Jakaria 2 - Bibilia Buk na Ŋun nagon koti luŋu a

Nebi a meddya ŋuto logon ko pata temet

¹ A nan ’bi ’yi konyen kwe ki a meddi lele ŋuto logon gwon ko pata temet kanyit i könin.

² a nan pipije lepeŋ adi, Do tu da? A nye waddi nan adi, Nan tu i temba na Yerusalema, i denuŋdya na tugalaŋ nanyit se ko tojo-lan nanyit.

³ Nyena mete, a malaikatat logon jambu ko nan lo miju ŋerot, a lele malaikatat koti miju ŋerot i rum ko lepeŋ,

⁴ a kulyani ko lepeŋ adi, Woki, ko taki lu titinti adi, Yerusalema mo si ’darikin gwoso turon logon ’bak mari-ŋan, kogwon tojore na ŋutu ko na toro’bo na gwon lukata.

⁵ Kogwon MATAT lo kulya adi, Nan mo gwon kanyit a mariŋ nagon a kimaŋ, a nan mo gwe a minyo kanyit kiden.

Luŋu na ŋutu lo joga i to ’dupien

⁶ MATAT lo kulya adi, Wo! Wo! Woki ta kaŋo i jur lo lobot; kogwon nan a toreara ta kaŋo gwoso köbuŋötön iŋwan ti kak, nan MATAT lo kulya.

⁷ Wo! Ta logon si ’da Babela kulo, lwoköddi ta ’borik tojo Siona.

⁸ A MATAT lo kurumi kulyani sona i diŋit nagon nye soŋdi nan i koŋdya na kita na kukwon i kulu gweyarijin ti ŋutu logon a ryaggu ta kulu, kogwon nye logon a ’bo ’yu ta lo aje ’bo ’yu kiden na kone lonyit lo MATAT,

⁹ adi, Mete, nan mo ’di ’diggo könin lio kase loki, a se mo poki a ryakat ti se logon aje kitakiŋdya se kulo. A ta mo deŋdi adi MATAT lo kurumi lo sunyuŋdyo nan.

¹⁰ MATAT lo kulya adi, Ta ŋutu ti Siona, yoloni ta ko lyoŋi ta lyoŋon; kogwon mete, nan popo a mo si ’dani kasu kiden.

¹¹ A gweyajin Jore ti ŋutu mo mora-kiŋdye ’borik ko MATAT i ŋilu lor, a mo gwe a ŋutu kanyit; a nye mo gwolore kase kiden, a ta mo deŋdi adi MATAT lo kurumi aje sunyun nan kasu ni.

¹² a MATAT mo koti joŋgi Yuda a koret na-nyit lomore i lu jur loke, a nye koti mo wuluŋdye Yerusalema.

¹³ Ta ŋutu liŋ, gwe ta adi lii ko MATAT i komor; kogwon nye aje ŋien i pirit gwiliŋit nanyit nake.