Ejikele 44 - Bibilia Buk na Ŋun nagon koti luŋu a

Kitajin na kona i kadi na ŊUN

¹ A kirut ŋilo ŋuto nyököddi nan bot i kötumit na kaŋo na pirit nake na rurwan, nagon diraddu i swöt lo ’yure na; a lepeŋ iŋge kinu.

² A MATAT takiŋdye nan adi, Na kötumit nagon gwon kinu na ködyö yeŋon kinu, ŋuto ködyö ’bayin lo lupöri nyin; kogwon nan MATAT ŊUN lo Yisaraele aje lupöri nyin; nyenagon lepeŋ ködyö yeŋon kinu.

³ Ake kasaranit tuŋ ködyö bubulö si ’da kata i nyesu na kinyo köyö i komor nan MATAT; lepeŋ bubulö lupöri baraŋöa na gwon i kadi najo na gwon i kötumit na, a yitöri kiko lo geleŋ.

⁴ A kirut lepeŋ joŋgi nan lukata tiri kötumit na gwon i swöt lo lobot tojo i komor na kadi na MATAT; a nan boŋgi boŋga, a nan meddi minyo lo MATAT a jore i kadi na MATAT, a nan ’dorone kak rupu.

⁵ A MATAT takiŋdye nan adi, Ŋuro lo ŋuto, tirikuni tiriku ’bura, meddi ’bura, ko yiŋe yiŋ ’bura po liŋ nagon nan takin do kine i kulya ti jujuwesi se ko saresi liŋ ti kadi nio na MATAT. Tirikuni ’bura i tiju na kötumit nagon lupörikin i kadi nio na MATAT se ko kötumitön nagon lupörikin kaŋo i pirit nake na rurwan kune.

⁶ Taki ŋutu karerenyak ti kötumit na Yisaraele adi, MATAT ŊUN lo kulya adi, Ta kötumit na Yisaraele, to ’duddye ta po kasu liŋ na mamana kine.

⁷ Ta aje rukuŋdyö Lwaka logon töilyet kase se ko mugunya kase a ko tawero kilo anyen gwon i pirit nio nake na rurwan, i tolu-ddya na kadi nio i diŋit nagon ta wukiŋdya nan kinyo lio nu, kweja adi kine a lokorio nagon a welesi se ko rima, a lepeŋat iŋge ’beleŋgu tomoret nio a ’ya ’yi konesi kasu na mamana kine.

⁸ A ta gwe a ko tiju po kwe nake na rurwan, kölumbö a ta tiŋdi kilo ŋutu i ’debba na pirit nio nake na rurwan.

Lewijin

⁹ Nan MATAT ŊUN lo kulya adi, Lwaka logon a ko tawero i töilyet ko i mugunya kulo ’bayin logon bubulö lupö i pirit nio nake na rurwan, ’bayin ma ’di Lwaka lo si ’da i kiden na ŋutu ti Yisaraele.

¹⁰ Ama Lewijin logon aje girara kaŋo pajo köyö kulo i kepoddu na nyömuejin kase logon a punyen i diŋit na giraddi ŋutu ti Yisaraele i toron nu, lepeŋat ködyö ŋogoŋ riŋet na toron nase.

¹¹ Lepeŋat ködyo kita i pirit nio nake na rurwan i tiju na kötumitön ti kadi nio, ko i kita köyö i kadi lukata. Lepeŋat ködyö ’duŋgö rubaŋgajin lo ’yu ’yura ’buluŋ se ko rubaŋgajin logon wuki kogwon kulya ti ŋutu, a lepeŋat ködyö gwo ’de kase i komor i kitakiŋdya na se.

¹² Nyena kogwon se a kitakiŋdya lepeŋat i komor na nyömuejin kase logon a punyen, a iŋge tiŋdu kötumit na Yisaraele i ’doro kogwon toron nase, nyenagon nan MATAT ŊUN lo kulya adi, ’Diri ’diri nan aje milyeju i kulya kase adi se mo poŋga ripet na toron nase.

¹³ Lepeŋat ti po köyö nyona i kitakiŋdya na nan gwoso koanejin; lepeŋat ti mijun nyona ko nene na po kwe nake na rurwan se ko i po nake parik na rurwan na totopuŋdya; kölumbö a lepeŋat mo wuji yu na kusik kogwon po na mamana nagon se a kon kune.

¹⁴ Ama nan mo titikin se a katiyuk ti kadi nio, anyen koŋdya kitajin kanyit liŋ se ko po liŋ nagon kikitarikin i lukata nanyit kune.

Koanejin

¹⁵ Ama koanejin logon a Lewijin logon a nyakwariat ti Sadok, se lo tiju pirit nio nake na rurwan i diŋit na giraddi ŋutu ti Yisaraele kaŋo köyö nu; kilo ŋutu ködyö lo mijun köyö ni i kitakiŋdya na nan, a se molu gwo ’de köyö i komor anyen wukiŋdya nan lokorio nagon a welesi se ko rima. Kilo a kulyaesi kwe ti MATAT ŊUN.

