Ejikele 43 - Bibilia Buk na Ŋun nagon koti luŋu a

Minyo lo ŊUN a po a jorene i kadi nanyit

¹ A i mukök a lepeŋ joŋgi nan i kötumit, kweja adi ŋina a kötumit nagon diraddu i swöt lo ’yure na.

² A nan meddi minyo lo ŊUN lo Yisaraele popo i swöt lo ’yure, a woŋon na po nanyit gwe gwoso woŋon na karya jore adi wunu, a kak iŋge pararaju ko minyo lonyit.

³ A ŋo na met nan köyö i töili kune gwe gwoso na met nan na pöri nye i tukaŋu na köji nu, ko gwoso ŋo na met nan köyö i töili nyona ko kare Kebar kunu; a nan ’dorone kak rupu.

⁴ A minyo lo MATAT lupöni i kadi nanyit tiri kötumit na diraddu i swöt lo ’yure na.

⁵ A mulökötyo lo po ko ŊUN ’biluŋdye nan ki, a joŋgi nan i ’baŋ lo lukata, a minyo lo MATAT iŋge jore i lukata na kadi nanyit.

⁶ A kirut nan yiŋge gworo jambu ko nan i lukata na kadi na ŊUN a ŋilo ŋuto gwo ’dan köyö nyona.

⁷ a ŋilo gworo takiŋdye nan adi, Ŋuro lo ŋuto, na a pirit na si ’daet nio na tumatyan, ko a pirit nio nagon nan gwogwo ’di ’e, nagon nan mo gwo-gwolorgi i kiden na ŋutu ti Yisaraele ŋupi na. A ma ’di lepeŋat kode moran kase mo köti tine köŋu karin kwe ko towutön nase se ko öpuö ti moran kase.

⁸ Lepeŋat a tiŋdu lupet na kötumit nase didiŋö ko kötumit nio, iŋkoi, lepeŋat a tiŋdu kaden kase ti kötumit didiŋö ko kaden ti kötumit nio, a gorom nagon a mariŋ tuŋ ka ’de na koŋi nan ko se. A se iŋge kör karin kwe nake ko ŋo kase na mamana nagon se kökon kune nyena a nan iŋge totum se i woran nio.

⁹ Nyena ti se wusara towutön nase se ko öpuö ti moran kase pajo ko nan, a nan mo gwolore kase kiden ŋupi.

Saresi i kulya ti kadi na ŊUN ko pirit ’yuret na rubaŋgajin

¹⁰ Ŋuro lo ŋuto, nyönyököki kötumit na Yisaraele kulya ti ŋina kadi nio na ŊUN, ko meta nanyit se ko temesi kanyit, anyen kusik kase ködyö yuyu kogwon toronjin kase.

¹¹ A ko kusik kase aje yu ko ŋo liŋ na kon se kune, nyönyököki lepeŋat kulya liŋ ti ŋina kadi, ko gweya nanyit, ko kötumitön na lupörikin kaŋo se ko lukata, ko miret nanyit ko saresi ’dukesi. Nyönyököki lepeŋat kine ŋo liŋ ko wuröki se kak a lepeŋat memeddya, anyen se ködyö yeye kine ŋo ko kökon se.

¹² Ŋilo a saret lo kadi na ŊUN; kweja adi kak ’bukuluŋ i swöton liŋ suluja i kwe na mere mo gwon a nake parik na rurwan; iŋkoi, ŋilo a saret lo kadi na ŊUN.

¹³ A kine gwe a temesi ti pirit ’yuret na rubaŋga.jin nagon tema a lokiliŋan, (kweja adi lokiliŋ geleŋ a ’yalaki ’dapanit na könin kata). A tojolan na gwo ’diet nanyit ki gwe a lokiliŋ geleŋ, a tugalaŋ nanyit i tuset gwe a lokiliŋ geleŋ, a togulu nanyit suluja i kutuk tojo kiden gwe a swöt na lokiliŋ i lolorga na swötön kanyit liŋ.

