Ejira 8 - Bibilia Buk na Ŋun nagon koti luŋu a

¹ A kilo gwe a kusik ti kötumitönti merenyejin kase gwoso i yuŋwe nase, logon a po kapo ko nan i Jur lo Babela, i diŋit na gwoŋdi Aretasaseta a mor nu.

² Kweja adi, Geresom a lo kötumit na Pinasa; ko Daniele a lo kötumit na Itamar; ko Katusa nyakwari lo Sekania a lo kötumit na Dawidi;

³ ko Takaria a lo kötumit na Parosa, ko kulye logon a wuröki ko lepeŋ kulo a ŋutu lyan mia geleŋ ko merya mukanat.

⁴ Ko Elionai ŋuro lo Jerakia a lo kötumit na Pakat-moaba ko kulye logon ko lepeŋ kulo a ŋutu lyan miajin murek.

⁵ Ko Sekania ŋuro lo Yakasiele a lo kötumit na Tatu ko kulye logon ko lepeŋ kulo a ŋutu lyan miajin musala.

⁶ Ko Ebede ŋuro lo Yonatana a lo kötumit na Adin, ko kulye logon ko lepeŋ kulo a ŋutu lyan merya mukanat.

⁷ Ko Yesaya ŋuro lo Atalia a lo kötumit na Elam, ko kulye logon ko lepeŋ kulo a ŋutu lyan merya buryo.

⁸ Ko Jebadia ŋuro lo Mikaele a lo kötumit na Sepatia, ko kulye logon ko lepeŋ kulo a ŋutu lyan merya budök.

⁹ Ko Obadia ŋuro lo Yekiele a lo kötumit na Yöaba, ko kulye logon ko lepeŋ kulo a ŋutu lyan miajin murek ko puök wot budök.

¹⁰ Ko Selomit ŋuro lo Yosipia a lo kötumit na Bani, ko kulye logon ko lepeŋ kulo a ŋutu lyan mia geleŋ ko merya buker.

¹¹ Ko Takaria ŋuro lo Bebai a lo kötumit na Bebai, ko kulye logon ko lepeŋ kulo a ŋutu lyan merya murek wot budök.

¹² Ko Yokanan ŋuro lo Akatan a lo kötumit na Ajagada, ko kulye logon ko lepeŋ kulo a ŋutu lyan mia geleŋ ko puök.

¹³ a ŋutu ti kotumit na Adonikam gwe a kilo logon ko poŋdi i mukök, karin kase a ko Elipelet, ko Yeuele, ko Semaya, ko kulye logon ko lepeŋat kulo a ŋutu lyan merya buker.

¹⁴ Ko Utai ko Takur a ti kotumit na Bigewai, ko kulye logon ko lepeŋat kulo a ŋutu lyan merya buryo.

¹⁵ A nan iŋge tunakin lepeŋat nyona ko kare lo ’do ’dokon tojo Awa, a yi monuŋdye nyu perok musala. A na keŋdi nan ŋutu se ko koanejin nu, a nan tine ryo lele ŋuto lo kotumit na Lewi.

¹⁶ A kirut nan soŋdi ŋutu i luŋgu na Eliejer, ko Ariele, ko Semaya, ko Elenatana, ko Yariba, ko Elenatana, ko Natana, ko Takaria, ko Mesulam, kilo a ŋutu temejik, se ko Yoyariba ko Elenatana logon deden kulya.

¹⁷ A nan soŋdi lepeŋat ko Ido ŋuto duma lo pirit na luŋu a Kasipia, a nan iŋge takin lepeŋat kulya nagon se ko tu jamakin Ido ko luŋasirik kanyit logon a kakitak ti kadi na Ŋun, logon gwolor ko lepeŋ i pirit na luŋu a Kasipia yu kulu, anyen parakiŋdya yi ko kakitak ti kadi na Ŋun likaŋ.

¹⁸ Nyena kogwon könin lo ’but lo Ŋun likaŋ a parakiŋdya yi, lepeŋat a jakiŋdya yi ŋuto lokoŋ lo nyakwariat ti Makeli, ŋuro lo Lewi, ŋuro lo Yisaraele, logon karin kanyit a Serabia, ko ŋwajik kanyit lyan ko luŋasirik kanyit a ŋutu puök wot budök;

¹⁹ ko Kasabia koti, ko lele logon ko lepeŋ a Yesaya lo nyakwariat ti Merari, ko luŋasirik kanyit ko ŋwajik kase a ŋutu merya murek;

²⁰ wat ŋutu kakitak ti kadi na Ŋun miajin murek ko merya murek logon Dawidi ko kulye dumalak köju a korun kaŋo anyen parakiŋdya Lewijin kulu. A kilo liŋ iŋge wurö ko karin kase.

