Ejikele 4 - Bibilia Buk na Ŋun nagon koti luŋu a

Nebi Ejikele a kweki adi Yerusalema mo tutuma

¹ Ŋuro lo ŋuto, ’dumuŋdye tuŋ nadon ko petaki konut i komor, ko geraki köji nagon a Yerusalema i loki nanyit;

² tumbe lepeŋ, ko teteŋdi takajin najo ki a tumesi kanyit, ko ’du ’yi ’domio dumalak ti lipo anyen mörörikin lepeŋ, ko ’beggi merajin köti nagon tumarikin lepeŋ, ko to-gwi ’dikiŋdye tito lobot i lorga na gorom nagon a mariŋ na köji anyen jokarikin lepeŋ anyen dukakiŋdya le-peŋ kak.

³ ’Dumuŋdye doka ko tiki lepeŋ a mariŋ nagon a witi i kiden nasu ko ŋina köji, ko ti do komorgi lepeŋ; a nye mo gwe gwoso nagon a tuma, a do mo lo gwe a katumanit. A kine ŋo na kona kine gwe a kweyet i kötumit na Yisaraele.

⁴ A kirut pirikine kak ko merete lo kadoŋe, a nan mo sopakiŋdye riŋet na toron na kötumit na Yisaraele konut i mugun; do mo ŋogoŋ riŋet na toron na kötumit na Yisaraele ko perok gwoso na piriki ’e do ko ŋilo merete na.

⁵ Kogwon nan a wulökin do perok miajin musala ko merya buŋwan. Kilo perok jojo ko kiŋajin logon riŋa-rikin toron nase. Nyena do mo ŋogoŋ riŋet na toron na kötumit na Yisaraele sona.

⁶ A ko do aje tutuŋgö kilo perok, a do mo köti pirikine kak daŋ tomurek ko merete lo lutaten, a do mo ŋoŋgi ri-ŋet na toron na Yuda ko perok merya iŋwan; nan aje kenakin do lor geleŋ a lo kiŋajin liŋ geleŋ geleŋ.

⁷ A do ködyö komorgi Yerusalema i tuma nanyit, a do ködyö rukunyukiŋdye könin ilot köke anyen do jojo mörö; a do keŋ keju kulya narok i kulya kanyit.

⁸ Mete, nan mo totor do ko patala, anyen do gwon ti lölöpuggö mugun tojo ko do a tutuŋgö perok logon do tutumbe kulo.

⁹ A kirut ti do ’dumuŋdye ’bolot, ko ’bolot saora, ko lorutu, ko lorutu lo rayaka, ko leyot, se ko gijö, ŋo ’yi se i kalaba, ko teteŋdi se a ambatajin. A do mo nyesi se i diŋit nagon do gwon kak ko merete perok miajin musala ko merya buŋwan nu.

¹⁰ A kinyo logon do mo nyönyö lo mo gwe ko temet, kweja adi swötön musala ti iŋwan ti rotolo geleŋ; a do mo nyesi daŋ geleŋ i lor.

¹¹ Do mo köti möju pioŋ ko temet, kweja adi malaŋgijin murek ti pioŋ nagon a ko jore; a do mo möji se daŋ geleŋ i lor.

¹² A do mo nyesi ambatajin kunök nagon pelo gwoso ambatajin ti ’bolot saora, do agu ködyö pe ’yu se ko kin ti ŋutu gwoso kaden a ŋutu me-meddya.

¹³ A MATAT kulyani adi, Ŋutu ti Yisaraele mo nyesu kinyo logon a lut gwoso ŋilo i kiden na ŋutu ti jurön logon nan mo riköddi lepeŋat kata kulu.

¹⁴ A kirut nan mo ’yi adi, Böŋö pon MATAT ŊUN, nan ’beron a ko toluddya mugun; nan a ko nyesu ŋo nagon twa ka ’de, kode ŋo nagon koa ko gworoŋ; nan a ko sŋoddu lokore na ’burön köyö i kutuk suluja i to ’dit nio tojo ko soŋinana.

¹⁵ A kirut lepeŋ kulyani ko nan adi, Nan mo tiŋdu do kin ti kiteŋ ’bayin a ti ŋutu, anyen do pe ’yi ambatajin kunök.

¹⁶ A nye köti kulyani ko nan adi, Ŋuro lo ŋuto, mete, nan mo nyönyökun kinyo a lo ’dit i Yerusalema; lepeŋat mo nyesu kinyo ko temet kukujönö; a lepeŋat mo möji pioŋ ko temet dedelya.

¹⁷ Nyena a kinyo se ko pioŋ mo tine temakiŋdya se, a se mo totoboŋe ko ’börik dedelya. A lepeŋat mo soke sokan kogwon toronjin kase.