Jakaria 10 - Bibilia Buk na Ŋun nagon koti luŋu a

MATAT lwöggu ŋutu kanyit

¹ Muluŋdye ta kudu ko MATAT i diŋit na kiser. MATAT lo tetenakiŋdya meme ’dek-ta na ki, a nye lo tiŋdi ŋutu kudu duma, se ko döru lo mu ’diŋ i ŋutu liŋ.

² Kogwon nyömuejin ti mede tuggö ŋo kana, a ’bunuk waŋdi kulya ’burönö; a karudwök nyönyöggi rudweesi nagon a wuya, a se tiŋdi togolesi nagon a wuya kana. Nyenagon a kulo ŋutu wirte gwoso yidin; a se iŋge tomie kogwon se ’bak kayukunit.

³ A woran na MATAT tuleki i kayukuk, a nye mo riŋge lopijoki; a MATAT lo kurumi ’yö ’yi teŋ nanyit nagon a kötumit na Yuda ko kulya na ’but, a mo tiŋdi se i gwon gwoso kusan nanyit nagon ko riŋit möriet i gor.

⁴ A ŋurupit lo goŋet mo puku kase, ko kaluti na kemia, ko daŋ moriet, se ko kasarak liŋ.

⁵ A se mo gwe gwoso ŋutu walan i pirit na geleŋ i mörö, logon ryokakiŋdya merok kase kak i wo ’do ’do ti kikolin; a se mo möröni mörö kogwon MATAT gwon ko se, a se mo te ’yi ŋutu lo wörö ko kusanjin.

⁶ A nan mo togo ’yi kötumit na Yuda, a nan mo tiŋdi kötumit na Yosepa a katelak. A nan mo toyituŋdye se kogwon nan a won konyen ko se, a se mo gwe gwoso nagon nan a ko pa se; kogwon nan a MATAT ŋun lose a nan mo yiŋge se.

⁷ A ŋutu ti Epuraima mo gwe gwoso walan dumalak, a töilyet kase mo lyöŋi lyöŋön gwoso nagon se a waŋgu binyo. A ŋwajik kase mo meddi meddya a lyöŋi lyöŋön, a töilyet kase mo nyolani nyola ko nan MATAT.

⁸ A nan mo kukuwituŋdye se a mo momoruŋdye se i pirit na geleŋ, kogwon nan a lwökuŋdyö se, a se yitökine i pirit gwoso na köju nu.

⁹ Ma ’di nagon nan a toreara se i kiden na gweyajin ti ŋutu, a se mo yiyiuŋdye nan i jurön ti pajo, a se mo wowoji ŋwajik kase, a mo yitwene yitwe.

¹⁰ A nan mo nyökuŋdye se bot i jur lo Ejipeto yu, a momoruŋdye se Asura yu; a nan mo joŋdi se tojo i jur lo Gilada ko lo Libanon, a kinu piritön mo gwe a nagusulak kase.

¹¹ A delyaesi mo poki i kare Perat, a nan mo gwuddye yalajin kanyit, a piritön nagululök ti Supiri mo lilikara ki. A bu ’ya na Asura na kwe mo nyökwene kak, a ture lo Ejipeto lo tumatyan mo liki likin.

¹² A nan MATAT mo togo ’yi se köyö i mugun, a se mo wöröni i karin kwe. Kilo a kulyaesi kwe ti MATAT.