Jakaria 13 - Bibilia Buk na Ŋun nagon koti luŋu a

¹ I ŋilu lor a kötumit na Dawidi se ko nutu lo si ’da Yerusalema kulo mo ’bokakine kidi lalaet lo toronjin ko tolutan.

² Nan MATAT lo kurumi lo kulya adi, I ŋilu lor nan mo seyara karin ti nyömu-ejin logon a punyen kaŋo i lo jur, anyen se gwon ti yeyeŋ köti; a nan köti mo toyuöddi nebijin se ko mulökotyo lo tolutan kaŋo i lo jur.

³ A ko kodyö lele ŋuto a pukun köti gwoso nebi, a monye se ko ŋote na yupuŋdyö lepeŋ na mo kulyani ko lepeŋ adi, Do mo tine gwolor köti, kogwon do a jambu ’burönö i karin ti MATAT; a monye ko ŋote na yupuŋdyö lepeŋ na mo rembi lepeŋ na keŋ nye nu.

⁴ A mo gwe sona i ŋilu lor, a nebijin liŋ mo gwe ko yu na kusik i kulya ti keju nanyit na po nagon nye a met kanyit i töili kune; a nye mo tine rusukiŋdyö boŋgo nagon a kupir i mumulugga,

⁵ ama a nye mo kulyani adi, Nan ti gwon a nebi, ama nan a ka-kurunit, kogwon nan a tiki melesen a lomore nio suluja i toteton nio.

⁶ A ko lele ŋuto a pija lepeŋ adi, Kine a nyo konut i ki ’diŋ gwoso ’dikasin? A nye mo waddi adi, Kine a ’dikasin nagon nan a wu i kadi na julin kwe.

Ŋuto logon yuggu yidin ti MATAT lo a boŋoji

⁷ Nan MATAT lo kurumi lo kulya adi, Do baŋdu, piki ki i mörö ko kayu-kunit lio ko i marate lio. Gwutöki ŋilo kayukunit kak, a yidin kwe mo reki rekin; a nan mo gwuddye kayukuk lo ’di ’dik.

⁸ A mo gwe sona, nan MATAT lo kulya adi, Swötön murek ti musala mo ’duŋö-ji kaŋo a mo twatwane twatwa, a swöt geleŋ na musala mo kölöki-ne jörun.

⁹ A nan mo gwurusökiŋdye ŋina tupet i kimaŋ, a mo ŋoŋoji se gwoso ŋuto lo ŋoŋoaddu korodo kaŋo i pödö, a nan mo tembi se gwoso na temari dakap na. A se mo luluŋgi karin kwe, a nan mo waddi se adi, Se a nutu kwe; a se mo kulyani adi, MATAT a ŋuri likaŋ.