Epeso 2 - Bibilia Buk na Ŋun nagon koti luŋu a

Ta koju a twatwa ama soŋinana ta gwe jörun

¹ Ta köju a twatwa kogwon lyaŋesi kasu se ko toronjin kasu.

² Gwiliŋit losu gwon i toron, a ta kekebbi kulya narok ti na kak, a ta inge twö matat lo riŋit na kobuŋot lo gwon i woli na ki lo. Ŋilo mulokotyo nyuŋ kikita i kiden na ŋutu lo renya Ŋun kulo.

³ Yi liŋ koti koju gwolor abur gwoso nagon yi ’de ’deggi, a yi koŋdi gwoso nagon mugunya kaŋ ko toilyet kaŋ ’de ’dekan na. Nyena yi liŋ gwon gwoso kulye kilo Ŋutu logon ŋun molu ririŋ kulo.

⁴ Ama Ŋun a kworiŋit i yatakiŋdya abur, nyaŋu nanyit nagon nye nyaŋi yi na a duma parik ti bulo tema.

⁵ Ma ’di na gwoŋdi yi a twatwa kogwon lyaŋesi kaŋ nu, ama kölumbö a nye toruje yi i pirit na geleŋ ko Kristo. Ta a lwökö kogwon ’busan na nyaŋu na Ŋun.

⁶ A nye toŋiji yi i pirit na geleŋ ko Kristo Yesu, a tosi ’dakiŋdye yi i pirit na geleŋ ko lepeŋ ki yu i kak nagon ti meta.

⁷ Lepeŋ a koŋdya sona anyen tukworien duma na ’busan nanyit na nyaŋu boŋö kwekweya tojo ko molu nu, na koŋdi nyeyi ’bura ko Kristo Yesu i mugun nu.

⁸ Ta aje lwökö kogwon yubbö nasu, ama na po ko Ŋun ti gwon a nasu, ama lepeŋ lo ’dogga ta.

⁹ Ŋina lwökit ti gwon a ropet na kita, an lele ŋuto pupurja mugun.

¹⁰ Kogwon yi a tobodwan nanyit; yi a gweki ko Kristo Yesu i mugun anyen koŋdya konesi na ’but nagon Ŋun a tetenakin a kokwe kunu, anyen yi böŋö wörö kata.

Yudayaki ko ŋutu ti juron a mugun geleŋ ko Kristo i mugun

¹¹ Nyenagon yeyeji ta kulya kasu, ta ŋutu logon i yuŋwe nasu a ŋutu ti Jurön kulo; ŋutu logon luŋu a lo tawero kulo luŋgu ta adi ta a ŋutu logon ti tawero. (Ama tawero nase a ŋo nagon ŋutu kokon ko könisi kase.)

¹² Yeyeoddi ta adi i ŋinu diŋit ta gwon pajo pajo ko Kristo. Ta a Lwaka i teŋ na Yisaraele, ta ’bayin i diŋitan nagon Ŋun a tomoruŋdya ŋutu kanyit kanyit i mugun ko milye kunu, a ta iŋge si ’da i na kak ’bak yenesi a gwe ’bak Ŋun.

¹³ Ama soŋinana ko Kristo Yesu i mugun ta logon köju gwon pajo kilo rima ti Kristo aje jon ta nyona.

¹⁴ Kogwon lepeŋ ko mugun nanyit a tomor a yi a ŋo geleŋ a tiŋdi yi i gwon taliŋ. A lepeŋ iŋge dukakin kak tomirikulan nagon koŋa yi gwoso gorom na i tiŋdu na mugun nanyit,

¹⁵ anyen tu ’baka ’yu Saresi ti Yudayaki ko jujuwesi kase ka ’de ka ’de. Lepeŋ a koŋdya sona anyen nye böŋö gweyuŋdya kine teŋon murek ti ŋutu a kötumit ludukötyo geleŋ kanyit i mugun, anyen tiŋdu se i gwon taliŋ.

¹⁶ Lepeŋ a twan i ködini na görö anyen tomoruŋdya yi ko Ŋun ni a mugun geleŋ, a iŋge tu ’baka ’yu tomirikulan ko ŋina twan nanyit.

¹⁷ a nye iŋge po a tokukiŋdye ta logon köju gwon pajo pajo ko Ŋun kilo Loŋe Lo ’but lo taliŋ, köti a tokukiŋdye i se logon gwon nyona kulo.

¹⁸ Kogwon kanyit i mugun yi lio bubulö tu ko Ŋun Monye i komŋo i Mulökötyo Loke lo geleŋ.

¹⁹ Nyenagon ta köti tine gwon a Lwaka ko a lepelok; ama ta a ŋutu ti jur geleŋ i pirit na geleŋ ko ŋutu ti Ŋun ko a ti mede nanyit.

²⁰ Ta nyuŋ ’duköki i pipilesi ti luyökie se ko ti nebijin, a Kristo Yesu ko mugun nanyit gwe a ŋurupit duma lo goŋet,

²¹ logon kadi liŋ a tomoraki kanyit i mugun tojo ko a ’duköji ki a kadi nake ko Matat i mugun.

²² Kanyit i mugun ta köti nyuŋ ’du ’duköji se ko kulye liŋ i pirit na geleŋ i ŋina kadi kogwon kita na Mulökötyo Loke, anyen Ŋun si ’da kata.