Ejikele 41 - Bibilia Buk na Ŋun nagon koti luŋu a

goroma i swötön murek kulo.

¹ A a kirut lepeŋ joŋgi nan i kadi najo na kadi na ŊUN, a tembi togwi ’diesi lo tomoraki i ’dutesi ti goroma, a gwe a lokiliŋan buker i tugalaŋ nase i lele swöt ko lele sona köti.

² A tugalaŋ na kötumit gwe a lokiliŋan puök, a goroma na gwon i swötön kanyit murek kune gwe a lokiliŋan mukanat mukanat. A nye tembi tojolan na ŋina kadi a gwe a lokiliŋan merya iŋwan, a tugalaŋ nanyit gwe a lokiliŋan merya murek.

³ A kirut lepeŋ lupöni i toŋkwet, a tembi togwi ’diesi logon a tomoraki i ’dutesi ti goroma i kötumit na ŋinu toŋkwet, a gwe a lokiliŋan murek murek. A nye tembi kötumit, a tugalaŋ nanyit gwe a lokiliŋan buker, a goroma na gwon i swötön kanyit murek kune gwe a lokiliŋan buryo buryo.

⁴ a lepeŋ tembi ŋina toŋkwet na gwon i ’dutet na kadi najo na kadi na ŊUN na; a tojolan nanyit gwe a lokiliŋan merya murek, a tugalaŋ nanyit köti gwe a lokiliŋan merya murek. A lepeŋ takiŋdye nan adi, Na a pirit nake parik na rurwan na totopuŋdya.

⁵ A lepeŋ tembi tu ’bökik na gorom na kadi na ŊUN a gwe a lokiliŋan buker; a nye tembi kadijik na ’di ’dik nagon a totomoraki lolorga ŋina kadi kune, a tugalaŋ nase gwe a lokiliŋan iŋwan iŋwan.

⁶ a kine kadijik na ’di ’dik gwe ko koŋiloreki musala musala, kweja adi kadijik na ’di ’dik merya musala i koŋilore geleŋ. A kunie piritön nagon a rimuŋdyo kaŋo kune gwe kata lolorga gorom na kadi i mara kanyit, anyen toggu kadijik na ’di ’dik, anyen se kodyö gwon ti tökö ko gorom na kadi na ŊUN.

⁷ A kadijik na ’di ’dik na gwon i koŋiloreki kune ŋaji ŋaju a nagalaŋak kogwon piriton na rimuŋdyo kaŋo i gorom na kadi na ŊUN kune a ŋaaddu ’börik a nagalaŋak i gweyaji nase ki i lolorga na ŋina kadi. A i merete lo kadi gwe a kiyesi na kiyaji ’e ki, anyen ŋuto lo gwon kak bubulö kiyaddu tojo ko koŋilore na ’dutet, lwöŋoddi koŋilore na gwon kiden na.

⁸ A nan koti iŋge meddya pirit na ’du lolorga kadi na ŊUN. A temet na pipilesi ti kadijik na ’di ’dik na gwon i mara kune gwe a pa ’duŋi ’bukuluŋ logon temet nanyit a lokiliŋan lojo buker.

⁹ A tu ’bökik na gorom na kaŋo nagon kadijik na ’di ’dik a totomoraki kata na gwe a lokiliŋan mukanat, a pirit na ’du lolorgi kine kadijik na ’di ’dik.

¹⁰ A pirit nagon a kölöki kana a ’baŋ na lolorgi kadi na ŊUN i swötön liŋ i kiden na kunie kadijik se ko kine kadijik na ’di ’dik. A temet na tugalaŋ na ŋilo ’baŋ gwe a lokiliŋan merya murek.

¹¹ A kötumitön ti kine kadijik gwe kata, nene i swöt lo lobot lo kadi, a nene gwe i swöt lo loki lo kadi, nagon lupörikin kaŋo i pirit na ’du nagon lolorga kadi na. A tugalaŋ na ŋina pirit na ’du nagon a ko ’dukörikin na gwe a lokiliŋan mukanat lolorga kadi na ŊUN.

