Epeso 4 - Bibilia Buk na Ŋun nagon koti luŋu a

Gwon ko töili geleŋ ko Kristo i mugun

¹ Nyenagon nan logon a rereka kogwon kulya ti Matat likaŋ lo, nan mo ’yu ta anyen ta böŋö wörö jojo i luŋit nagon a luŋuri ta na.

² Wöröni ta a lokoyokak ko toilyet lo lilik, i ŋoŋaddu taliŋ ko i tuyatakin ko ’börik i nyaŋu.

³ Mulökötyo Loke a momora ta anyen ta gwon ko töili geleŋ. Gwe ta ko pusök i gwon taliŋ ko ’börik kogwon taliŋ to ’depakiŋdya ŋutu i pirit na geleŋ.

⁴ Mugun geleŋ kata, Mulökötyo geleŋ kata, gwoso nagon Ŋun a luŋgi ta i parundya na ŋina yenet na geleŋ na;

⁵ Matat geleŋ kata, yupet geleŋ kata, batisimo geleŋ kata,

⁶ Ŋun geleŋ kata logon a Monye lo ŋutu liŋ, lepeŋ a duma lo ŋo liŋ, kikita i ŋo liŋ, a lepeŋ gwe kata i ŋo liŋ.

⁷ Ama yi liŋ geleŋ geleŋ aje ’doka, gwoso i temet na ’doggi Kristo kana na.

⁸ Nye ŋina kwe nagon köju a Tama adi, Na tiri nye ki nu, nye nyömbödu ŋutu Jore lo momoka, a nye iŋge ’dogga ŋutu ko ’dokesi.

⁹ Nyena kilo kulyaesi logon adi, Lepeŋ a tu ki kilo kweja nyo? Kweja adi a kokwe lepeŋ a po kak ni a iŋge yeŋga kak i lukata nanyit.

¹⁰ Nye logon a po kak ni lo köti a nye lo tu ki pajo lwölwoŋ ’dikolo lio, anyen nye böŋö tojoreju ŋo liŋ.

¹¹ ’Dokesi kanyit gwon sona adi, nye a tiŋdu kulye ŋutu i gwon a luyökie, kulye a nebijin, kulye a katokuök ti Loŋe Lo ’but, kulye a kayukuk ti ŋutu se ko kulye a katodinok ti Loŋe Lo ’but.

¹² Kita na kilo ŋutu gwon i tetenakiŋdya na ŋutu ti Ŋun jojo i koŋdya na kita nanyit ko i to ’duruŋdyö na mugun na Kristo ki,

¹³ tojo i ’dutet yi lio a wora a ŋo geleŋ. Gwon nikaŋ a ŋo geleŋ po kogwon yubbö nikaŋ se ko deŋdya nikaŋ na Ŋuro lo Ŋun. A kirut yi mo poŋdi a ŋutu lo wora lo gwon jojo to Jowet nikaŋ gwon a Kristo logon aje wora i ŋo liŋ jojo asut lo.

¹⁴ A yi mo köti tine gwon a ŋwajik logon yeyeesi kao yalaŋ abur i kulya ti todinesi ka ’de ka ’de nagon gwon gwoso yalajin logon köbuŋöt lo ya ’yu. Kine todinesi ŋutu totodin ko koŋon nase nagon se yeyeŋ togiraddu ŋutu ko kulya ’burönö kune.

¹⁵ Kölumbö ti yi Tambi ta kulya ’diri ko töili lo nyaŋu, anyen yi ’duröddu ki ko Kristo i mugun i ŋo liŋ. Lepeŋ logon a kwe;

¹⁶ a i nina kwe, a mugun liŋ iŋge tomoraki ko a to ’depaki i pirit na geleŋ ko tomoresi liŋ nagon Ŋun a tikin kine, a na kitari swötön liŋ ti mugun ’bura nu, a Ŋina mugun ’duŋe ’duŋö ’bura i nyaŋu.

Gwiliŋit ludukötyo ko Kristo i mugun

¹⁷ Nyenagon nan jamakin ta sona a jujuje ta i karin ti Matat likaŋ adi, ko wörö ta gwoso na wöröri paganojin kilo na ko yeyeesi kase nagon a wuya kana.

¹⁸ Yeyeesi kase gwon i mudwe, lepeŋat gwon pajo i gwiliŋit likaŋ ko Ŋun, kogwon se ti den nene ŋo a töilyet kase gwe a iŋgo.

¹⁹ Lepeŋat ti yeyeju nene ŋo kwöŋ, a pakiŋdye ’börik i koŋdya aka ŋo ti yu na kwe, a gomani koŋdya ŋo liŋ nagon a lut.

²⁰ Ama ta köju a ko todiniki kulya ti Kristo sona.

²¹ Ta ’diri a yiŋ lepeŋ ko a todiniki kulya ’diri na gwon ko Yesu i mugun kune.

²² Ta ködyö paju gwiliŋisi kasu ti ’beron kulu, a ta ködyö rusuŋdye kaŋo töilyet kasu ti ’beron logon kakaran kogwon ’dekesi mumulukesi.

²³ Töilyet kasu lo yeyeju kulya kilo ködyö totoludukö.

²⁴ Ta ködyö jupukiŋdya töilyet ludukö logon ŋun a gweja kulo a gwuluet nanyit, logon a kelaji ko löti lo rigwo ko i kelan nagon po i kulya ’diri.

Ko jambu ta kulyaesi körisi

²⁵ Nyenagon paji ta kulya ’burönö, ta liŋ geleŋ geleŋ tujamaki ta kulya nagon a gwak, kogwon yi liŋ a swötön ti mugun geleŋ.

²⁶ a ko ködyö ta a woran, ti ŋina woran gwe ti tiŋdu ta i koŋdya arabat. Ti ’doro na kolor gwe ti ’bunyökin ta a ta nyuŋ gwon ko woran,

²⁷ an Ŋilo kaŋöönit ryeju pirit kasu i töilyet.

²⁸ Ti Ŋutu logon a kolak kölöki koko ’ya, ama kölumbö ti se kitani kita parik ko könisi kase i koŋdya na kita na ’but, anyen se böŋö jojo ’dogga ŋutu lomerika.

²⁹ Ti kulyaesi logon a lut gwe ti lupe kaŋo kasu i kutusen, ama tuŋ jambi ta kulyaesi lo ’but logon jojo parakiŋdya ŋutu gwoso nagon ködyö jujukin jama i diŋit nase na, anyen ŋutu lo yiŋga kilo kulyaesi kulo böŋö ryeju ŋo na ’but.

³⁰ Köti ko todelyaju ta Mulökotyo Loke lo ŋun, kogwon Ŋun a tiŋdu lepeŋ anyen gwuluarikin ta adi ta a ŋutu kanyit i lor logon nye mo kölöddi ta a lui lu.

³¹ Paji ta töilyet lo pötwör liŋ, ko woran liŋ nagon po ’de ’de, ko ŋoma liŋ, ko woŋon liŋ, ko momoröju liŋ, se ko maŋdu liŋ.

³² Gwe ta a lo ’but ko ’börik, ko i won konyen ko ’börik, ko i topitökin ko ’börik gwoso nagon Ŋun köti a pitökiŋdye ta ko Kristo i mugun na.