Ejira 6 - Bibilia Buk na Ŋun nagon koti luŋu a

¹ A kirut mor Dario tiŋdi saret anyen kadi ’delet na wuresi ti ’beron gagala Babela yu.

² A buk na gudula iŋge rye Ekebatana köji duma na gwon i mödöria na Madai. A kilo kulyaesi iŋge wurö lukata adi, Kusik ti kulya na wurö.

³ Adi i kiŋa togeleŋ lo gwoŋdi Korese a mor nu, a nye iŋge tiŋdu saret i kulya ti kadi na ŋun na gwon Yerusalema yu, adi ti nye nyököni nyökö ’dukö anyen gwon a pirit wukiet na rubaŋgajin se ko rubaŋgajin lo ’yu ’yura ’buluŋ. Ti tojolan nanyit ki gwe a lokiliŋan merya buket se ko tugalaŋ nanyit a lokiliŋan merya buker köti,

⁴ a ti nye ’dukoni ko ’dokiŋ musala ti ŋurupö lobot ko ’doke geleŋ na kaden. Ko köti ti ropet na ŋina kita ti ’dumeni i pirit ’delet na tukwörien na mor.

⁵ Köti ti toro ’bo ti kadi na ŋun nagon a tetena ko dakap ko pödö, nagon Nebukadanesar a joŋ kaŋo i kadi na Ŋun na gwon Yerusalema a yekaddi tojo ko Babela kune, ti nyoköjine bot tojo i kadi na ŋun na gwon Yerusalema nu, a do tiŋdi se geleŋ geleŋ kase i piritön i kadi na ŋun.

⁶ Nyenagon do Tatena i mödir duma lo mödöria na gwon i nu pele na kare Perat, ko do Setar-bojena i, se ko laŋet inot na mödirön ti mödöria na gwon i nu pele na kare Perat, gwe ta pajo i kine kulya.

⁷ Kölöki ta ŋina kita na kadi na ŋun ka ’de; ti mödir lo Yudayaki ko temejik kase kölökine i nyöggu na ’duggö na ŋina kadi na ŋun kanyit i pirit na ’beron.

⁸ Köti nan a tiŋdu saret ko ta ködyö parakin kilo temejik ti Yudayaki ada i nyöggu na ’duggö na ŋina kadi na ŋun, adi ti ŋina kita ropani ko gurut ti usur nagon mödöria na gwon i nu pele na kare Perat a tikin mor kunu, ko ti ropari kilu ŋutu ’bukuluŋ ’bak jaran.

⁹ Ko ti se tikine po liŋ nagon se ’de ’dekan temba i lor ’bak jaran, kode a dwönin lo ’di ’dik, kode lopijoki, kode köbilu a ti rubaŋgajin lo ’yuraki ŋun lo ki ’buluŋ, se ko ’bolot, ko ’balaŋ, ko binyo, kode welet, gwoso ’deket na koanejin ti Yerusalema,

¹⁰ anyen se böŋö wukiŋdya rubaŋgajin lo tutulyöŋgu ŋun lo ki, anyen kwakwasakiŋdya nan mor ko ŋwajik kwe anyen si ’da ’bura.

¹¹ Koti nan a tiŋdu saret adi ko lele ŋuto a lopuk ŋilo saret, a ti ködini lonyit lo kadi ’dutwene kaŋo anyen lepeŋ ködyö suki nyin, a kadi nanyit ködyö turöni kak a gwe a ki ’dirö.

¹² Ti Ŋun logon a tiŋdu karin kanyit i kuön nyu lo, ti nye gubara kaŋo mor kode ŋutu lo koŋdya nene po i löpuggö na ŋilo saret, kode i köŋu na ŋinu kadi nanyit na gwon Yerusalema nu. Nan Dario a tiŋdu saret; ti agu konani kona ’bura.

¹³ A kirut Tatena i mödir duma lo gwon i nu pele na kare Perat, ko Setar-bojena i se ko lapet nase kulo koŋdi po liŋ ’bura gwoso i saresi ti mor Dario logon a sunyuki lepeŋat kulu.

¹⁴ A temejik ti Yudayaki möröddi ŋerot ’bura i ’duggö nase gwoso i jujuwesi keyeesi ti nebi Kagai ko Takaria ŋuro lo Ido. A se tutuŋge ’duggö gwoso na sarakiŋdye Ŋun lo Yisaraele se nu, ko köti gwoso i saresi ti Korese, ko Dario, ko Aretasaseta mor lo Parasa.

¹⁵ A ŋina kadi iŋge tutuŋö ’dukö i perok musala ti yapa Adar i kiŋa tobuker lo gwoŋdi Dario a mor lu.

¹⁶ A ŋutu ti Yisaraele, koanejin ko Lewijin se ko ŋutu liŋ lo yitwe i to ’du­ŋien kulu koŋdi kwakwasesi ’boriesi ti ŋina kadi na ŋun ko lyöpön.

¹⁷ A i diŋit ’boriet na ŋina kadi na ŋun a se wukiŋdye dwönin mia geleŋ, ko lopijoki miajin murek, ko yisi miajin iŋwan, köti a se wukiŋdye melon puök wot murek a ti rubaŋga lo toron lo Yisaraele liŋ, gwoso i kenet na kötumitön ti Yisaraele.

¹⁸ A se kökorakiŋdye koane­jin ko Lewijin a teŋon i koŋdya na kitaesi ti ŋun Yerusalema yu, gwoso na wurörikin i Buk na Mose nu.

¹⁹ A ŋutu lo yitwe i to ’dupien kulo koŋdi rorwe lo Pasaka i perok puök wot iŋwan ti yapa togeleŋ.

²⁰ Kogwon koanejin ko Lewijin a toke ’ya ’börik i pirit na geleŋ; a se liŋ gwe a loke i kulya ti keri; a lepeŋat ’duŋge yisi ti rubaŋga lo Pasaka a lo ŋutu liŋ lo yitwe i to ’dupien ko lupasirik kase koanejin se ko ’börik kase.

²¹ ŋilo rorwe a nyei ko ŋutu ti Yisaraele lo yitwe i to ’dupien, köti ko se liŋ logon a mora ko lepeŋat, ko aje koruŋdya ’börik kaŋo i konesi lut ti ŋutu ti lu jur. anyen se kwakwaddu MATAT ŋun lo Yisaraele.

²² A se koŋdi rorwe lo ambata nagon ’bak kape ko perok buryo ko lyöpön; kogwon MATAT a tiŋdu lepeŋat i lyöpön ko a löpukun töili lo mor lo Asura ko lepeŋat ni, anyen parakiŋdya lepeŋat i kita na kadi na Ŋun logon a lo Yisaraele.