¹² A tugalaŋ na kadi nagon komorga ’baŋ lo lolorga kadi na ŊUN i swot lo tokotyaŋ na gwe a lokiliŋan merya buryo, a jolan nanyit gwe a lokiliŋan merya buŋwan, a tu ’bökik na gorom na kadi gwe a lokiliŋan mukanat.

¹³ A kirut ŋilo ŋuto tembi kadi na ŊUN a gwe a lokiliŋan mia geleŋ, a temet na pirit nagon kölöki kana a ’baŋ na, ko ŋinu kadi nagon komorga kadi na ŊUN na, se ko temet na goroma kanyit liŋ gwe a lokiliŋan mia geleŋ.

¹⁴ Köti a tugalaŋ na komor na kadi na ŊUN i swöt lo ’yure se ko pirit nagon a kölöki kana a ’baŋ na gwe a lokiliŋan mia geleŋ.

¹⁵ a kirut lepeŋ tembi tojolan na ŋina kadi nagon komorga pirit nagon a kölöki kana a ’baŋ na. (Ŋilo ’baŋ gwon i swöt lo tokotyaŋ lo kadi na ŊUN.) A temet na ŋina kadi se ko piritön woriesi na gwon i mara kanyit murek kulo gwe a lokiliŋan mia geleŋ. A kadi najo na kadi na ŊUN ko toŋkwet se ko baraŋöa na kaŋo

¹⁶ Iŋge mukö ko baulan, a se liŋ musala gwe ko kwilisesi nagon tulöddu kaŋo a nagusulak i swötön liŋ, a kine kwilisesi iŋge goro ko kaden kase i mara.

¹⁷ A i toŋkwet, ko i kadi na gwon köke, ko i goroma liŋ lukata ko kaŋo suluja kak tojo ko kwilisesi, ko i kwake na gwon i kötumit ki

¹⁸ iŋge gigiruki pöjinö ti kerubajin ko ti kaden ti tömur, a ködini geleŋ lo tömur gwe i kiden na keruba ko keruba. A kilo kerubajin liŋ gwe ko komorsikan murek murek;

¹⁹ kweja adi komor geleŋ a na ŋuto diŋa ködini lo tömur i swöt geleŋ, a komor tomurek na gwe a na kömiru titinti diŋa ködini lo tömur lo gwon i lele swöt lo. Lepeŋat a gigiruki i swötön liŋ ti kadi na ŊUN;

²⁰ A pöjino ti kerubajin se ko ti kaden ti tömur iŋge gigiruki i gorom suluja kak tojo i kötumit ki.

²¹ A kaden ti kötumit na kadi najo na kadi na ŊUN gwe a regore-gojin. A nene po gwe kata i komor na pirit nake na rurwan a tetena ko kaden

Pirit ’yuret na rubaŋgajin

²² gwoso pirit ’yuret na rubaŋgajin. Jolan nanyit ki a lokiliŋan musala, a jolan nanyit kak gwe a lokiliŋan murek, a tugalaŋ nanyit gwe a lokiliŋan murek; a gopesi kanyit, ko kak nanyit, se ko mara kanyit gwe a kaden. A ŋilo ŋuto takiŋdye nan adi, ŋina a misa na gwon ko MATAT i komor.

Kötumitön

²³ A kadi najo na kadi na ŊUN, se ko pirit nake na rurwan liŋ gwe ko kötumitön murek murek.

²⁴ Kine kötumitön a tetena swötön murek murek nagon wiwiŋgö.

²⁵ A pöjinö ti kerubajin se ko ti kaden ti tömur iŋge gigiruki i kötumitön ti kadi najo na kadi na ŊUN, gwoso na gigiruki i goroma loki kune; a bau duma muŋge komor na baraŋöa kaŋo i loki nanyit.

²⁶ A kwilisesi nagon tulöddu kaŋo a nagusulak gwe kata nagon pöjinö ti kaden ti tömur a gigiruki i swötön kase liŋ i mara ti baraŋöa.