Jakaria 12 - Bibilia Buk na Ŋun nagon koti luŋu a

Yerusalema mo lwölwöko

¹ Nebi a ’do ’yu kulyaet lo MATAT i kulya ti Yisaraele adi, Nan MATAT lo gwon i riöddu na ’dikolo, a sukiŋdye pipilesi ti kak a gweuŋdye mulökötyo lo ŋuto kanyit i mugun lo, nan lo kulya adi,

² Mete, nan yöŋö koŋdya Yerusalema a diköri nagon tiŋdu gweyajin liŋ ti ŋutu logon gwon kanyit i mara kilo i luŋtö ko meran; a nye mo gwe a na Yuda köti i diŋit tumet na Yerusalema.

³ A mo gwe sona i ŋilu lor a jurön liŋ ti kak mo momora-kiŋdye i mörö ko lepeŋ ni, a nan mo koŋdi Yerusalema a ŋurupit loyödik i gweyajin liŋ ti ŋutu; a ŋutu logon ’dukuŋdyö lepeŋ ki kulo mo ’duŋge ’duŋgo kase i goliŋ.

⁴ A nan MATAT kulyani adi, I ŋilu lor nan mo gwugwut kusanjin liŋ ko kujönö, a gwuddye kajo-ŋak kase ko tumalyan, ama a nan mo pakiŋdye konyen kwe i kötumit na Yuda, a nan mo gwuddye kusanjin liŋ ti gweyajin ti ŋutu ko tomo ’dokenon.

⁵ A kotumiton ti Yuda mo tokulyaki ko ’börik adi, ŋutu lo si ’da Yerusalema gwon ko riŋit nagon po köyö nan MATAT lo kurumi logon a ŋun lose.

⁶ A i ŋilu lor a nan mo tiŋdi ’duŋesi ti kötumit na Yuda i gwon gwoso ta ’dok na gwon ko kimaŋ i kiden na kaden, ko gwoso kalyati na tutule i kiden na kusik ti ’bolot; a se mo nyöörö gweyajin liŋ ti ŋutu lo gwon kase i mara kulo i swot lo lutaten ko i swöt lo kadoŋe, ama a ŋutu ti Yerusalema mo yeŋe gwon Yerusalema i köji nase.

⁷ A nan MATAT mo lwöggi kadijik ti Yuda a kokwe, an minyo lo kötumit na Dawidi ko lo ŋutu lo si ’da Yerusalema kulo ko lwöŋgu minyo lo Yuda.

⁸ I ŋilu lor a nan MATAT mo gaji ŋutu lo si ’da Yerusalema; a i ŋilu lor a ŋutu kase lomunyak mo gwe gwoso Dawidi, a kirut kötumit na Dawidi mo gwe gwoso nan ŋun kase ŋerot, gwoso malaikatat liŋ lo MATAT.

⁹ A mo gwe sona i ŋilu lor adi nikao mo a naron ko gweyajin liŋ ti ŋutu logon pokin i mörö ko Yerusalema.

¹⁰ A nan mo ’bukökiŋdye mulökotyo lo ’busan ko lo momolesi i kötumit na Dawidi ko ŋutu lo si ’da Yerusalema kulo, anyen na meddi se nye logon se a rem lo, a se mo gwine lepeŋ gwoso ŋuto logon gwi nuro lonyit lo geleŋ, a mo gwine parik tolikisien kanyit loki, gwoso ŋuto logon gwi ŋuro lonyit kayu.

¹¹ A i ŋilu lor gwien duma mo gwe Yerusalema gwoso gwien na gwiörikin Adada-rimon i ’dar na Megido.

¹² A ŋilu jur mo gwine gwien, midijik liŋ geleŋ geleŋ gwi ’börik; kweja adi mede na kötumit na Dawidi gwi mugun, ko wate kase gwi ’börik; ko mede na kötumit na Natana gwi mugun, ko wate kase gwi ’börik;

¹³ ko mede na kötumit na Lewi gwi mugun, ko wate kase gwi ’borik; ko mede na nutu ti Simei gwi mugun, ko wate kase gwi ’börik;

¹⁴ se ko midijik liŋ geleŋ geleŋ na pituŋdyö kune gwi ’börik, ko wate kase gwi ’borik.