Jakaria 3 - Bibilia Buk na Ŋun nagon koti luŋu a

Nebi a meddya kulya ti Yosua koane duma

¹ A nye kwekiŋdye nan Yosua koane duma, logon gwo ’dan ko malaikatat lo MATAT i komor, a Sa-tani gwo ’de kanyit i könin lo lutaten i pokiŋdyo na lepeŋ.

² A MATAT kulyani ko Satani adi, Nan MATAT ririŋ do Satani! Nan MATAT logon aje wuluŋdyo Yerusalema lo ririŋ do! ŋilo ŋuto ti gwon a tukuyu na jekwe kaŋo i kimaŋ le?

³ A Yosua gwo ’de ko malaikatat i komor a jupu boŋgwat nagon a lut parik.

⁴ A malaikatat kulyani ko se logon gwo ’dan kanyit i komor kulo adi, Rusu ta boŋgwat nagon a lut parik kine kaŋo ko lepeŋ i mugun. A nye kulyani ko lepeŋ adi, Mete, nan aje tin ŋonyan inot i tu kaŋo konut i mugun, a nan de tojubbi do ko boŋgwat nake.

⁵ A nye kulyani adi, Ti lepeŋat tiŋdi ema nake kanyit i kwe. A se tiŋdi ema nake kanyit i kwe a tojubbi lepeŋ ko boŋgwat; a malaikatat lo MATAT gwo ’de nyona.

⁶ A malaikatat lo MATAT yokije Yosua adi,

⁷ MATAT lo kurumi lo kulya sona adi, Ko do kodyo mo wöro i kiko-liŋ kwe ti MATAT ko i ’debba na yokiet nio, a do mo saŋi kadi nio, a do mo tiji mariŋan kwe, a nan mo rukokiŋdye do i morakiŋdya i se logon gwo ’dan ŋini kilo.

⁸ Do Yosua koane duma, se ko julin kulok logon si ’da konut i komor kilo, boŋo yiŋge ta, kogwon ta a ŋutu logon a kweyesi ti ŋo na popo. Mete, nan mo towiluŋdya koliponit lio logon a Kene.

⁹ Kogwon nan MATAT lo kurumi lo kulya adi, Mete, ŋurupit logon nan a tikin ko Yosua i komor lu, ŋilo ŋurupit gwon ko konyen buryo, a nan mo gigirikiŋdye gigirisi kanyit, a nan mo ’dumaddi gonyan na lu jur i lor geleŋ.

¹⁰ Nan MATAT lo kurumi lo kulya adi, I ŋilu lor a ta liŋ geleŋ geleŋ mo luŋgi maratejin kasu anyen ta ko saka i ri lo ködini lo binyo mukok ko i ri lo ki ’bi mukok.