Ejikele 45 - Bibilia Buk na Ŋun nagon koti luŋu a

Saresi i kulya ti kora na kak

¹ A ko ta mo kökoroji kak i gu-ba na guralan nu, a ta ködyö koruŋdye nene kak kata a nake na rurwan nagon a nio na MATAT, a jolan nanyit ködyö gwe a lokiliŋan aliŋan merya murek wot mukanat, a tugalaŋ nanyit gwe a lokiliŋan aliŋan merya murek, a nye ködyö gwe a nake na rurwan i lokökoritan kanyit liŋ.

² A i ŋinu kak a ta ködyö koruŋdye nene kak nagon a regorego a na pirit nake na rurwan. Temet nanyit a lokiliŋan miajin mukanat i swötön liŋ. A nene pirit nagon a kölöki kana lolorgi pirit nagon a regorego, temet nanyit a lokiliŋan merya mukanat i tugalaŋ nanyit i swötön liŋ.

³ A i ŋina kak nake a ta ködyö temuŋdye nene pitit nagon jolan nanyit a lokiliŋan aliŋan merya murek wot mukanat, a tugalaŋ nanyit gwe a lokiliŋan aliŋan puök, anyen pirit nake na rurwan na totopuŋdya gwon kata.

⁴ A ŋina pirit ködyö ko-rwene a nake na rurwan na jur, a nye ködyö gwe a na koanejin lo kita i pirit nake na rurwan logon mijun nyona i kitakiŋdya na nan MATAT. Iŋkoi, ŋina pirit ködyö gwon a na kadijik kase mora ko pirit nagon kadi nake na rurwan ’duköki kata.

⁵ A nene pirit nagon jolan nanyit a lokiliŋan aliŋan merya murek wot mukanat, ko tugalaŋ nanyit a lokiliŋan aliŋan puök na kodyö gwe a na Lewijin lo kita köyö i kadi kulo; a köjinö nagon se sisi ’dari kune kodyo gwe i ŋina pirit.

⁶ A ta ködyo koruŋdye nene pirit nagon didiŋö ko kak nake na rurwan a na köji; tugalaŋ nanyit a lokiliŋan aliŋan mukanat, a tojolan nanyit gwe a lokiliŋan aliŋan merya murek wot mukanat; a nye ködyö gwe a na kötumit na Yisaraele.

⁷ A koret na kasaranit ködyö gwe i lele swot lo kak nake na rurwan nagon didiŋö ko kak nagon a na köji na ko i lele swöt, kweja adi nene kak ’dakara i swöt lo tokotyaŋ na kak nake na rurwan nagon didiŋö ko kak nagon a na köji na, a nene ’dakara i swöt lo ’yure lo ŋina kak. A jolan nan kak na kasaranit ködyö gwe jojo ko kak jin nagon a koraki gwoso i ’duŋesi ti kötumit na Yisaraele, a ŋina kak nanyit suluje i lokökorit lo gwon i swöt lo tokotyaŋ tojo ko lokökorit lo gwon i swöt lo ’yure lo jur.

⁸ A ŋina kak ködyö gwe a lomore nanyit i Yisaraele. A ŋutu kwe kasarak ködyö köti tine ru ’ya ŋutu kwe, ama a se ködyö tiŋdi kötumit na Yisaraele lo jur a lose gwoso i ’duŋesi kase ti kötumit na Yisaraele.

⁹ Nan MATAT ŊUN lo kulya sona adi, Ta kasarak ti Yisaraele, aje jo! Kölöki ta ŋonyan se ko ryaggu nasu ŋina, ’duŋge ta putesi gwogwo, koŋdi ta ko torigwo; kölöki ta ririkijö na ŋutu kwe i kak jin kase na kukuru, ŋilo a nan MATAT ŊUN lo jambu.

Saresi i kulya ti mijan na temba ko torigwo

¹⁰ Ta ködyö gwon ko mijanyan nagon temba jojo, ko wuyit nagon a epa nagon temba jojo se ko wuyit nagon a bat nagon temba jojo.

¹¹ A epa se ko bat ködyö gwe a temet na geleŋ; kweja adi ŋo na gwon i epa lukata ko ŋo na gwon i bat lukata temet nase jojo a swöt topuökit geleŋ na wuyit nagon a komer; komer ködyö yeŋon temba jojo.

