Jakaria 6 - Bibilia Buk na Ŋun nagon koti luŋu a

Arabiajin iŋwan

¹ A nan koti ’bi ’yi konyen kwe ki a meddi arabiajin iŋwan lo jijiko pukun kaŋo i kwake na merya kulye murek; a kulu merya gwe a mölwö.

² A arabia togeleŋ jikoni ko kusanjin nator, a tomurek jikoni ko kusanjin narwök,

³ a tomusala jikoni ko kusanjin nakwe, a toiŋwan jikoni ko kusanjin nanyete.

⁴ A nan pipije malaikatat logon jambu ko nan lo adi, Kine ŋo a nyo pon matat?

⁵ A malaikatat waddi nan adi, Kine ŋo a köbuŋötön iŋwan ti kak, lepeŋat ’dek tu kaŋo i mukök nagon se a kwe-kiŋdya ’borik ko MATAT lo kak ’bukuluŋ i komor nu.

⁶ A arabia lo jiko ko kusanjin narwök lo iti i jur lo lobot, a lo jiko ko kusanjin nakwe lo iti i jur lo tokotyaŋ, a lo jiko ko kusanjin nanyete lo iti i jur lo loki.

⁷ A kusanjin gwe ko pusok i tu kaŋo a se ga ’yi tu i woŋu na kak. A nye kulyani adi, Iti ta i woŋu na kak. A se iŋge wor kak.

⁸ A nye maraŋgi a kulyani ko nan adi, Mete, se logon a tu i jur lo lobot kulo aje tiŋdu Mulökötyo lio i si ’da ’bura i jur lo lobot.

Yosua a tiki Iŋguya a kweyet

⁹ A kulyaet lo MATAT poki koyo adi,

¹⁰ Wuji nene ŋo ko Keledai, ko Tobia, ko Yedaya logon koju a joŋa i to ’dupien, logon a yitwe i Babela kilo; ko iti i lu lor lo geleŋ lu tojo ko kadi na Yosia ŋuro lo Jepania.

¹¹ Wuji podo ko dakap ko lepeŋat, ko teteŋdi Iŋguya, ko suki-ŋdye lepeŋ ko Yosua koane duma i kwe, logon a ŋuro lo Yosadak;

¹² taki lepeŋ adi, MATAT lo kurumi lo kulya sona adi, Mete ŋilo ŋuto logon karin kanyit a Kene lo; nye mo wiwilun ki kanyit i pirit, a nye mo ’duŋge kadi na MATAT.

¹³ ŋilo a nye logon mo ’duggo kadi na MATAT, a mo ’depaddi minyo lo tumatyan, a mo si ’dani kanyit i si ’daet a matat. A koane mo gwe kanyit i si ’daet nyona, a taliŋ mo gwe kase kiden se liŋ murek.

¹⁴ A ŋilo Iŋguya mo gwe i kadi na MATAT a toyeyeet lo Keledai, ko Tobia, ko Yedaya, se ko Yosia ŋuro lo Jepania.

¹⁵ A ŋutu lo gwon pajo kulu mo poŋdi po, a mo morakiŋdye i ’duggo na kadi na MATAT; a ta mo kuruŋdye adi MATAT lo kurumi aje sunyuŋdyo nan kasu ni. A kine kulya mo gwe sona ko ta kodyo yiyiŋ gworo lo MATAT ŋun losu ’bura.