¹⁴ A ŋina ködyö gwe a tojolan na pirit ’yuret na rubaŋgajin, kweja adi suluja kak i gwo ’diet tojo ko i mukök na ŋurupit lobot gwe a lokiliŋan murek ki, a tugalaŋ nanyit i tuset gwe a lokiliŋ geleŋ; a suluje i mukök na ŋurupit lobot tojo ko mukök na ŋurupit lo ’dutet gwe a lokiliŋan iŋwan ki, a tugalaŋ nanyit i tuset gwe a lokiliŋ geleŋ;

¹⁵ a suluje i mukök na ŋurupit lo ’dutet tojo i kwe nanyit nagon rubaŋgajin ’yura kata na gwe a lokiliŋan iŋwan ki, a goŋesi kanyit iŋge gweye ki a oŋgwora iŋwan logon a lokiliŋan geleŋ geleŋ.

¹⁶ A kwe nanyit nagon rubaŋgajin ’yura kata na gwe a regorego, a tojolan nanyit gwe a lokiliŋan puök wot murek, ko tugalaŋ nanyit a lokiliŋan puök wot murek köti.

¹⁷ A i mukök nanyit gwe a ŋurupit lobot logon tojolan nanyit a lokiliŋan puök wot iŋwan, a tugalaŋ nanyit gwe a lokiliŋan puök wot iŋwan köti, a togulu nanyit suluja i kutuk tojo kiden gwe a swöt na lokiliŋ i lolorga na swötön kanyit liŋ. A gwo ’diet na ŋina pirit ’yuret na rubaŋgajin gwe a lokiliŋ geleŋ i tuset lonyit, a kiyesi gwe kata nagon diraddu i swöt lo ’yure.

¹⁸ A lepeŋ takiŋdye nan adi, Ŋuro lo ŋuto, nan MATAT ŊUN lo kulya adi, Kilo a saresi logon ŋutu kodyö kekeŋ i lor lo ’duŋge se pirit ’yuret na rubaŋgajin lu, anyen rubaŋgajin ’yu ’yura ’buluŋ kata, a rima gwagwatakine kanyit loki.

¹⁹ A do ködyö tiŋdi Lewijin koanejin logon a ti kötumit na Sadok logon mijun köyö nyona i kitakiŋdya na nan kulo, dwöt lo ’dit anyen wuki nan a rubaŋga lo toron. Kilo a kulyaesi kwe ti MATAT ŊUN.

²⁰ A do ködyö ’dumuŋdye kunie rima ti ŋilo dwöt, a ’bulukiŋdye i oŋgwora iŋwan ti pirit ’yuret na rubaŋgajin kulo, ko i tusesi iŋwan ti kutuk nanyit logon lolorga lepeŋ kulo; nyena a do lalaji pirit ’yuret na rubaŋgajin sona, i toke ’ya na lepeŋ.

²¹ A do köti ’dumuŋdye dwöt a lo rubaŋga lo toron logon ’yura i pirit nagon a kore a na kadi na ŊUN i kaŋo na kak nake na rurwan.

²² A i lor tomurek a do wukiŋdye lopijot meetyo logon ’bak yuyuket a lo rubaŋga lo toron; a lepeŋat ködyö lalaji pirit ’yuret na rubaŋgajin gwoso na lalaji se ko dwöt na.

²³ Ko do aje tutuŋgö lalaju, a do wukiŋdye dwöt logon ’bak yuyuket se ko lopijot kobilityo logon ’bak yuyuket lo jwe i teŋ.

²⁴ A do wukiŋdye se koyö ko MATAT i komor, a koanejin ködyö kwikwije se ko ’balaŋ, a wukiŋdye se a rubaŋga lo ’yuraki nan MATAT ’buluŋ.

²⁵ A do wukiŋdye lopijot meetyo, ko dwöt se ko lopijot köbilityo a ti rubaŋga lo toron ko perok buryo temba i lor; kilo a toro ’bo logon ködyö gwon ’bak yuyukesi.

²⁶ A koanejin ködyö joŋgi perok buryo i toke ’ya na pirit ’yuret na rubaŋgajin, anyen nye lupu a nake, a se ködyö geluŋdye nye a nake na rurwan.

²⁷ A nagon kilo perok aje ’baka nu, a suluje i lor tobudök tojo ko ŋerot, a koanejin ködyö wukiŋdye rubaŋgajin kasu lo ’yu ’yura ’buluŋ se ko rubaŋgajin kasu ti taliŋ i loki na ŋina pirit ’yuret, a nan mo wuji ta. Kilo a kulyaesi kwe ti MATAT ŊUN.