Ejikele 46 - Bibilia Buk na Ŋun nagon koti luŋu a

¹ Nan Matat Ŋun lo kulya adi, Kotumit na lupörikin i ’baŋ lo lukata lo kadi nio nagon diraddu i swot lo ’yure na kodyo gwon kinu i perok buker logon a kitaesi, a kodyo ŋani i lor lo sabata ko i yapa wilo.

² A kasaranit kodyo lupöri baraŋöa na kadi najo na gwon i kotumit na kaŋo tojo i lukata, a lepeŋ gwo ’de nyona ko kodini lo kotumit. A koanejin kodyo wukiŋdye rubaŋga lo ’yu ’yura ’buluŋ logon a lo kasaranit se ko rubaŋgajin kanyit ti taliŋ. A ŋilo kasaranit kodyo rugwuŋökine kak i kwakwaddu i lupet na kotumit nagon tuloddu lukata. A lepeŋ kirut lupöni kaŋo, ama a kotumit tine kinu tojo ko koriri i ’doro na kolor.

³ A i sabatajin ko i yapala wilo, a ŋutu ti jur kodyo rugwuŋökine kak kaŋo i lupet na ŋinu kotumit i kwakwaddu koyo i komor nan Matat.

⁴ A rubaŋga lo ’yu ’yura ’buluŋ logon kasaranit kodyo wukin nan Matat i lor lo sabata lu kodyö gwe a yisi buker logon ’bak yuyukesi se ko lopijot kobukyo logon ’bak yuyuket,

⁵ a lepeŋ kodyö tiŋdi epa geleŋ na ’bolot nagon wuki a ’dokesi i pirik na geleŋ ko lopijot kobilityo, a wukiŋdye ’bolot jore gwoso nagon nye bubulo i pirik na geleŋ ko yisi, a tiŋdi yin geleŋ na welet i pirik na geleŋ ko epa geleŋ na ’bolot.

⁶ a i yapa wilo, a lepeŋ kodyö wukiŋdye dwöt lo ’dit logon ’bak yuyuket, ko yisi buker se ko lopijot köbilityo geleŋ, kilo toro ’bo liŋ ködyö gwon ’bak yuyukesi;

⁷ a lepeŋ ködyö tiŋdi epa geleŋ na ’bolot nagon wuki a ’dokesi i pirit ga geleŋ ko dwöt, ko epa geleŋ na ’bolot i pirit na geleŋ ko lopijot köbilityo, a tiŋdi ’bolot jore gwoso nagon nye bubulö i pirit na geleŋ ko yisi, a tiŋdi yin geleŋ na welet i pirit na geleŋ ko epa geleŋ na ’bolot.

⁸ Ko kasaranit lupö lukata, lepeŋ ködyö lupöri baraŋöa na gwon i kadi najo na gwon i kötumit na, a yitöri kiko lo geleŋ.

⁹ A ko ŋutu ti jur a po köyö i komor nan Matat i roriot lo wulwe, ŋutu lo lupöri kötumit na gwon i swöt lo lobot i kwakwaddu kulo ködyö tu kaŋo i kötumit na gwon i swöt lo loki na; a ŋutu lo lupöri i kötumit na gwon i swöt lo loki kulo ködyö iti kaŋo i kötumit na gwon i swöt lo lobot na;a kulye ŋutu ködyö gwe ’bayin logon yitöri kötumit na lupöri se lukata na, ama se liŋ geleŋ geleŋ ködyö tu kaŋo gwogwo.

¹⁰ Ko lepeŋat lupö lukata a kasaranit lupöni ko se i pirit na geleŋ, a nagon se lupene kaŋo nu, a nye ködyö lupene ko se i pirit na geleŋ.

¹¹ A i roriot ko i diŋitan na wulwe ’bolot nagon wuki a ’dokesi kune ködyö gwon a epa geleŋ i pirit na geleŋ ko dwöt, ko epa geleŋ i pirit na geleŋ ko lopijot köbilityo, a ’bolot nagon ködyö wuki ko yisi i pirit na geleŋ kune ködyö gwe jore gwoso nagon ŋuto bubulö tiŋdu se, ko yin geleŋ na welet i pirit na geleŋ ko epa geleŋ na ’bolot.

