Ejikele 47 - Bibilia Buk na Ŋun nagon koti luŋu a

Pioŋ tolikesi na ’dukun kaŋo i kadi na Ŋun

¹ A kirut ŋilo ŋuto nyököddi nan i kotumit na kadi na Ŋun, a nan meddi pioŋ lelekun kaŋo i lukak na lupet na kotumit na ŋina kadi i swot lo ’yure (kogwon komor na kadi diraddu i swot lo ’yure); a pioŋ ’doke kak i swot lo lutaten na kadi na Ŋun i swot lo loki na pirit ’yuret na rubaŋgajin.

² A lepeŋ joŋgi nan kaŋo tiri kötumit na gwon i swöt lo lobot na, a lepeŋ joŋgi nan ko kiko lo kaŋo tojo ko kötumit na gwon kaŋo nagon diraddu i swöt lo ’yure na; a nan meddi pioŋ ’dukun kaŋo madaŋ i swöt lo loki.

³ A ŋuto iti kaŋo i swöt lo ’yure ko pata kanyit i könin, a lepeŋ tembi temba lokiliŋan aliŋ geleŋ i tojolan nanyit, a lepeŋ tiŋdi nan i wöröji i pioŋ lukata, a gwe ŋor köyö i korokolo.

⁴ A lepeŋ köti tembi temba lokiliŋan aliŋ geleŋ, a tiŋdi nan i wöröji ŋerot i pioŋ lukata, a gwe ŋor köyö i kuŋwat. A lepeŋ köti tembi temba lokiliŋan aliŋ geleŋ, a tiŋdi nan i wöröji ŋeröt i pioŋ lukata, a gwe ŋor köyö i mukök.

⁵ A köti tembi temba lokiliŋan aliŋ geleŋ, a gwe a kare logon ti bulö laŋa, kogwon pioŋ aje jore a gwe a logulu parik ŋuto jojo wasaddu kata, iŋkoi, ŋuto ti bulö juröddu kata.

⁶ A kirut lepeŋ pipije nan adi, ŋuro lo ŋuto, do aje inet kine kulya le? A kirut lepeŋ nyököddi nan bot i kijit na kare.

⁷ A nagon nan aje yitö bot i kijit nu, a nan meddi kaden jore parik i swöton liŋ murek ti ŋilo kare.

⁸ A lepeŋ takiŋdye nan adi, Kine pioŋ ’dokon i swöt lo ’yure a ’doke tojo Araba, a nagon se aje tulöddu i tör nagon pioŋ kanyit a narok nu a se mo tiŋdi pioŋ ti tör i gwon a na ’but.

⁹ Pirit nagon ŋilo kare ’dokon kata nu a po liŋ lo koko ’yokta kata kulo mo rune ru, a somot mo gwe kata jore parik, kogwon ŋilo kare ’dokon nyu anyen pioŋ ti tör gwon a na ’but; iŋkoi, pirit nagon ŋilo kare ’dokon kata nu a po liŋ mo rune ru.

¹⁰ a kalokak ti somot mo gwo ’de i kijiton ti ŋina tör. A ŋina pirit mo gwe a lowet na ku ’yilan suluja En-gedi tojo En-egelaim; a gweyajin ti somot liŋ mo gwe nyu jore parik gwoso somot ti Tör duma na ’balaŋ;

¹¹ ama piritön nagon a wo ’do ’do se ko nagon a ŋulu ’bujin kune, pioŋ kase mo ti wora a na ’but, ama kine piritön mo kolöki a ti ’balaŋ.

¹² A gwe-yarijin liŋ ti kaden logon ludweki kase nyenyei kulo mo ’duŋe i kijitön ti ŋilo kare i swötön kanyit liŋ murek. Koropo kase mo ti teteyon, a ludweki kase mo tine jaran i toran, ama se mo radan ludweki logon a ludukö temba i yapa, kogwon pioŋ kase ’dukun i pirit nake na rurwan. Ludweki kase mo gwon a kinyo, a koropo kase mo gwe a tolikesi.

Lokökoritan se ko kora na kak

¹³ Nan MATAT ŊUN lo kulya adi, Kulo a lokökoritan logon ta ködyö kökoroji kak a lomoriot i kiden na kötumitön puök wot murek ti Yisaraele. Kötumit na Yosepa ködyö wuju koresi murek.

¹⁴ Kak nagon nan aje milyeju i tiŋdu na merenyejin kasu nu ta ködyö kokorakiŋdya ’börik jojo; iŋkoi, ŋina kak ’dukin kasu a lomoriot i guba na guralan.

¹⁵ A ŋilo ködyö gwe a lokökorit lo jur: suluja i swöt lo lobot i Tör duma na ’balaŋ lwöpöddi Ketlon tojo ko lupet na Kamat, a iti tu tojo Sedada,

¹⁶ tojo Berota ko Sibiraim na gwon i lokökorit lo gwon i kiden na Damaseke se ko Kamat, tojo Kasar-atikon na gwon i lokökorit lo Auran.

¹⁷ Nyena kweja adi lokökorit ködyö suluja i tör tojo Kasar-enon na gwon i swot lo lobot na gwon i lokökorit lo Damaseke ko lo Kamat tojo lobot, a ŋilo mo gwe a swöt lo lobot.

¹⁸ A i swöt lo ’yure, lokökorit ködyö suluja Kasar-enon i kiden na Auran ko Damaseke kepoddu Yardene i kiden na Gilada ko jur lo Yisaraele tojo tör na gwon i swöt lo ’yure tojo Tamara, a ŋilo mo gwe a swöt lo ’yure.

¹⁹ A i swöt lo loki, suluja Tamara tojo lelekesi ti pioŋ ti Meriba na gwon Kadesa a kepoddi Loro lo Ejipeto, a lwöŋöddi tojo i Tör duma na ’balaŋ, a ŋilo mo gwe a swöt lo loki.

²⁰ A i swöt lo tokotyaŋ, Tör duma na ’balaŋ mo na gwon a lokökorit tojo i pirit nagon komorga lupet na Kamat, a ŋilo mo gwe a swöt lo tokotyaŋ.

²¹ Nyena a ta ködyö kökorakiŋdye ’börik ŋilo jur gwoso i kötumitön ti Yisaraele.

²² A ta ködyö kökorakiŋdye ’börik a lomoriot i guba na guralan, ta se ko Lwaka logon si ’da kasu kiden logon a yuŋwe ŋwajik kasu kiden kulo. A ta ködyö konakiŋdye lepeŋat a ŋwajik lo yuŋwe i jur lo Yisaraele. Lepeŋat ko ta ködyö kökoraki lomoriot i kiden na kötumitön ti Yisaraele i guba na guralan.

²³ Lwakatyo logon si ’da i nene kötumit lo ködyö kökoraki lomore nanyit. Kilo a kulyaesi kwe ti MATAT ŊUN.