¹² A ŋurupit sekele geleŋ ködyö gwe a gerajin merya murek, a sekelejin mukanat ködyö gwe a sekelejin mukanat gwak, a sekelejin puök ködyö gwe a sekelejin puök gwak, a sekelejin merya mukanat ködyö gwe a mina nagon ta temba ko nye.

¹³ A kine ŋo ködyö gwe a ’dokesi nagon ta wuwukin nan ŊUN, kweja adi i komer geleŋ na ’bolot swöt geleŋ na buker na epa ködyö ’dumwe kata, ko i komer geleŋ na ’bolot saora swöt geleŋ na buker na epa saora ködyö ’dumwe kata.

¹⁴ Saret i kulya ti welet gwon sona, adi: i kor geleŋ na welet swöt topuökit na bat geleŋ na welet ködyö ’dumwe kata. (Kor geleŋ gwoso komer nagon temba bajin puök.)

¹⁵ A i teŋ geleŋ na yidin miajin murek köbilityo geleŋ ködyö ’dumwe kata i kötumitön ti Yisaraele. Kine ŋo liŋ tiki anyen wuki a ’dokesi ti ’bolot, ko a rubaŋgajin lo ’yu ’yura ’buluŋ ko a rubaŋgajin ti taliŋ, anyen toke ’ya ŋutu ti Yisaraele, ŋilo a nan MATAT ŊUN lo jambu.

¹⁶ Ŋutu liŋ ti jur ködyö tiŋdu kasaranit lo Yisaraele kine ’dokesi.

¹⁷ A ŋina ködyö gwe a kita na kasaranit i tiŋdu na ŋo ti rubaŋgajin lo ’yu ’yura ’buluŋ, ko ’bolot nagon a ’dokesi, se ko rubaŋgajin ’bu ’bukesi i diŋit naroriot, ko i diŋit na yapala wilo, ko i sabatajin, kweja adi i roriot liŋ lo wulwe ti kötumit na Yisaraele; iŋkoi, lepeŋ ködyö tiŋdu ŋo ti rubaŋgajin ti toron, ko ’bolot nagon a ’dokesi, ko rubaŋgajin lo ’yu ’yura ’buluŋ se ko rubaŋgajin ti taliŋ a tokelesi ti kötumit na Yisaraele.

¹⁸ Nan MATAT ŊUN lo kulya adi, I lor geleŋ lo yapa togeleŋ, do ködyo ’dumuŋdya dwöt lo ’dit logon ’bak yuyuket anyen toke ’yi pirit nake na rurwan.

¹⁹ A koane kodyö ’dumuŋdye kunie rima nagon a ti rubaŋga lo toron, a ’bulukiŋdye se i kaden ti kötumit na kadi nio, ko i tusesi iŋwan ti pirit ’yuret na rubaŋgajin, se ko i kaden ti kotumit nagon lupörikin i ’baŋ lo lukata.

²⁰ A ta kodyo koti koŋdi sona i perok buryo ti yapa kogwon ŋuto lo lyaŋan kode logon yeyeesi a namunyak, nyena a ta ködyo toke ’yi kadi nio sona.

²¹ A i perok puök wot iŋwan ti yapa togeleŋ, a ta kodyo koŋdi rorwe lo Pasaka, a ta kodyo nyesi ambata nagon ’bak kape ko perok buryo.

²² a i ŋilu lor a kasaranit kodyo ’dumuŋdye dwot logon a lo ’dit a lonyit ko a lo ŋutu liŋ ti jur a lo rubaŋga lo toron.

²³ A i ku lo perok buryo ti rorwe, a lepeŋ kodyo ’dumuŋdye dwönin lo ’di ’dik buryo ko lopijoki köbilu buryo logon ’bak yuyukesi, anyen wuki a rubaŋga lo yuraki nan Matat ’buluŋ temba i lor; se ko lopijot meetyo a lo rubaŋga lo toron temba i lor.

²⁴ a lepeŋ kodyo ’dumuŋdye epa geleŋ na ’bolot nagon wuki a ’dokesi a na dwot geleŋ, ko epa geleŋ na ’bolot a na lopijot kobilityo geleŋ se ko yin geleŋ na welet a na epa geleŋ na ’bolot.

²⁵ A i perok puök wot mukanat ti yapa toburyo i rorwe logon koti joŋga perok buryo, a nye kodyo koti koŋdi jojo i ’dumuŋdya na kine ŋo anyen wuki a rubaŋgajin ti toron, ko rubaŋgajin lo ’yu ’yura ’buluŋ, ko ’bolot nagon wuki a ’dokesi se ko welet.