo adi,

² Nan MATAT lo kurumi lo kulya adi, Toili lio mimien bia parik ko Siona, a iŋge mien ko lepeŋ ko delya a duma parik.

³ A nan MATAT kulyani sona adi, Nan mo yito Siona, a mo si ’dani i kiden na Yerusalema, a Yerusalema mo luŋuni a köji na to ’di-ri, a mere lio lo MATAT lo kurumi mo luŋuni a mere loke lo rurwan.

⁴ A nan MATAT lo kurumi kulyani adi, nutu muduŋin ko lulyan ko nawate mo koti sisi ’datu i kikolin ti Yerusalema, ŋutu liŋ geleŋ geleŋ juta ko turya kogwon tomodoŋan nase.

⁵ A kikolin ti nu köji mo jorene jore ko ŋwajik lulyan ko nawate logon bibiryetu i kikolin kanyit.

⁶ A nan MATAT lo kurumi kulyani sona adi, Ma ’di ko pitono ti kulo ŋutu a met kine ŋo a sörösi i kilo perok, ama se ’bayin a ŋo sörösi köyö. Kilo a kulyaesi kwe ti MATAT lo kurumi.

⁷ A nan MATAT lo kurumi kulyani sona adi, Mete, nan mo lwölwökun ŋutu kwe kaŋo i jur lo swöt lo ’yure ko i jur lo swöt lo tokotyaŋ;

⁸ a nan mo joŋdi se, a se mo gwolore i kiden na Yerusalema; a se mo gwe a ŋutu kwe a nan mo gwe a ŋun lose i to ’diri ko i löti lo rigwo.

⁹ A nan MATAT lo kurumi kulyani adi, Ta kilo ŋutu, ta ŋutu logon gwon i yiŋga na kilo kulyaesi i kutusen ti nebijin i kilo perok, i diŋit na nyökörikin ’bokarikin togwi ’diesi ti kadi nio na MATAT lo kurumi anyen kadi boŋö ’du ’duko nu, ti könisi kasu gwe a iŋgo.

¹⁰ Kogwon a kokwe na kilu perok ŋutu köju a ko ropaki i kita, kode toro ’bo kase a ko ropaki i kita, köti a taliŋ gwe ’bayin nagon ŋutu woro abur kogwon kulya ti merok; kogwon nan a tiŋdu ŋutu liŋ i ŋisa ko ’börik.

¹¹ Ama a nan MATAT lo kurumi kulyani adi, Soŋinana nan mo ti konakiŋdya pitönö ti kilo ŋutu gwoso na köju nu.

¹² A taliŋ ko kulya na ’but mo weyani weya; a ködini lo binyo mo rade ludweki kanyit, a kak mo rade radan, a ki mo lilimbe lilimba; a nan mo tiŋdi pitönö ti kilo ŋutu i ruddya na kine ŋo liŋ.

¹³ Do kötumit na Yuda ko na Yisaraele, kine kulya mo gwon sona adi, gwoso nagon ta aje gwon a tojowet i kiden na jurön adi ta a lömö nu, nyena a nan mo lwöggi ta, a ta mo ’dinyani a lo ’boria. Ko kujönö ta, ama ti könisi kasu gwe a iŋgo.

¹⁴ A nan MATAT lo kurumi kulyani adi, Kilo a kulyaesi kwe ti MATAT lo kurumi adi, Komunyi koju a towoŋa nan, a nan iŋge yeyeju konakiŋdya ta arabat, a nan gwe a ko löpuggö,

¹⁵ ama i kilo perok nan aje yeyeju konakiŋdya Yerusalema se ko kötumit na Yuda ’bura; ko kujönö ta.

¹⁶ Sekine ŋo nagon ta ködyö kökon, kweja adi, Tambi ta kulya nagon a gwak kasu kiden, ko ’duŋge ta gwogwo ko ’duŋet na taliŋ kasu i rinö,

¹⁷ an ta ko yeyeju ta kulya narok kasu i töilyet i kiden nasu, an ta ko nyaŋu ta milye logon a wuya kana, kogwon nan maman kine ŋo liŋ, nan MATAT lo kulya.

¹⁸ A kulyaet lo MATAT lo kurumi poki köyö adi,

¹⁹ MATAT lo kurumi lo kulya sona adi, Diŋit minyet na yapa toiŋwan, ko na yapa tomukanat, ko na yapa toburyo, ko na yapa topuök mo gwe a diŋitan lyöŋesi ko nyonyolarikin ko a roriot lo ’but i kötumit na Yuda; nyena-gon nyare ta nyar tugwakan ko taliŋ.

²⁰ MATAT lo kurumi lo kulya sona adi, Kulye gweyajin ti ŋutu köti mo popo, ma ’di ŋutu ti köjinö jore;

²¹ a ŋutu ti nene köji mo iti i nene, adi, Ti yi iti ta ’de ’de i muluŋdyö na ’busanna MATAT, ko i ga ’yu na MATAT lo kurumi; nan ko mugun nio lo iti tu.

²² A gweyajin jore ti ŋutu se ko jurön iŋgo mo iti Yerusalema i ga ’yu na MATAT lo kurumi, ko i muluŋdyö na ’busan nanyit.

²³ MATAT lo kurumi lo kulya sona adi, I kilu perok a ŋutu puök ti kutusen liŋ ti gweyajin ka ’de ka ’de mo morgi boŋgo na Yudayakityo adi, Ti yi moraddi ko ta, kogwon yi a yiŋ adi ŋun gwon ko ta.