Ejikele 9 - Bibilia Buk na Ŋun nagon koti luŋu a

Tatua na ŋutu logon a koŋdya toron

¹ A kirut lepeŋ maraŋakiŋdye köyo i swö, adi, Miju ta nyona ta ŋutu logon a wulöki i köŋu na köji, ŋutu liŋ gwon ko tito tukaresi kase i könisi.

² A kirut nan meddi ŋutu buker po i swöt lo kötumit na gwon i ko ’du nagon diraddu i swöt lo lobot na. ŋutu liŋ gwon ko tito tukaresi kase i könisi, a ŋuto geleŋ gwe kase kiden logon a jupu boŋgo na waratat naparere ko a torakiŋdya tito wuresi kanyit i mukök. A lepeŋat lupöni lukata a gwo ’de nyona ko pirit ’yuret na rubaŋgajin nagon a mölwö.

³ A minyo lo ŊUN lo Yisaraele ŋiörö ki i kerubajin nagon lepeŋ gwon kata kune, a iti i kutuk na kötumit na kadi. A lepeŋ luŋgi ŋutu logon a jupu boŋgo na waratat naparere logon a torakiŋdya tito wuresi kanyit i mukök lo.

⁴ A MATAT takiŋdye lepeŋ adi, Wöröjine i lukata na köji na Yerusalema ’bukuluŋ, wurökiŋdye gwuluet i komorsikan ti ŋutu logon ’du ’duwatu ko dedelya ti ’bön ŋo na mamana na kokona nyu kilo.

⁵ A nan yiŋge lepeŋ takiŋdya kulye ŋutu kulo adi, Kepoddi ta lepeŋ köji kata ko tatuje ta ’bak won na konyen; an ta ko pitökin ta ma ’di ŋuto geleŋ to.

⁶ Tatuje ta, tukaŋi ta se liŋ asut, kweja adi ŋutu muduŋin, ko teton, ko kö ’disi, ko lupudiet se ko ŋutu wate, ama ko ’bo ’yu ta ŋutu logon gwon ko gwuluet kulo. Suluje ta tatuaddu ni köyö i pirit nake na rurwan. Nyena a lepeŋat suluje tatuja ŋutu temejik lo gwon i komor na kadi na ŊUN kulo.

⁷ A kirut lepeŋ takiŋdye lepeŋat adi, Tolute ta kadina Ŋun, tojoreneta ’baŋin kanyit ko öpuö; a kirut iti ta kaŋo i tatuja na ŋutu köji kata. A lepeŋat iti tu.

⁸ A gwe sona, nagon se nyuŋ gwon i tatuja na ŋutu nu, a nan kölökine geleŋ; a nan ’dorone kak rupu, a nan gwine gwien pija adi, Pon MATAT ŊUN, do aje ’bukökiŋdyö woran inot i Yerusalema; do ’diri mo tutukar pitönö liŋ ti ŋutu ti Yisaraele le?

⁹ A nye waddi adi, Toron na kötumit na Yisaraele ko na Yuda gwe a duma parik; jur aje jore ko ’buköddu na rima, a köji iŋge jore ko ’duŋgö na putesi lorok. Kogwon lepeŋat yeyeju adi nan MATAT aje kölökin jur; lepeŋat yeyeju adi nan ti met se.

¹⁰ Ama nan mo ti won konyen ko se kode pitökiŋdyö lepeŋat; ama nan mo roropakin konesi kase kase i kusik.

¹¹ A kirut ŋuto lo jupu boŋgo na waratat naparere logon a torakiŋdya tito wuresi kanyit i mukök lo lo ’dure a nyönyöggi adi, Nan aje koŋdya gwoso na sarakiŋdye do nan na.