Ejikele 8 - Bibilia Buk na Ŋun nagon koti luŋu a

Nebi Ejikele a meddya ŋo temejik na mamana Yerusalema yu i ŋo gwoso rudwe

¹ A ko gwe sona i kiŋa tobuker, i perok mukanat ti yapa tobuker, na si ’dari nan köyö midi se ko temejik ti Yuda i pirit na geleŋ nu, a riŋit na MATAT ŊUN poki köyö i mugun.

² A nan iŋge meddya ŋo gwoso ŋuto; suluja kanyit i mukök tojo ko ’dapan meta gwoso kimaŋ, a suluje kanyit i mukok tojo ko kwe a kobbi gwoso mölwö na nama a nyore kana.

³ A lepeŋ riuŋdye lele ŋo gwoso könin a morgi nan i kupir ti kwe, a mulokötyo lo po ko Ŋun ’dokoddi nan i wöli na ki ko kak, a nan meddi kulya ti ŊUN köyö i töili meta gwoso nye a joŋ nan Yerusalema. A lepeŋ togwi ’dikiŋdye nan kak i lupet na kötumit na lupörikin i ’baŋ lo lukata lo kadi na ŊUN, lo diraddu i swot lo lobot, i pirit na gwo ’di ’e nyömue yinet logon totowoŋa lo.

⁴ Mete, a minyo lo Ŋun lo Yisaraele gwe nyu, gwoso kulya na met nan i pirit nagon a ’dar kunu.

⁵ A kirut lepeŋ kulyani ko nan adi, Ŋuro lo ŋuto, metaddi i swot lo lobot. Nyena a nan metaddi i swöt lo lobot, a nan iŋge meddya ŋilo nyömue yinet gwogwo ’dan i swöt lo lobot na kötumit nagon lupörikin i pirit ’yuret na rubaŋgajin.

⁶ A lepeŋ pipije nan adi, ŋuro lo ŋuto, do aje met ŋo nagon se kökon kune? Do a met ŋo temejik na mamana nagon kötumit na Yisaraele kökon ni kune? Lepeŋat koŋdya kine ŋo anyen riköddu nan pajo köyö i pirit nake na rurwan. Do mo köti memet ŋo temejik na mamana nagon lwöŋgu kine.

⁷ A lepeŋ joŋgi nan i kötumit na mariŋ, a na meddi nannu, a nan meddi dili nagon a tuloki i gorom.

⁸ A lepeŋ kulyani ko nan adi, ŋuro lo ŋuto, ’boggi gorom, a na ’boggi nan gorom nu, mete, a kötumit gwe nyu.

⁹ A lepeŋ takiŋdye nan adi, Lupöni lukata, ko memete memet ŋo narok na mamana nagon se kökon ni kune.

¹⁰ Nyena a nan lupöni lukata, a nan iŋge meddya ŋojino ti gweyajin liŋ ti ŋo lo gwogwo-ŋtu, ko ti kijakwa lo mamana, se ko nyömuejin liŋ ti ŋunyen ti kötumit na Yisaraele a wuröki lorga gorom.

¹¹ A ŋutu temejik merya buryo ti kötumit na Yisaraele gwo ’de i komor na kine ŋo, a Yajania ŋuro lo Sapana gwo ’de kase kiden. Ŋutu liŋ geleŋ geleŋ ’debba ta ’doka kase i könisi, a köpuröt lo bökur lo mon paleleŋ gwululuöddi ki i kine ta ’doka.

¹² A kirut lepeŋ pipije nan adi, Ŋuro lo ŋuto, do a met ŋo nagon temejik ti kötumit na Yisaraele kökon i mudwe kune le, adi ŋutu liŋ geleŋ geleŋ gwo ’dan kase i piritön kwakwasesi komorga ŋöjinö ti nyömuejin kase? Lepeŋat yeyeju adi nan MATAT ti met se, kode yeyeju adi nan aje kölökin jur.

¹³ A lepeŋ koti takiŋdye nan adi, Do mo memet ŋo temejik na mamana nagon se kökon lwöŋgu kune.

¹⁴ A kirut lepeŋ joŋgi nan i lupet na kötumit na lupörikin i kadi na MATAT na diraddu i swöt lo lobot na. A nan meddi ŋutu wate sisi ’da nyu gwigwien kogwon kulya ti Tamuja logon a ŋun kana.

¹⁵ A lepeŋ pipije nan adi, Ŋuro lo ŋuto, do aje met kine kulya? Do mo memet ŋo temejik na mamana lwölwöŋ kine.

¹⁶ A kirut lepeŋ joŋgi nan i ’baŋ lo lukata lo kadi na MATAT; a nan meddi ŋutu merya murek wot mukanat i kötumit na kadi na MATAT i kwake na baraŋöa se ko pirit ’yuret na rubaŋgajin. Kilö ŋutu gwon i twöju na kolor i nyerun nanyit, ki ’dirinö kase boŋaddu i kadi na MATAT a komorsikan meddi swöt lo ’yure.

¹⁷ A lepeŋ pipije nan adi, ŋuro lo ŋuto, do aje met kine kulya? Kötumit na Yuda ŋona yeyeju adi ŋina a ŋo na pölilyö i koŋdya na ŋo na mamana i na pirit? Kilo ŋutu a tojoreju jur ko ŋonyesi a lepeŋat ’ya ’yi towoŋa nan bia parik. Mete, lepeŋat ’bo ’yu kumesikö kase ko kenia!

¹⁸ Nyena nan mo kikitari woran nio i lepeŋat; a nan mo tine pitökin se, a mo tine won konyen ko se kwöŋ. Ma ’di nagon se a gwikin köyö parik a nan mo tine yiŋ se kwöŋ.