Jakaria 4 - Bibilia Buk na Ŋun nagon koti luŋu a

Gwo ’diet lo lombojin ko kaden ti jeitun

¹ A malaikatat logon a jambu ko nan lo yitwene köyö ni a gije nan, gwoso ŋuto logon a topurwe i doto.

² A nye pipije nan adi, Do meddya nyo? A nan waddi adi, Nan meddya gwo ’diet lo lombojin logon a dakap, ko toŋgwo lo welet ko ŋilo gwo ’diet i kwe, a lombojin buryo gwe kanyit loki, ko kanapiajin buryo a ti lombojin liŋ geleŋ geleŋ logwon kanyit loki.

³ A kaden mu-rek ti jeitun gwe ko ŋilo gwo ’diet nyona, geleŋ i swot lo lutatan lo lu toggwo lo welet a geleŋ gwe kanyit i swot lo kadoŋe.

⁴ A nan pipije malaikatat logon jambu ko nan lo adi, Kilo a nyo pon matat?

⁵ A ŋilo malaikatat lo jambu ko nan lo pipije nan adi, Do ti den ko kine ŋo a nyo? A nan waddi adi, Nan ti den pon matat.

⁶ A nye kulyani ko nan adi, ŋilo a kulyaet lo MATAT lo jamaki Jerubabela adi, ŋutu ti te ’ya kogwon tuwalan, kode riŋit, ama te ’ya kogwon Mulökötyo lio, nan MATAT lo kurumi lo kulya.

⁷ Do a nyo, do mere duma? Do mo yiyitwe a lo ’dayat ko Jerubabela i komor. A nye mo joŋdi ŋurupit to’dutet, a se mo maraŋgi ko lepeŋ adi, Lote! Lote!

⁸ A ko gwe sona, a kulyaet lo MATAT poki koyo adi,

⁹ Jerubabela aje ’bogga togwi ’diesi ti na kadi ko konisi kanyit; a nye mo koti lo tutuŋge ko konisi kanyit. A ta mo deŋdi adi MATAT lo kurumi aje sunyun nan kasu ni.

¹⁰ Kogwon ko ŋa logon aje lauŋdya lor lo kitarikin ŋo na ’di ’dik lu, a se mo lyoŋi lyöŋon na meddi se witi na leleyo ko Jerubabela i könin nagon temarikin gorom nu. Kilo konyen buryo a ti MATAT logon woŋu kak ’bukuluŋ.

¹¹ A nan pipije lepeŋ adi, Kilo kaden murek ti jeitun a nyo logon lele gwon i lutaten ko lele i kadoŋe lo lu gwo ’diet lo lombojin?

¹² A nan nyoggi pija lepeŋ daŋ tomurek adi, Kine pilyalan murek ti kaden ti jeitun a nyo, nagon diŋo ko kanapiajin ti dakap murek logon ’bukuŋdyo welet?

¹³ A nye pipije nan adi, Do ti den ko kilo ŋo a nyo? A nan waddi adi, Nan ti den pon matat.

¹⁴ A nye kulyani adi, Kilo a ŋutu murek lo welaki a kölipönök logon gwo ’dan nyona ko MATAT lo kak ’bukuluŋ.