Ejira 7 - Bibilia Buk na Ŋun nagon koti luŋu a

Ejira ko teŋ nanyit a ’dur Yerusalema

¹ Nyena i mukök na kine ŋo, nagwoŋdi Aretasaseta a mor lo Parasa nu, a Ejira poŋdi kaŋo Babela. Lepeŋ a ŋuro lo Seraya, ŋuro lo Ajaria, ŋuro lo Kilikia,

² ŋuro lo Salum, ŋuro lo Sadok, ŋuro lo Akituba,

³ ŋuro lo Amaria, ŋuro lo Ajaria, ŋuro lo Merayot,

⁴ ŋuro lo Jerakia, ŋuro lo Uji, ŋuro lo Buki,

⁵ ŋuro lo Abisua, ŋuro lo Pinasa, ŋuro lo Elejara, ŋuro lo Arona koane duma.

⁶ Ŋilo Ejira a ŋiörö kaŋo Babela. Lepeŋ a kawurönit lo deden saresi ’bura logon MATAT Ŋun lo Yisaraele köju a tikin Mose kulu; a mor rukökiŋdye lepeŋ ŋo liŋ nagon nye a pi kune, kogwon könin lo MATAT Ŋun lonyit gwon i parakiŋdya na lepeŋ.

⁷ A i kiŋa toburyo lo mor Aretasaseta, a kulye ŋutu ti Yisaraele, ko ti koanejin, ko ti Lewijin, ko ti kayolok, ko ti katiyuk ti kötumitön se ko ti kakitak ti kadi na ŋun iti Yerusalema,

⁸ A Ejira poŋdi Yerusalema i yapa tomukanat lo kiŋa toburyo lo mor;

⁹ kogwon nye aje ŋien Babela i lor geleŋ lo yapa togeleŋ, a nye ’duröki Yerusalema i lor geleŋ lo yapa tomukanat, kogwon könin lo ’but lo ŋun lonyit gwon i parakiŋdya na lepeŋ,

¹⁰ Kogwon Ejira aje petakiŋdya töili lonyit i ga ’yu na saresi ti MATAT ko i koŋdya na se, ko i todinikiŋdyö na ŋutu ti Yisaraele saresi kanyit lo wurö se ko todinesi ti keri,

¹¹ Na a waraga nagon mor Aretasa­seta a tiŋdu koane Ejira, kawurönit lokoŋ lo kulya ti jujuwesi ti MATAT se ko saresi kanyit logon a wuröki Yisa­raele kulo adi,

¹² Nan Aretasaseta, mor lo moran, a roman ko do koane Ejira, kawurönit lo saresi ti Ŋun lo ki,

¹³ Nan a tiŋdu saret adi ŋutu liŋ ti Yisaraele, ko koanejin kase, se ko Lewijin logon gwon köyö i tumatyan kulo, ko se ködyö a wuluŋdyö tu Yerusalema se bubulö tu ko do i pirit na geleŋ.

¹⁴ Ko­gwon nan mor ko kajujuwak kwe buryo a soŋdu do i galuŋdya kapo kulya ti Yuda ko ti Yerusalema gwoso i saresi logon ŋun ilot a tikin do kulo.

¹⁵ Ko ti do koti joŋgi podo ko dakap nagon nan mor ko kajujuwak kwe a tiŋdu a ti tupalikan na töili ko Ŋun lo Yisaraele logon si ’da Yerusalema yu.

¹⁶ Ko ti do joŋgi podo liŋ ko dakap nagon do mo ryoryo i modoria ’bukuluŋ na Babela, ko ’dokesi ti tupalikan na toilyet ti ŋutu se ko ti koanejin, nagon se a rukun a ti kadi na ŋun lose na gwon Yerusalema yu.

¹⁷ Nyena kune gurut do kodyo kitari ko tirikwet anyen gworori öwönin, ko lopijoki, ko yisi, se ko ’dokesi kase ti ’bolot ko rubaŋgajin ’bu ’bukesi kase, a do wukiŋdye se i pirit ’yuret na rubaŋgajin loki i kadi na Ŋun ilot na gwon Yerusalema yu.

¹⁸ a do se ko luŋosurok buloni bulo kitari pitönö ti pödö ko ti dakap gwoso na yeyeji ta na, gwoso i ’deket na ŋun losu.

¹⁹ A do ködyö tiŋdi ko Ŋun lo Yerusalema i komor toro ’bo nagon a tiki do a kitaesi ti kadi na Ŋun ilot.

²⁰ Ko nene po kata köti nagon ’de ’dekarikin a na kadi na Ŋun ilot, nagon do yöpö tiŋdu, do bubulö luŋgu i pirit ’delet na tukwörien na mor.

²¹ Nan mor Aretasaseta a teteŋdya saret a lo ka ’delak liŋ ti tukwörien na mor lo gwon i modoria na gwon i nu pele na kare Perat kulo, adi, Ko po nagon koane Ejira, kawurönit lo saresi ti Ŋun lo ki ’de ’dekan kasu, tiki ta lepeŋ ’de ’de,

²² ko ti gwe ti lwoŋgu pödö nagon temuŋdya a talentajin mia geleŋ, ko kupöjin dumalak ti ’bolot mia geleŋ, ko sapya ti binyo mia geleŋ, ko sapya ti welet mia geleŋ, ama ti ’balaŋ gwe ti tema.

²³ Ko po nagon Ŋun lo ki a sarakin kune ti konani kona Jojo a ti kadi nanyit logon a Ŋun lo ki, an lepeŋ ko woran ko tumatyan nio se ko ŋwajik kwe.

²⁴ Yi köti a kwekiŋdya ta adi ta ködyö ti Jukin luŋgu usur, ko ’buggö na murut, ko dakesi ti kak i lele lo koanejin, kode i Lewijin, ko i kayolok, ko i katiyuk ti kötumitön, se ko i kakitak ti kadi na Ŋun.

²⁵ Nyena do Ejira, gwoso nagon Ŋun ilot a tiŋdu do kopon na, ti do wuluŋdye ŋutu kaliliyak se ko ka ’dupök, logon bubulö lilija kulya ti ŋutu liŋ i mödoria na gwon i nu pele na kare Perat, kweja adi se liŋ logon deden saresi ti Ŋun ilot; ama do ködyö totodin se logon ti den saresi ti Ŋun ilot kilo.

²⁶ Nyena ko ŋuto logon ti twöju saret lo Ŋun ilot se ko lo mor, ti ripet ’dupökine lepeŋ ’de ’de, kode nye tatatua, kode nye riköji kaŋo i Jur, kode tito kanyit ’dumaji kapo ko lepeŋ, kode ŋona nye tiki i kadi rereket.

²⁷ Ti MATAT Ŋun lo merenyejin kaŋ purani pura, logon a tiŋdu yeyeet gwoso ŋina ko mor i töili anyen tokweleŋdu kadi nanyit na MATAT na gwon Yeru­salema nu.

²⁸ Ti lepeŋ purani pura logon a yatakin nan i komor na mor, ko kajujuwak kanyit, se ko ŋutu temejik liŋ ti miri na mor ko nyaŋu nanyit nagon ti ’duddyö kwöŋ. A könin lo MATAT Ŋun lio togo ’yi nan, a nan momoji ŋutu temejik ti Yisaraele anyen moraddu ko nan.