Ejikele 5 - Bibilia Buk na Ŋun nagon koti luŋu a

¹ Ŋuro lo ŋuto, ’dumuŋdye baŋdu lopi gwoso leleŋet, ’bariŋdi kwe inot se ko nyekem inot. A kirut ’dumuŋdye mijan anyen do tetembi, ko kore kor kilo kupir.

² Do ködyö ’yuŋa swöt geleŋ na musala i kiden na köji i diŋit nagon perok tumesi aje ’baka nu; a do ködyö ’du ’duŋuje swöt geleŋ na musala na kilo kupir ko baŋdu lorga köji; a do ratakiŋdye swöt geleŋ na musala na kilo kupir i köbuŋöt anyen wuwuköji, a nan mo ’dutuŋdye baŋdu kaŋo a riköddi se.

³ A do köti ködyö ’dumuŋdye kulye ku ’dik i kilo kupir, a do toraki konut i kume lo boŋgo.

⁴ Köti ’dumuŋdye kulye i kilo kupir, gubaki se i kimaŋ anyen nonokan; a kimaŋ nase mo ’dure i kötumit liŋ na Yisaraele.

⁵ MATAT ŊUN lo kulya sona adi, Na a Yerusalema nagon nan a tikin i kiden na gweyajin ti ŋutu se ko jurön lo lorga lepeŋ kulo.

⁶ Ŋutu kanyit a lorok i renya na jujuwesi kwe, se ko saresi kwe lo wurö lwölwöŋ kulu gweyajin ti ŋutu se ko jurön; kogwon ŋutu kanyit aje renya jujuwesi kwe a lepeŋat tine ’bön wörö gwoso i saresi kwe lo wurö.

⁷ Nyenagon nan MATAT ŊUN lo kulya sona adi, Kogwon ta a ŋutu logon a kawoŋok ti ’bön sara lwölwöŋ ŋutu ti jurön logon lorga ta kulo, a tine wörö i saresi kwe lo wurö kode ’debba jujuwesi kwe, a ta gwe a ko koŋdya ma ’di gwoso i saresi ti ŋutu ti jurön logon lorga ta;

⁸ nyenagon nan MATAT ŊUN lo kulya sona adi, Mete, nan, iŋkoi nan lepeŋ a miriku losu; nan mo ’du ’duŋökin ta putesi i kiden na köji nasu a ŋutu ti jurön memeddya.

⁹ Nyenagon kogwon konesi kasu narok liŋ na mamana, nan mo kokonakin ta ŋo naron nagon nan köju a ko kon ’beron, a nan mo tine nyöggu nye köti kwoŋ.

¹⁰ Nyenagon i kiden na köji nasu a komonye mo nyesi ŋwajik kase, a ŋwajik mo nyesi komonye kase, a nan mo ’duŋökiŋdye ta putesi, a nan mo ratakiŋdye pitönö ti ŋutu kasu lo pituŋdyö kulo i köbu-ŋötön liŋ ti kak anyen wuwuköji.

¹¹ Nyenagon nan MATAT Ŋun lo kulya sona adi, ’Diri ’diri gwoso na gwoŋdi nan na, nan mo tutukar ta, a nan mo tine pitökin ta, a nan mo tine won konyen ko ta kogwon ta a toluddya pirit nio nake na rurwan ko ŋo kasu liŋ nagon a lut, se ko ŋo kasu liŋ na mamana.

¹² A swöt geleŋ na musala na ŋutu kasu mo twatwane ko twanti iŋgo, a mo tutupöni ko dyaŋ i kiden na köji nasu, a swöt geleŋ na musala mo totokoni kak ko baŋdujin i gor i turön logon lorga köji, a nan mo ratakiŋdye swöt geleŋ na musala i köbuŋötön liŋ ti kak anyen wuwuköji, a nan mo ’dutuŋdye baŋdu kaŋo a riköddi se.

¹³ A kirut nan mo tutuŋge woran nio, a nan mo toliŋge woran nio na pape i lepeŋat, a nan mo gwe ko taliŋ. A ko woran nio na pape aje ’baka, a se mo deŋdi adi ŋilo a nan MATAT lo jambu ko yinö.

¹⁴ A nan köti mo koŋdi do köji a murwö, ko a ŋo na ’dö ’döyö i kiden na ŋutu ti jurön logon lorga do kulo, a ŋutu lo lwöŋöddi nyona kulo mo meddi kine kulya.

¹⁵ A na ’duŋökiŋdye nan ŋutu kulök putesi, i riŋga na se ko woran nio duma na pape nu, a do mo gwe a ŋo na ’dö ’döyö ko a na lalawe, ko a kweyet tokujönöet, ko a ŋo nagon tusöŋu ŋutu ti jurön liŋ logon lorga do kulo. Nan MATAT aje jambu.

¹⁶ A nagon nan mo purukiŋdyö do köji loya lorok ti dyaŋ, loya logon a tukaresi nu, nan mo pororo se i tukaŋu na ŋutu kulök; a nan mo ’ya ’yi sunyukiŋdyö ta dyaŋ, a nan mo nyökuŋdye kinyo losu a lo ’dit.

¹⁷ A nan mo sunyukiŋdye ta dyaŋ ko gwuruŋin anyen se ryaggu ŋwajik kasu. A twanti iŋgo se ko tatuja mo lwöŋöddi lwöpöddu kasu kiden, a nan mo jakiŋdye ta ŋutu logon ko baŋdujin i mörö ko ta. Nan MATAT aje jambu.