Ejikele 48 - Bibilia Buk na Ŋun nagon koti luŋu a

¹ A kine gwe a karin ti kötumitön; kweja adi suluja i ’dutet i swöt lo lobot, a lwöŋöddi Ketlon tojo lupet na Kamat, tojo Kasar-enon i lokökorit lo Damaseke i swöt lo lobot komorga Kamat, kweja adi suluja i swöt lo ’yure tojo i swöt lo tokotyaŋ kodyö gwon a koret na kötumit na Dan.

² Nyona ko kak na Dan, suluja i swöt lo ’yure tojo i swöt lo tokotyaŋ, ködyö gwon a koret na kötumit na Aser.

³ Nyona ko kak na Aser, suluja i swöt lo ’yure tojo i swöt lo tokotyaŋ, ködyö gwon a koret na kötumit na Napatali. Nyona ko kak na Napatali,

⁴ suluja i swöt lo ’yure tojo i swöt lo tokotyaŋ, ködyö gwon a koret na kötumit na Manase.

⁵ Nyona ko kak na Manase, suluja i swöt lo ’yure tojo i swöt lo tokotyaŋ, ködyö gwon a koret na kötumit na Epuraima.

⁶ Nyona ko kak na Epuraima, suluja i swöt lo ’yure tojo i swöt lo tokotyaŋ, ködyö gwon a koret na kötumit na Rubena.

⁷ Nyona ko kak na Rubena, suluja i swöt lo ’yure tojo i swöt lo tokotyaŋ, ködyö gwon a koret na kötumit na Yuda.

⁸ Nyona ko kak na Yuda, suluja i swöt lo ’yure tojo i swöt lo tokotyaŋ, ködyö gwon a koret nagon ta gelakin a swöt. Temet na ŋina koret a lokiliŋan aliŋan merya murek wot mukanat i tugalaŋ nanyit, a tojolan nanyit gwe jojo ko na kunie koresi na koraki kötumitön kune, suluja i swot lo ’yure tojo i swöt lo tokotyaŋ, a pirit nake na rurwan ködyö gwe i kiden nanyit.

⁹ A koret nagon ta gelakin nan MATAT a swot na ködyö gwe a lokiliŋan aliŋan merya murek wot mukanat ko tugalaŋ nanyit a lokiliŋan aliŋan merya murek.

¹⁰ A ŋina kak nake na rurwan kodyö kokorani sona: kweja adi koanejin ködyö wuju koret nagon temuŋdya a lokiliŋan aliŋan merya murek wot mukanat i swöt lo lobot, ko lokiliŋan aliŋan puök i swot lo tokotyaŋ i tugalaŋ nanyit, a i swöt lo ’yure ködyö gwe a lokiliŋan aliŋan puök i tugalaŋ nanyit, a tojolan nanyit i swöt lo loki ködyö gwe a lokiliŋan aliŋan merya murek wot mukanat, a pirit nake na rurwan nio na MATAT ködyö gwe i kiden nanyit.

¹¹ A ŋina pirit ködyö gwe a na nyakwariat ti Sadok logon a ’boroki a koanejin, logon a tiju ’debba saresi kwe kulo, a gwe a ko girara i toron gwoso na koŋdi Lewijin i diŋit na giraddi ŋutu ti Yisaraele i toron nu.

¹² A pirit na koraki koanejin i koret na gelaki nan MATAT na ködyö gwe a nake parik na rurwan, nyona ko kak na Lewijin.

¹³ A kak na Lewijin ko na koanejin riöddi ’börik jojo, kweja adi temet nanyit a lolikipan aliŋan merya murek wot mukanat i tojolan nanyit, a tugalaŋ nanyit gwe a lokiliŋan aliŋan puök.

¹⁴ Lepeŋat ködyö ti tugwör kode togwöja ko lele swöt lo ŋina kak kode tiŋdu lwakatyo ŋina kak nagon a na ’but na, kogwon nye a nake na rurwan nio na MATAT.

¹⁵ A pitönö nagon a pituŋdyö nagon temet nanyit a lokiliŋan aliŋan mukanat i tugalaŋ nanyit ko lokiliŋan aliŋan merya murek wot mukanat i tojolan nanyit na, a ŋina ködyö gwe a na kitajin ti köji, kweja adi piritön si ’daesi se ko nagon gwon kana, a köji ködyö gwe i kiden nanyit.

¹⁶ A kine gwe a temesi ti köji; kweja adi ti swöt lo lobot a lokiliŋan aliŋan iŋwan ko miajin mukanat, a ti swöt lo loki gwe a lokiliŋan aliŋan iŋwan ko miajin mukanat, a ti swöt lo ’yure gwe a lokiliŋan aliŋan iŋwan ko miajin mukanat, a ti swöt lo tokotyaŋ gwe a lokiliŋan aliŋan iŋwan ko miajin mukanat.