¹² a ko kasaranit wukiŋdya nan Matat ’doket na tupalikan na töili, kode ŋina ’doket a rubaŋga lo ’yu ’yura ’buluŋ, kode a rubaŋgajin ti taliŋ, a kötumit na diraddu i swöt lo ’yure na ködyö gakine lepeŋ; a lepeŋ wukiŋdye rubaŋga lonyit lo ’yu ’yura ’buluŋ se ko rubaŋgajin kanyit ti taliŋ gwoso na koŋdi nye i sabata na. A kirut nye kodyo iti kaŋo, a i mukok nagon nye aje tu kaŋo nu, a kotumit kinuni kinu.

¹³ Temba i lor a do kodyo tiŋdi kilolor lo kiŋa geleŋ logon ’bak yuyuket a rubaŋga lo ’yuraki nan Matat ’buluŋ, iŋkoi, do tiŋdu kilolor temba i ko ’bure.

¹⁴ Kweja adi do wukiŋdya ’bolot nagon a ’dokesi i pirit na geleŋ ko ŋilo kilolor temba i ko ’bure. ŋina ’doket na ’bolot kodyo gwon a swot geleŋ na buker na epa se ko swot geleŋ na musala na yin na welet anyen ŋolarikin kine bolot. ’Bolot nagon tiki nan Matat a ’dokesi kune a saraki anyen wuki ŋupi.

¹⁵ Nyen a kilolor, ko ’bolot nagon a ’dokesi se ko welet kodyo wukine temba i ko ’bure a rubaŋga lo ’yu ’yura ’buluŋ ŋupi.

¹⁶ A nan Matat ŋun kulyani adi, Ko kasaranit a ’doŋga lele lo ŋwajik kanyit ko swot lo kak nanyit lomore, a mo gwe a na ŋwajik kanyit, kogwon ŋina a kak nagon se mo rurut.

¹⁷ Ama ko nye a ’doŋga lele lo ’dupi kanyit ko swot lo kak nanyit, a ŋina kak mo gwe a Wa ŋilo ŋuto tojo ko kiŋa logon lepeŋ mo gwe a luitot lu, a kirut ŋina kak kodyo nyokokine kasaranit; ake ŋwajik ti ŋilo kasaranit ka ’de bubulo ’debba ŋo na ’doggi, monye se na i kak nanyit lomore.

¹⁸ A kasaranit kodyo tine ru ’ya ŋutu i riŋaddu na lele swot lo kak jin kase lomoriot; nye kodyo korakiŋdya ŋwajik kanyit lomoriot kase i kak naŋyit lomore, anyen ŋutu kwe ti Matat kodyo gwon ti rekin kaŋo ka ’de ka ’de i lomoriot kase.

¹⁹ A kirut ŋilo, ŋuto joŋgi nan i lupet nagon nyona ko kotumit nagon lupuŋdyo i kadijik nagon diraddu i swot lo lobot kune. (Kine kadijik a Kökoratu a na ’di ’dik nagon a nake na rurwan a ti koanejin.) A lepeŋ kwekiŋdye nan adi nene pirit kata i ’dutet nase na kine kadijik i swot lo tokotyaŋ.

²⁰ A lepeŋ takiŋdye nan adi, Na a pirit nagon koanejiŋ kodyo deŋi rubaŋgajin ti lyaŋan se ko rubaŋgajin ti toron, a ke ’yi ’bolot nagon a ’dokesi; se kodyo ti joŋ lepeŋat i ’baŋ lo kaŋo an se joŋga kelan na rurwan na Ŋun i ŋutu kata.

²¹ A kirut lepeŋ joŋgi nan kaŋo i ’baŋ lo gwon kaŋo, a tuwöröddi nan i tusesi iŋwan ti ’baŋ; a tusesi liŋ ti ’baŋ gwe ko kulye ’baŋin geleŋ geleŋ.

²² Kilo ’baŋin lo gwon i tusesi iŋwan kulo gwon ko mariŋan. Tojolan nase geleŋ geleŋ gwon a lokiliŋan merya iŋwan, a tugalaŋ nase gwe a lokiliŋan merya musala, kweja adi se liŋ iŋwan temba jojo.

²³ a kilo ’baŋin iŋwan liŋ gwe ko ’doke lo ŋurupo lolorga se, ko salesi a dipa nyona ko kilo ’dokiŋ ti ŋurupo.

²⁴ a kirut lepeŋ takiŋdye nan adi, Kine a piriton deresi nagon ŋutu lo kita i kadi na Ŋun kulo kodyo derakiŋdye ŋutu rubaŋgajin.