Ejikele 7 - Bibilia Buk na Ŋun nagon koti luŋu a

’Dutet popo

¹ A kulyaet lo MATAT poki köyö adi,

² Do ŋuro lo ŋuto, nan MATAT ŊUN lo kulya ko jur lo Yisaraele adi, Ŋina gwe a ’dutet, ’dutet ŋina popo i swötön iŋwan ti jur.

³ ’Dutet ŋina popo kasu ki soŋinana, a nan mo kölöddi woran nio kasu loki, a nan mo ’duŋökiŋdye ta putesi gwoso i konesi kasu, a nan mo ropakiŋdye ta konesi kasu liŋ na mamana kine.

⁴ A nan mo tine pitökin ta, a nan mo tine won konyen ko ta kwöŋ, ama nan mo roropakin ta konesi kasu se ko konesi kasu na mamana nagon ta nyuŋ kökon kine. A kirut ta mo dene den adi nan logon a MATAT.

⁵ MATAT Ŋun lo kulya sona adi, Kulya narok kine popo, mete ta, kulya narok jore kine rurutuŋdya.

⁶ ’Dutet ŋina popo, iŋkoi, ŋina popo, lepeŋ aje pokin arabat kasu loki, mete ta, lepeŋ ŋina popo.

⁷ Ta ŋutu ti jur ’bukuluŋ, sasanyesi kine popo, diŋit ŋina gwe nyona, lor lo woŋesi jore gwe nyona, ama ti gwon a woŋesi ti lyöŋön i merya loki.

⁸ Nyena, ’de ’de kijek nan mo ’bu ’bukökin woran nio kasu loki, a nan pomani ko ta asut, a ’duŋökiŋdye ta putesi gwoso i konesi kasu, a nan mo ropakiŋdye ta gwoso i konesi kasu na mamana kine.

⁹ A nan mo tine pitökin ta, a nan mo tine won konyen ko ta kwöŋ, a nan mo ropakiŋdye ta konesi kasu se ko konesi kasu na mamana nagon ta nyuŋ kökon kine. A kirut ta mo dene den adi ŋilo a nan MATAT lo riŋga ta.

¹⁰ Mete ta, lor sasanyet malo aje po! Iŋkoi, lepeŋ aje burunyuŋdya ko ŋutu loki. Ture gwutet aje turö, bu ’ya na mugun gwuŋge gwugga.

¹¹ Mörö aje ’duruŋdyö ki anyen gwon a ture lo kulya narok; lele lose ’bayin logon mo pipituŋdyö, kode toro ’bo kase jore kode tukwörienjin kase, a ŋutu gwe ’bayin kase kiden logon sisira.

¹² Diŋit aje po, lor ŋilo mimiju nyona, ti kagwö-rök gwe ti lyöŋön, ko ti katugwörök gwe ti delya, kogwon woran gwon ko ŋutu kase jore loki.

¹³ Kogwon katugwörök mo ti yitö i ŋo na tugwör se kune a se nyuŋ gwon jörun. Kogwon woran gwon ko ŋutu kase jore loki, a ŋina woran mo tine löpukwe bot; a lele ŋuto mo tine ’debba ru nanyit kogwon toron nanyit.

¹⁴ Lepeŋat aje kuddya burugijin a iŋge teteŋdya ’börik ajo, ama a ŋutu gwe ’bayin lo tu i gor, kogwon woran nio gwon ko ŋutu kase jore loki.

¹⁵ Baŋdujin tukaresi kata kaŋo, a twanti iŋgo se ko dyaŋ gwe i lukata; iŋkoi, ŋutu lo gwon mu ’diŋ mo tatua ko baŋdujin, a se lo gwon köji kulo mo twatwane ko dyaŋ se ko twanti iŋgo.

¹⁶ A ko kulye kase a rwosoddu a woki i merya, a se mo gwine gwoso gureki ti pirit na ’dir, ŋuto geleŋ gwi ko toron nanyit.

¹⁷ Könisi kase liŋ a lokolokak, a kuŋwat kase liŋ gwe pötö.

¹⁸ A se jupuni boŋgwat terekesi a kujönö duma iŋge mok lepeŋat, a yu na kwe morgi lepeŋat liŋ, a kusik kase liŋ gwe a namelenyak.

¹⁹ A se mo gumbe pödöjin kase i kikolin, a dakap nase gwe gwoso ŋo nagon a lut, a pödo se ko dakap kase tine bulö lwokuŋdyö lepeŋat i lor lo woran na MATAT. Kilo ŋutu ti bulö toligga magor lose kode toyimönöju pelela kase ko se, kogwon toron nase na kine ŋo mo na tiŋdu se i ’doro.

²⁰ Lepeŋat bu ’ya ’börik ko minyojin lokwekwelen, logon se teten a nyömuejin kase lorok lo mamana; nyenagon a nan mo konakiŋdye se minyojin kase gwoso korodo.

²¹ A nan mo ŋutukiŋdye kilo minyojin i könisi ti Lwaka gwoso ŋo na gŋgora, a ŋutukiŋdye i ŋutu lorok ti kak a ryakat, a se mo toluddye kilo minyojin.

²² A nan mo löpuköddi komor nio kaŋo kase, anyen se toluddya pirit nio na ’but; a karyakak mo lupöni i köŋu na lepeŋ.

²³ Teteŋdi toŋot, kogwon jur aje jore ko ’buggö na rima, köji aje jore ko kulya narok.

²⁴ Nyenagon nan mo joŋdya ŋutu lorok parik logon lwölwö-ŋgu kulye jurön kulo i ruddya na kadijik kase, a nan mo to ’duddye ’du ’duŋga nase na riŋit, a piritön kase na rurwan kune mo tolutani toluta.

²⁵ Ko sasanyesi a po a se mo ga ’yi gwon taliŋ, ama a taliŋ mo gwe ’bayin.

²⁶ Kulya narok jore mo rurutuŋdya, a liŋio lorok jore mo rurutuŋdye rurutuŋdya; a se mo ga ’yi nebi anyen metakiŋdya se kulya ti Ŋun kanyit i töili, ama a tökoŋu na saresi iŋge likin ko koanejin i töilyet, a ŋutu temejik mo gwe ’bak jujuwesi na ’but.

²⁷ Mor molu dedelya, a ŋuto lo kukwön mo jorene ko kujönö a duma, a könisi ti ŋutu ti jur mo böŋdi böŋdu kogwon kujönö. A nan mo konakiŋdye lepeŋat gwoso nagon jujukin i konesi kase na, a nan mo ’duŋökiŋdye lepeŋat putesi gwoso na ’duŋge se putesi na; a se mo dene den adi nan logon a MATAT.