Ejikele 42 - Bibilia Buk na Ŋun nagon koti luŋu a

Kadijik na gwon nyona ko kadi na ŊUN kune

¹ A kirut ŋilo ŋuto joŋgi nan kaŋo i ’baŋ lo gwon kaŋo na kadi na ŊUN komorga swot lo lobot, a joŋgi nan i nene kadi nagon a kora a kadijik na ’di ’dik, komorga pirit nagon a kölöki kana a ’baŋ na, köti komorga nene kadi na gwon i swöt lo lobot.

² A tojolan na kadi najo nagon a kora a kadijik na ’di ’dik na gwe a lokiliŋan mia geleŋ, a tugalaŋ nanyit gwe a lokiliŋan merya mukanat.

³ Nyena a kine kadijik iŋge tetena a koŋiloreki musala musala, a piritön wöriesi nagon i barapöak i kune gwe kata i kine koŋiloreki musala nagon totoboŋ kune. A kine piritön wöriesi metaddi i pirit nagon a kölöki kana a ’baŋ, nagon morakiŋdya i ’baŋ lo lukata na, a köti metaddi i pirit na ’du i ’baŋ lo kaŋo.

⁴ A kiko gwe kata logon tirikin i komor na kine kadijik tojo i ’baŋ lo lukata, a tugalaŋ na ŋilo kiko gwe a lokiliŋan puök, a tojolan nanyit gwe a lokiliŋan mia geleŋ. A kötumitön ti kine kadijik komorgi swöt lo lobot.

⁵ A kadijik na ’di ’dik na gwon i koŋilore na ’dutet kune gwe a nagusulak lwö-lwöŋ na gwon kak se ko na gwon kiden kune, kogwon piritön woriesi nagon i barapöak i kune a riŋun pirit ’duket.

⁶ Kogwon se gwon a koŋiloreki musala musala, a se gwe ’bak togwi ’diesi gwoso ti kadijik na gwon i ’baŋin kune, nyena a kadijik na gwon ki kune iŋge tŋgusula lwölwöŋ kadijik na gwon kak se ko na gwon kiden kune.

⁷ A gorom gwe kata kaŋo nagon yumba kadi najo nagon a kökora a kadijik na ’di ’dik komorga ’baŋ lo gwon kaŋo na kadi na ŊUN, i komor na kadi najo nagon a kökora a kadijik na ’di ’dik. Ŋina gorom jolan nanyit a lokiliŋan merya mukanat.

⁸ Kogwon jolan na ŋina kadi najo nagon a kökora a kadijik na ’di ’dik, nagon gwon i ’baŋ lo kaŋo na a lokiliŋan merya mukanat, ama a jolan na ŋinu kadi najo nagon a kökora a kadijik na ’di ’dik, nagon komorga kadi na ŊUN nu gwe a lokiliŋan mia geleŋ.

⁹ A lupet gwe kata i ’dutet na ŋina kadi najo nagon a kökora a kadijik na ’di ’dik, na gwon i ’baŋ lo kaŋo na i swöt lo ’yure ko ŋuto lo gwon i ’baŋ lo kaŋo lupö lukata, i suluet na gorom nagon a mariŋ na kaŋo.

¹⁰ A i swöt lo loki lo kadi na ŊUN komorga pirit nagon a kölöki kana a ’baŋ na, köti komorga kadi najo, a nene kadi najo gwe kata nagon a kökora a kadijik na ’di ’dik,

¹¹ nagon kiko tirikin kanyit i komor. Lepeŋat gwon jojo ko kadi najo nagon a kökora a kadijik, na gwon i swöt lo lobot na, i jolan nase, ko i tugalaŋ nase, ko i kötumitön nagon lupörikin kaŋo, ko i gweya nase, se ko i kötumitön kase na lupörikin lukata.

¹² A lupet gwe kata i ’dutet na ŋina kadi najo nagon komorga swöt lo loki na. Ŋina lupet gwon i swöt lo ’yure ko ŋuto lupö i kikolin wöriesi komorga gorom nagon a koret.

¹³ A kirut ŋilo ŋuto takiŋdye nan adi, Kine kadijik na gwon i swöt lo lobot ko na gwon i swöt lo loki komorga pirit nagon a kölöki kana a ’baŋ kune a nake na rurwan, nagon koanejin logon mijun nyona ko MATAT kulo mo nyesi rubaŋgajin loke parik lo rurwan mo ’de ’yi rubaŋgajin loke parik lo rurwan nyu, kweja adi ’doket na ’bolot, ko rubaŋga lo toron, se ko lo lyaŋan, kogwon ŋina pirit a nake na rurwan.

¹⁴ Ko koanejin a lupö i pirit nake na rurwan, lepeŋat ködyö ti tu i ’baŋ lo kaŋo ’bak kölökiŋdyö boŋgwat kase kitaesi kak i kine kadijik na ’di ’dik kata, kogwon se a nake na rurwan; lepeŋat mo rusukiŋdyö kunie boŋgwat i ŋerot na tiri se nyona ko pirit nagon a wulöki ŋutu logon kana nu.

Temet na ’baŋ lo kadi na ŋun

¹⁵ A nagon ŋilo ŋuto aje tutuŋgö temba lukata na kadi na ŊUN nu, a lepeŋ joŋgi nan kaŋo lupöri kötumit na diraddu i swöt lo ’yure na, a tembi nu pirit ’bukuluŋ.

¹⁶ A lepeŋ tembi nu pirit i swöt lo ’yure ko pa ’duŋi temet a temuŋdye a lokiliŋan miajin mukanat.

¹⁷ A lepeŋ löpuköni löpukö a tembi nu pirit i swöt lo lobot ko pa ’duŋi temet, a temuŋdye a lokiliŋan miajin mukanat,

¹⁸ a lepeŋ köti löpuköni löpukö a tembi ŋinu pirit i swot lo loki ko pa ’duŋi temet, a temuŋdye a lokiliŋan miajin mukanat.

¹⁹ A lepeŋ köti löpuköni löpukö a tembi ŋinu pirit i swöt lo tokotyaŋ ko pa ’duŋi temet, a temuŋdye a lokiliŋan miajin mukanat.

²⁰ Iŋkoi, lepeŋ aje temba ŋinu pirit i swötön liŋ iŋwan, a gorom nagon lolorga lepeŋ na temuŋdye a lokiliŋan miajin mukanat i jolan nanyit, a tugalaŋ nanyit gwe a lokiliŋan miajin mukanat ŋina gorom koŋa ko pirit nake na rurwan, ko nagon abur kana na.