²¹ A kirut nan laije kulya ti miŋdya nyu i kare Awa, anyen yi kodyo boŋo tokoyogga ’borik ko Ŋun likaŋ i komor, anyen yi jojo galuŋdya ko lepeŋ kiko likaŋ lo torigwo, ko lo ŋwajik kaŋ, ko lo toro ’bo kaŋ liŋ.

²² Kogwon köju nan gwe ko yu na kwe i pija na mor anyen parakiŋdya yi ko teŋ na kamorok ko kajoŋak ti kusanjin, anyen gaju yi ko merok i kiko likaŋ; kogwon yi ’beron aje takin mor adi, Könin lo Ŋun likaŋ a lo ’but i parakiŋdya na se liŋ lo ga ’yu lepeŋ kulo, a riŋit na woran nanyit moroni moro ko ŋutu liŋ lo ko ’yu lepeŋ kulo.

²³ Nyena yi aje miŋdya ko aje mo ’yu Ŋun likaŋ ko kune ŋo, lepeŋ aje yiŋ momolesi kaŋ.

²⁴ Nyenagon a nan koruŋdye kaŋo temejik ti koanejin puök wot murek, logon a ko Serabia, ko Kasabia, se ko luŋasirik kase puök.

²⁵ a nan iŋge temakiŋdya lepeŋat podo ko dakap se ko toro ’bo nagon mor, ko kajujuwak kanyit, ko temejik ti miri nanyit, ko ŋutu ti Yisaraele liŋ lo gwon nyu kulu a tiŋdu a ’dokesi ti kadi na Ŋun likaŋ.

²⁶ Nan a temakiŋdya ko lepeŋat i könisi podo gwoso talentajin miajin buker ko merya mukanat, ko toro ’bo logon a podo logon gwörö ko talentajin mia geleŋ, ko dakap nagon temuŋdya a talentajin mia geleŋ;

²⁷ ko kalabajin merya murek nagon a dakap nagon gworo ko ginejin aliŋ geleŋ, ko toro ’bo murek nagon a mölwö nake namilyaŋak, nagon gworo go gwoso dakap.

²⁸ A nan takiŋdye lepeŋat adi, Ta a ŋutu loke lo rurwan ti MATAT, kune toro ’bo koti a nake na rurwan; a podo se ko dakap gwe a ’dokesi ti tupalikan na töili nagon tiki MATAT ŋun lo merenyejin kasu.

²⁹ Tiji ta ko ’debbi ta se ’bura, tojo ko ta a tem se i komor na koanejin dumalak, ko Lewijin, se ko kusik ti kotumiton ti merenyejin ti Yisaraele Yerusalema nyu, i lukata na kadijik na ’di ’dik ti kadi na MATAT.

³⁰ Nyena a koanejin se ko Lewijin wuji temet na podo, ko na dakap, se ko na toro ’bo, anyen joŋ lepeŋat Yeru­salema yu i kadi na ŋun likaŋ.

³¹ A i perok puök wot murek ti yapa lo kokwe, a yi ŋiörö kaŋo i kare Awa anyen tu Yerusalema; a könin lo ŋun likaŋ gwe kayaŋ i lwöggu na yi i könisi ti merok ko ti karyakak i kiko.

³² A yi ’dure Yerusalema, a yi iŋge yukan nyu perok musala.

³³ A i perok iŋwan, a podo ko dakap se ko toro ’bo temani tema i kadi na Ŋun likaŋ, a tikine i könin lo koane Meremot ŋuro lo Uriya, se ko Elejara ŋuro lo Pinasa, a Lewijin logon ko lepeŋat kulo gwe a ko Yojabada ŋuro lo Yesu a, ko Noadia ŋuro lo Binui.

³⁴ A ŋo liŋ iŋge kena ko a tema, a temesi kase liŋ geleŋ geleŋ iŋge wuröki kak i ŋinu diŋit.

³⁵ A kirut ŋutu lo yitwe kase i jur i mukök na to ’dupien kulo wukiŋdye Ŋun lo Yisaraele rubaŋgajin lo ’yu ’yura ’buluŋ a ti Yisaraele liŋ. Se a wukiŋdya öwönin puök wot murek, ko lopijoki merya buŋwan wot buker, ko yisi merya buryo wot buryo, ko melon puök wot murek a ti rubaŋga lo toron; kine liŋ a ti rubaŋgajin lo ’yuraki MATAT ’buluŋ.

³⁶ A se köti tiŋdi mödirön dumalak ti mor se ko mödirön ti modoria na gwon i nu pele na kare Perat yökiesi ti mor; a kilu temejik kirut parakiŋdye ŋutu se ko kadi na ŋun.