Esetere 1 - Bibilia Buk na Ŋun nagon koti luŋu a

Mor Baseti a lauŋdya saret lo mor Akasuwero

¹ Kune ŋo a kona i diŋit na gwoŋdi Akasuwero koju nu. Ŋilu Akasuwero a tumatyan suluja i jur lo Iŋdia tojo ko jur lo Etiopia; lepeŋ a saŋu modoriajin mia geleŋ ko merya murek wot buryo.

² A i kilu perok Akasuwero si ’da a mor i pirit na mariŋ nago na titiyu na gwon Susa nu.

³ A i kiŋa tomusala lo tumatyan nanyit, a nye teteŋdi rorwe a lo temejik se ko kakitak liŋ ti miri nanyit,

⁴ a nye koti luŋgi dumalak ti kamorok ti jur lo Parasa ko Madai se ko ŋutu lokukwon ko kasarak ti modoriajin, a nye kwekiŋdye se tukworien na tomoran nanyit na bubula, ko minyo lokwekwelen lo tumatyan nanyit. Kine kulya a joŋga diŋit a najo, kweja adi perok mia geleŋ ko merya budok.

⁵ A i mukok na kilu perok, a mor tiŋdi rorwe a lo ŋutu liŋ lokukwon se ko ŋuti kana lo gwon Susa i lukata na mariŋ nago. ŋilo rorwe a kona perok buryo i melesen na koturön i lukata na ’baŋ lo mor.

⁶ A ŋinu pirit iŋge gomo ko boŋgwat na leleyo i togwi ’diesi ti ŋurupo nakwe nakwekwelen. Kinu boŋgwat a gweya ko waratat nakwe ko naŋem, a iŋge toraki i kulye togwi ’diesi logon ko re nagon a pödö. Patala toresi kase a tetena ko boŋgwat nakwe ko na ’bule. A dotoesi nagon a tetena ko dakaŋ ko pödö kune koti gwe nyu i pirit na linyo ko ŋurupo lo ’di ’dik ti gweyarijin ka ’de ka ’de lokwekwelen.

⁷ A lepeŋat jakine yawa i matesi nagon a dakaŋ. Kine matesi liŋ a tetena ka ’de ka ’de. A mor wukiŋdye se binyo kanyit abur ’bak temet.

⁸ A nu mata iŋge kona gwoso i saret, a lele ŋuto gwe ’bayin logon a ri ’diki i möju ko riŋit, kogwon mor a sarakiŋdya kölipönök ti ’baŋ lonyit lo mor kulo anyen se tiŋdu ŋutu liŋ gwoso i ’dekesi kase.

⁹ A Baseti nagon a nakwan na mor koti iŋge koŋdya rorwe a lo ŋutu wate na gwon i ’baŋ lo mor Akasuwero.

¹⁰ A i lor toburyo lo nilu rorwe, a toili lo mor iŋge lyoŋon parik na meŋi nye nu, a lepeŋ luŋgi ko Meyuman, ko Bijeta, ko Karbona, ko Bigeta, ko Abageta, ko Jetar, ko Karkasa, kilu a ŋutu buryo logon a kona a ’baŋin logon diŋitan liŋ gwon ko mor i komor.

¹¹ A lepeŋ takiŋdye se anyen joŋdya Baseti nakwan nanyit kanyit i komor, a jupu Iŋguya lo tomoran kanyit i kwe, anyen ko kwekiŋdya ŋutu kanyit se ko temejik ti miri kwelen nanyit, kogwon lepeŋ kwekwelen parik.

¹² Ama a mor Baseti iŋge renya saret lo lalet lonyit gwoso na takiŋdye kilu kölipönök buryo logon a kona a ’baŋin nu. Nyena a mor Akasuwero iŋge woran parik a tömönik.

¹³ A kirut mor luŋgi ŋutu lokoŋ logon deden kulya ti ’beron, kogwon ŋilo a keri lo mor i yiŋga na jujuwesi ti ŋutu logon a den saresi ko ’duŋgo na putet.

¹⁴ Kilo yumiat kanyit a ko Karsena, ko Setar, ko Ademata, ko Tarasisa, ko Merese, ko Marsena ko Memukan. Kilo ŋutu buryo a temejik ti miri lo jur lo Parasa se ko Madai logon bubulö ’dur ko mor i komor, ko a ŋutu ti kokwe ti tumatyan nanyit.

¹⁵ A nye pipije lepeŋat adi, Ko ködyo bubulö i saret, ti mor Baseti konakine nyo, kogwon lepeŋ a ko yiŋ saret lio lo mor logon kölipönök kwe a takin lepeŋ lo?

¹⁶ A kirut Memukan kulyani i komŋo na mor ko temejik ti miri adi, Mor Baseti a ko toroŋdya ko mor ka ’de, ama a toroŋdya ko temejik ti miri liŋ se ko ŋutu liŋ lo gwon i modoriajin liŋ ti mor Akasuwero.

¹⁷ Kogwon ŋina ŋo nagon nakwan na mor a kon na mo denani dena ko ŋutu wate liŋ, a se mo lauŋdye lyan kase, a lepeŋat molu kulyani adi, Mor Akasuwero a tiŋdu saret anyen mor Baseti jwe kanyit i komor ama a lepeŋ gwe a ko po.

¹⁸ Nyena ma ’di i lo lor a ŋutu wate ti jur lo Parasa se ko Madai de ko yiŋge ŋina ŋo nagon nakwan na mor aje kon na, a lepeŋat molu nyönyökökiŋdye temejik liŋ ti miri lo mor kine kulya, a kirut lauŋdya ko woresi mo gwe jore parik.

¹⁹ Ko ködyö a ’deket inot pon mor, a ti do tiŋdi saret lo tumatyan, ko ti ŋilo saret wurökine kak i kiden na saresi ti jur lo Parasa se ko Madai anyen gwon ti bulö löpukö, adi ti Baseti gwe ti po konut i komor köti kwöŋ pon mor Akasuwero; ko ti mor tiŋdi tomoran na Baseti ko nene ŋuto na ’but nagon lwölwöŋ lepeŋ.

²⁰ Nyena ti ŋilo saret lo mor laikine i swötön liŋ ti tumatyan nanyit duma, a kirut ŋutu wate liŋ mo bu ’ye lyan kase, kode a ŋutu lokukwön kode se a ŋutu kana.

²¹ A kine jujuwesi iŋge tulyöŋ mor se ko temejik ti miri, a mor koŋdi gwoso na jujuje Memukan nu;

²² a nye soŋdi waragalan i mödöriajin liŋ ti tumatyan nanyit. Kine waragalan a wuröki i wuresi ti kunu modoriajin liŋ ka ’de ka ’de, ko i kutusen ti ŋutu kase liŋ ka ’de ka ’de, adi ti ŋuto lalet gwe a kwe lo ’baŋ nanyit, ko ti nye jamaki se kine kulya i kutuk nase.