Ejikele 6 - Bibilia Buk na Ŋun nagon koti luŋu a

Nebi Ejikele a kikiŋdyö merya ti Yisaraele kulya narok

¹ A kulyaet lo MATAT poki köyö adi,

² Ŋuro lo ŋuto, komorgi merya ti Yisaraele, kikiŋdye lepeŋat ŋo narok adi,

³ Ta merya ti Yisaraele, yiŋge ta kulyaet lo MATAT Ŋun! MATAT Ŋun lo kulya ko merya, ko lurwat, ko luruki, se ko piritön na ’dir adi, Mete ta, nan, iŋkoi nan lepeŋ mo jajakin ta ŋutu logon ko baŋdujin i mörö ko ta, a nan mo kököröji piritön kasu kwakwasesi na gwon i ko ’dulan ti merya kine.

⁴ A piritön kasu ’yuresi ti rubaŋgajin mo konani a murwöki, a ’yuresi kasu ti bökur mo gwagwa-lakani gwagwalaka, a nan mo gumbe öpuö ti ŋutu kasu lo tatua kulo i komor na nyömuejin ti ŋunyen kasu.

⁵ A nan mo topeŋi öpuö ti ŋutu ti Yisaraele i komor na nyömuejin ti ŋunyen kase; a nan mo totorekiŋdye kuyu kasu lorga piritön kasu ’yuresi ti rubaŋgajin.

⁶ Köjinö kasu mo kokona a murwöki i piritön kasu nagon ta si ’da kata kine, a piritön kasu kwakwasesi na gwon i ko ’dulan ti merya kine mo konani a murwöki. A piritön kasu ’yuresi ti rubaŋgajin mo köröni körö a mo gwe a murwöki, a nyömuejin kasu logon a ŋunyen kilo mo gwagwa-lakani gwagwalaka a tu ’bakalani tu ’ba-kala, a piritön kasu ’yuresi ti bökur mo turöni kak, a kitajin kasu mo seyajine kaŋo.

⁷ A ŋutu lo tatua mo ’do ’done kasu kiden, a ta mo dene den adi nan a MATAT.

⁸ Ama nan mo pipitökin kulye ŋutu kasu jörun, anyen na toreki ’e ta i jurön nu, a ta mo gwe ko kulye logon a pesaddu kaŋo i tatua lo gwon i kiden na gweyajin ti ŋutu kulu.

⁹ A kirut ŋutu kasu logon a pesaddu i tatua kulo mo yeyene yeye nan i kiden na ŋutu ti jurön logon se a joŋa kata i to ’dupien kulu, adi, nan a tomie kogwon se gwon ko töilyet ti towutön a löpuköddi kaŋo köyö, a konyen kase ti towutön iŋge kepoddu nyömuejin logon a ŋunyen kana. A kirut se mo maŋdi ’börik ko ŋo liŋ narok nagon se a kon i konesi kase liŋ na mamana kine.

¹⁰ A se mo dene den adi nan a MATAT; nan ’bayin a ’burönit i jambu adi nan mo kokonakin se kine ŋo narok.

¹¹ MATAT ŊUN lo kulya sona adi, Ta kötumit na Yisaraele, naŋgi ta könisi kasu, lame ta lam ko delya, luluje ta adi, Wöidiö! kogwon konesi liŋ narok na mamana na kon ta kune; kogwon ŋutu kasu mo tatua ko baŋdujin, ko dyaŋ, se ko twanti iŋgo.

¹² Se logon gwolor pajo kulu mo twatwa ko twanti iŋgo, a se logon gwolor nyona kulo mo tatuani ko baŋdujin, a se logon a pitöki jörun a ko tatua kulo mo twatwane ko dyaŋ. A kirut woran nio ko lepeŋat mo ’bakani ’baka.

¹³ A kirut ta mo dene den adi nan a MATAT, na dotori öpuö ti ŋutu kasu lo tatua i kiden na nyömuejin kase logon a ŋunyen lorga piritön kase ’yuresi ti rubaŋgajin, i lurwat liŋ loki, ko i kusik ti merya liŋ, ko i mukökö ti kaden liŋ lo rurwan se ko i mukökö ti rinö lobot liŋ, kweja adi i piritön liŋ nagon se wukiŋdye nyömuejin kase liŋ rubaŋgajin lo mon paleleŋ kune.

¹⁴ A nan mo riöddi könin lio kase loki, a mo koŋdi jur lose a murwö i piritön liŋ nagon se sisi ’dari kune, iŋkoi, a naron parik lwölwöŋ yöbu na sese na gwon nyona ko Ribila. A kirut lepeŋat mo dene den adi nan logon a MATAT.