Epeso 5 - Bibilia Buk na Ŋun nagon koti luŋu a

Wöröni ta gwoso ŋutu ti parara

¹ Nyenagon mirakiŋdye ta Ŋun kogwon ta a ŋwajik kanyit lo nyanyara.

² Wöröni ta i nyaŋu, gwoso nagon Kristo aje nyaŋi yi na, a wukindye mugun nanyit ko Ŋun a ’doket ko a rubaŋga lo mor paleleŋ kogwon kulya kaŋ.

³ Ta ködyö kwöŋ ti jambu kulya ti towutön, ko ti konesi narok ka ’de ka ’de nagon toyujö kusik ti ŋutu se ko goma, kogwon kine kulya ti jukin ŋutu ti Ŋun i jambu na se.

⁴ Köti ko jambu ta jamesi ti yu na kwe, kode jamesi logon a wuya kana, kode kwekweni nagon a ’dö ’doyit, kogwon kine kulya ti jukin jama, ama kölumbö tiŋdi ta Ŋun tinate.

⁵ Dene ta den ’bura adi, ŋuto logon a kalupe, kode logon koŋdya ŋo narok nagon toyujö kusik ti ŋutu, kode lo goma ŋo gwoso nye a ŋun lonyit, ŋuto gwoso ŋilo ti bulö wuju nene ŋo i Tumatyan na Kristo se ko Ŋun.

⁶ Ti lele ŋuto gwe ti mumulugga ta ko kulyaesi logon ’bak ’bulit. Kogwon i kine kulya, a woran na ŋun poki i ŋutu logon a renya twöju lepeŋ kilo.

⁷ Nyenagon ko morakiŋdya ta i ŋutu gwoso kilo.

⁸ Kogwon ta köju gwon a ŋutu ti mudwe, ama soŋinana ta gwe a ŋutu ti parara ko Matat likaŋ i mugun. Wöröni ta gwoso ŋutu ti parara.

⁹ Kogwon parara radan konesi nagon a na ’but, ko a ti löti lo rigwo ko a ti to ’diri.

¹⁰ Möŋi ta denuŋdya kaŋo ko nyo na tulyöŋgu Matat likaŋ.

¹¹ Ko morakiŋdya ta i ŋutu logon koŋdya ŋo ti mudwe nagon ti radan ludweki lo ’but kine, ama kölumbö kweyu ta kine kulya kaŋo.

¹² Kogwon ŋo na kon se a lwön kine, ma ’di ’dinya na se toyujö kusik.

¹³ Ŋo liŋ nagon parara a kweyun kaŋo memeta köke,

¹⁴ a go liŋ nagon memeta köke kune worani a parara. Ko ŋina kwe a kulyarikin adi, Do kadotonit, purwene purwe, ŋiyu kaŋo i lo twatwa kilo, a Kristo de pararakiŋdye konut loki.

¹⁵ Meddi ta ’bura ko ta gwolor ada. Gwe ta gwoso ŋutu lokoŋ ti gwon gwoso lu ’böŋ.

¹⁶ Kitari ta kitari diŋit an kasu liŋ, koŋwon kulo perok a lorok.

¹⁷ Nyenagon ko gwon ta a lu ’böŋ, ama kuru ta kurun ko ’deket na Matat likaŋ a nyo.

¹⁸ Ko meran ta ko yawa koŋwon köŋu ŋutu. Ama kölumbö jorene ta ko Mulokötyo Loke,

¹⁹ ama tujumaki ta ko ’börik i yo ’yu na saumajin ko kölisi se ko pupuresi ti ŋun. Lyöŋi ta lyöŋön ko Matat likaŋ kasu i töilyet gwoso ŋuto lo ju ’yö tom.

²⁰ Ŋupi tiŋdi ta ŋun Monye tinate i ŋo liŋ i karin ti Matat likaŋ Yesu Kristo.

ŋutu wate ko lyan kase

²¹ Kuke ta kuk ’börik gwoso na twöji ta Kristo na.

²² Ta wate ködyö kukuk lyan kasu gwoso nagon ta ködyö konakiŋdye Matat likaŋ na,

²³ koŋwon lalet gwon a kwe lo nakwan, jojo gwoso na gwoŋdi Kristo a kwe lo kanisa, lepeŋ köti a Kalwökönit lo kanisa nagon a mugun nanyit.

²⁴ Nyena gwoso nagon kanisa a kuŋge Kristo na, ti wate agu ködyö kuŋge lyan kase i ŋo liŋ.

²⁵ Ta lyan, nyaŋi ta wate kasu gwoso nagon Kristo köti aje nyaŋi kanisa na, a nye iŋge wukin mugun i tatua koŋwon kulya kase.

²⁶ Lepeŋ a koŋdya sona anyen nye böŋö lalaju se ko pioŋ se ko kulyaet lonyit a gwe a loke,

²⁷ anyen nye böŋö kweja kanisa kanyiti komor kwekwelen ’bak nene pirit nagon a ’yota ma ’di a na ’dit, kode kiritwan, kode kunie go gwoso kine. ama anyen se boŋö gwon a loke ’bak yuyuket.

²⁸ Köti lyan ködyö nyanyar wate kase sona gwoso na nyaŋi se mugunya kase na, kogwon ŋuto lo nyaŋu nakwan nanyit lo lepeŋ nyaŋu mugun.

²⁹ Kogwon lele ŋuto ’bayin logon maŋdu mugun nanyit, ama lepeŋ wowoja nye ko rurugga nye ’bura, gwoso na konakiŋdye Kristo kanisa na,

³⁰ kogwon yi a swötön ti mugun nanyit.

³¹ Ko ŋina kwe a ŋuto lalet mo kö ’yi morye ko ŋote, a mo mori ko narakwan nanyit, a se murek mo gwe a mugun geleŋ.

³² Kilo kulyaesi a lilim duma, ama nan tökoŋu se i kulya ti Kristo se ko kanisa.

³³ Ama ta liŋ geleŋ geleŋ köti ti leŋe nyaŋi nakwan nanyit gwoso mugun nanyit, köti ti nakwan twöji lalet lonyit.