¹⁷ A piritön ti köji nagon gwon kana kune kodyö gwe a lokiliŋan miajin murek ko merya mukanat i swöt lo lobot, a i swöt lo loki gwe a lokiliŋan miajin murek ko merya mukanat, a i swöt lo ’yure gwe a lokiliŋan miajin murek ko merya mukanat, a i swöt lo tokotyaŋ gwe a lokiliŋan miajin murek ko merya mukanat.

¹⁸ A pirit na pitun-dyo nagon didiŋö ko pirit nake na rurwan na gwe a lokiliŋan aliŋan puök i swöt lo ’yure, a i swot lo tokotyaŋ gwe a lokiliŋan aliŋan puök, a ŋina ködyö parakiŋdye ŋutu lo kita köji i kuŋu na kinyo lose kata.

¹⁹ A ŋutu ti kötumitön liŋ ti Yisaraele lo kita köji kulo ködyö kuŋi lepeŋ.

²⁰ A kak ’bukuluŋ nagon ta mo gelakin a swöt na kodyö gwe a lokiliŋan aliŋan merya murek wot mukanat i swötön liŋ, kweja adi koret na pirit nake na rurwan se ko na köji.

²¹ A pitönö na pituŋdyö i swöton murek ti koret na pirit nake se ko na köji na kodyö gwe a na kasaranit. A kak na kasaranit ködyö suluje i swöt lo yure lo koret nake nagon a lokiliŋan aliŋan merya murek wot mukanat na, a ’dakara i swöt lo ’yure tojo ko lokökorit lo jur. A köti suluje i swöt lo tokotyaŋ lo koret na pirit nake nagon a lokiliŋan aliŋan merya murek wot mukanat na, a ’dakara i swöt lo tokotyaŋ tojo ko lokökorit lo jur. A ŋina kak na kasaranit ködyö diŋöni ko kak jin nagon a koraki kötumitön kune. A koret na pirit nake se ko pirit nake na rurwan na kadi na ŊUN ködyö gwe i kiden na kine kak jin.

²² Kweja adi koret na Lewijin ko na köji ködyö gwon i kiden na koret nagon a na kasaranit, ko i kiden na lokökorit lo Yuda ko lo Benyamina.

²³ A ko gwe gwoso kunie kötumitön kune, suluja i swöt lo ’yure tojo i swöt lo tokotyaŋ ködyö gwon a koret na kötumit na Benyamina.

²⁴ Nyona ko kak na Benyamina, suluja i swöt lo ’yure tojo i swöt lo tokotyaŋ, gwon a koret na kötumit na Simeona.

²⁵ Nyona ko kak na Simeona, suluja i swöt lo ’yure tojo i swöt lo tokotyaŋ, gwon a koret na kötumit na Yisakar.

²⁶ Nyona ko kak na Yisakar, suluja i swöt lo ’yure tojo i swöt lo tokotyaŋ, gwon a koret na kötumit na Jebulun.

²⁷ Nyona ko kak na Jebulun, suluja i swöt lo ’yure tojo i swöt lo tokotyaŋ, gwon a koret na kötumit na Gada.

²⁸ Nyona ko kak na Gada, i swöt lo loki, a lokökorit ködyö suluje Tamara tojo ko lelekesi ti pioŋ ti Meriba na gwon Kadesa, a kepoddi loro lo Ejipeto a lwöŋöddi tojo i Tör duma na ’balaŋ.

²⁹ Ŋina a kak nagon ta ködyo kökorakin i kötumitön ti Yisaraele a lomoriot kase, kweja adi kine a koresi kase. Kilo a kulyaesi kwe ti MATAT ŊUN.

Kötumitön ti köji se ko karin ti köji

³⁰ Kilo a kikolin logon lupörikin kaŋo köji kata. Temet na köji i swöt lo lobot a lokiliŋan aliŋan iŋwan ko miajin mukanat,

³¹ a gwe ko kötumitön musala, kweja adi kötumit na Rubena, ko kötumit na Yuda se ko kötumit na Lewi. (Kogwon kötumitön ti köji a gwiyö ko karin ti kötumitön ti Yisaraele.)

³² a temet na köji i swöt lo ’yure gwe a lokiliŋan aliŋan iŋwan ko miajin mukanat, a gwe ko kötumitön musala, kweja adi kötumit na Yosepa, ko kötumit na Benyamina, se ko kötumit na Dan.

³³ A temet na köji i swot lo loki gwe a lokiliŋan aliŋan iŋwan ko miajin mukanat, a gwe ko kötumitön musala, kweja adi kötumit na Simeona, ko kötumit na Yisakar, se ko kötumit na Jebulun.

³⁴ a temet na köji i swöt lo tokotyaŋ gwe a lokiliŋan aliŋan iŋwan ko miajin mukanat, a gwe ko kötumitön musala, kweja adi kötumit na Gada, ko kötumit na Aser, se ko kötumit na Napatali.

³⁵ A temet na köji ’bukuluŋ gwe a lokiliŋan aliŋan puök wot budok. Nyena suluja i ŋilu lor tojo ko ŋupi, a ŋina köji mo luŋuni adi MATAT-kata-ni.