¹⁶ Lepeŋat ködyö lo lupö i pirit nio nake na rurwan, a lepeŋat miju nyona ko misa nio anyen kitakiŋdya nan, a se lo ’debbi jujuwesi kwe.

¹⁷ A na tiri se i kötumitön na lupörikin i ’baŋ lo lukata nu, a se ködyo jupukiŋdye boŋgwat ti waratat naparere; a se tine jupu boŋgwat nagon a tetena ko kupir ti kijakwa i diŋit na kitari se i kötumitön nagon lupörikin i ’baŋ lo lukata ko i lukata na kadi nu.

¹⁸ A se ködyö doggi kusik kase ko emalan nagon a ti waratat naparere, a jupukiŋdye boŋgwat ti mok nagon a ti waratat naparere, a se ködyö tine doggu mukökö kase ko ŋo nagon joŋdya ŋiŋiret.

¹⁹ A nagon se iti kaŋo ko ŋutu yu i ’baŋ lo kaŋo nu, a se ködyö rusuŋdye boŋgwat nagon se kikitari kune kaŋo a kolö-kiŋdye se i kadijik na ’di ’dik nagon a nake na rurwan kune; a se ködyö jupukiŋdye kunie boŋgwat ka ’de, an se joŋga kelan na rurwan na ŊUN i ŋutu kata ko boŋgwat kase.

²⁰ Lepeŋat ködyö ti ’bariŋdu kusik kase kode kölökiŋdyö kupir kase ti kusik i ’duŋö a lojo, ka ’de se bubulö ’duŋgö kupir kase ti kusik a lorututök madaŋ.

²¹ Lele koane ködyö ’bayin logon möju binyo i ŋerot na lupöri nye i ’baŋ lo lukata nu.

²² Lepeŋat kodyö ti yemba karu ’bejin kode ŋutu nagon aje yanya, ama tuŋ bubulö yemba kö ’disi na yuŋwe i kötumit na Yisaraele, kode karu ’bejin nagon köju a wate ti koanejin.

²³ A se ködyö todinikiŋdye ŋutu kwe i koruŋdya na ŋo nake na rurwan ko nagon abur kana, ko i koŋa na ŋo nagon ’bayin a nake na rurwan se ko nagon a nake na rurwan.

²⁴ A ko ŋutu gwon i rerenya ko ’börik, a lepeŋat ködyö kitani gwoso ka ’duŋök i lilija na putesi, a se ködyö ’duŋge putet gwoso i ’duŋesi kwe. A se ködyö ’debbi jujuwesi kwe se ko saresi kwe lo wurö i diŋitan kwe liŋ na wulwe, ko i tiju na sabatajin kwe a loke lo rurwan.

²⁵ A se ködyö tine toluddya ’börik i tu nase nyona ko ŋuto lo twan; koane bubulö toluddya mugun ake ko monye a twan, kode ŋote, kode ŋuro lonyit lulalet kode nanakwan, kode luŋaser, kode kiaser nagon a ko yema.

²⁶ A koane kodyö kenakiŋdye mugun perok buryo i mukök na tokela nanyit, a lepeŋ kirut mo gwe a loke.

²⁷ A i lor logon lepeŋ lupöri i pirit nake na rurwan i ’baŋ lo lukata i kita i pirit nake na rurwan lu, a lepeŋ ködyö wukiŋdye rubaŋga a lo toron nanyit, ŋilo a nan MATAT ŊUN lo jambu.

²⁸ Lepeŋat ködyö ti wuju kak a lomore kogwon nan lo gwon a lomore lose. A ta ködyö tine tiŋdu se koret i Yisaraele kogwon nan lo gwon a koret lose.

²⁹ Ama lepeŋat bubulö nyesu ’bolot logon a ’dokesi, ko rubaŋga lo toron, se ko rubaŋga lo lyaŋan, a ŋo liŋ ti Yisaraele nagon a korwe adi a kwe ti ŊUN kune ködyö gwe a kase.

³⁰ A ki-nyojin waŋesi ti kokwe ti gweyarijin liŋ ka ’de ka ’de, se ko ŋo liŋ nagon ’du-mwe i ŋo nagon ta a wukin kune ködyo gwe a ti koanejin; a ta ködyö köti tiŋdi koanejin ’bolot na rarayaka nagon a waŋesi ti kokwe, anyen ta ko midijik kasu böŋö ’bo ’boria.

³¹ A koanejin ködyö tine nyesu nene ŋo nagon twan ka ’de kode nagon a koa ko gworoŋ, kode nye a kwenti kode a kijakutat.