Ejikele 39 - Bibilia Buk na Ŋun nagon koti luŋu a

Tela na Goga

¹ Do ŋuro lo ŋuto, keŋ keju kulya narok i kulya ti Goga; taki lepeŋ adi, MATAT ŊUN lo kulya adi, Mete, nan a miriku ilot do Goga kasaranit lo Rosi, ko lo Meseke, se ko lo Tubala.

² Nan mo lölöpuk do, a riköddi do ŋerot, a mo joŋdi do kaŋo i ’dutet na kak i swöt lo lobot, a mo joŋgi do i mörö ko merya ti Yisaraele.

³ A nan mo gwutökiŋdye daŋ inot kak konut i könin kadoŋe, a mo tiŋdi loya i ’do ’do kak konut i könin lutaten.

⁴ A do ko teŋon kunok liŋ se ko gweyajin ti ŋutu lo gwon ko do kulo mo ’do ’done a twatwa i merya ti Yisaraele loki; a nan mo tiŋdi ta a kinyo lo gweyarijin liŋ ti kwen logon nyesu lokore, a gwuruŋin köti mo nyesi ta.

⁵ A ta mo ’do ’done i yöbu nagon a ’dar kana; kogwon nan aje jambu, nan MATAT ŊUN lo kulya.

⁶ A nan mo soŋdi kimaŋ i ’yuŋa na Magoga se ko ŋutu logon si ’da ’bura ’bak kujönö i juron lo gwon i tikönyö kulo; a se mo deŋdi adi nan logon a MATAT.

⁷ A nan mo tiŋdi ŋutu kwe Yisaraele i deŋdya na karin kwe nake na rurwan, a nan mo tine kölökiŋdyö karin kwe nake na rurwan i körö köti kwöŋ, a jurön mo deŋdi adi nan logon a MATAT ŋilo Loke lo Yisaraele.

⁸ Nan MATAT ŊUN lo kulya adi, Mete, lor logon nan aje jambu kulya kanyit lo ŋilo popo, a nye ’diri mo lo gwe.

⁹ A ŋutu lo si ’da i köjinö ti Yisaraele kulo mo iti kaŋo i ’du ’dumba na tito möriesi anyen nama a kaden. Kine tito a ’bukwö dumalak ko na ’di ’dik, ko daŋin, ko loya, ko turya wulukön se ko goro. A lepeŋat mo nambi se ko kiŋajin buryo.

¹⁰ A lepeŋat mo tine ’dekan galaddu kaden mu ’diŋ kode tu i rudwö i toggu na kaden na nanama, ama a se mo nambi tito möriesi; nyena a lepeŋat mo ’dumaddi tito ti ŋutu logon a po i ’dumaddu na tito kase kulo, iŋkoi, se mo ryaggu tito ti ŋutu logon a po i ryaggu na tito kase kulo. Kilo a kulyaesi kwe ti MATAT ŊUN.

¹¹ A i ŋilu lor a nan mo tiŋdi Goga pirit nuket i Yisaraele, kweja adi pirit na ’dir na luŋu a Abarim, na gwon i swöt lo ’yure na tör, a kiko mo gwe ’bayin logon kajölök lwöŋöddi nyin, kogwon Goga se ko teŋon kanyit jore ti ŋutu mo nuka nyu; a ŋinu pirit na ’dir mo luŋuni a na Goga se ko teŋon kanyit ti ŋutu.

¹² A kötumit na Yisaraele mo joŋgi yapala buryo i nugga na lepeŋat anyen toke ’ya jur.

¹³ Iŋkoi, ŋutu liŋ ti jur mo nugga lepeŋat, a kulya kase mo kuörö kuörö i lor logon nan mo kweji minyo lio lu. Kilo a kulyaesi kwe ti MATAT ŊUN.

¹⁴ a ŋutu mo lo wulwene logon ŋupi wöŋu jur anyen kwökwöddu kuyu logon a kölöki anyen joŋga se i nugga, ko anyen toke ’ya jur; a lepeŋat mo suluje ga ’yu kuyu i ’dutet na kilo yapala buryo.

¹⁵ A nagon kilo ŋutu mo wöŋu jur ’bukuluŋ nu, a ko lele lose a meddya kuyutyo lo ŋuto, a nye togwi ’dikiŋdye kweyet i nyona na ŋilo kuyutyo, tojo kanukak mo a joŋga ŋilo kuyutyo i nugga i pirit na ’dir na luŋu a na Goga se ko teŋon kanyit ti ŋutu na.

¹⁶ (A köji na gwon i ŋinu pirit köti mo luŋuni a Teŋon.) Nyena a se mo toke ’yi jur i ŋilo kiko.

¹⁷ Nan MATAT ŊUN lo kulya adi, Do ŋuro lo ŋuto, luŋgi gweyarijin liŋ ti kwen se ko gwuruŋin liŋ adi, Momoruŋdye ta, ko poŋdi ta ni, iŋkoi, tutu-nuŋdye ta ’börik i swötön liŋ i rorwe lio duma lo rubaŋga logon nan tetena-kin ta i loki na merya ti Yisaraele lo. A ta mo nyesi lokore a möji rima.

¹⁸ A ta mo nyesi lokorio ti ŋutu walan, ko a möji rima ti kasarak ti na kak. Iŋkoi, kilo a köbilu lopijoki, ko yisi, ko yidin, ko dwönin, kilo liŋ a toro ’bo lopir ti Basan.

¹⁹ A ta mo nyesi welet tojo ko ta a yimönö, a ta mo mere meran ko rima i rorwe lo rubaŋga logon nan tetenakin ta lo.

²⁰ A i ŋilo rorwe lio a ta mo nyesi kusanjin ko kajoŋak kase, ko ŋutu walan, se ko gweyarijin liŋ ti kamörök tojo ta a yimönö. Kilo a kulyaesi kwe ti MATAT ŊUN.

²¹ A nan mo kweji minyo lio i kiden na jurön; a ŋutu liŋ ti jurön mo meddi ’duŋgö nio na putet logon nan ’du ’duŋökin lo, a se mo meddi könin lio logon nan a sopakin kase ki i riŋga na se lo.

²² Suluja i ŋinu diŋit tojo ko ŋerot, a kötumit na Yisaraele mo deŋdi adi nan logon a ŊUN lose.

²³ A jurön mo deŋdi adi kötumit na Yisaraele aje joŋa i to ’dupien kogwon toronjin kase, kogwon lepeŋat a dudumuja nan. Nyena a nan iŋge ’de ’ya komor nio ko lepeŋat, a ŋutukiŋdye lepeŋat i könisi ti merok kase, a lepeŋat liŋ totokoni kak ko baŋdujin.

²⁴ iŋkoi, nan a konakin lepeŋat gwoso nagon tolutan nase ko toronjin kase jujukin i riŋa na, a nan iŋge ’de ’ya komor nio ko lepeŋat.

ŊUN nyökuŋdyö ŋutu kanyit bot

²⁵ Nyenagon nan MATAT ŊUN lo kulya adi, Soŋinana nan de nyönyökun ŋutu ti Yakobo bot i to ’dupien, iŋkoi, nan wowon konyen ko kötumit na Yisaraele ’bukuluŋ; a nan mo yinöni kogwon karin kwe nake na rurwan.

²⁶ A i diŋit nagon se köti mo si ’dani ’bura kase i jur nu, a ŋutu mo gwe ’bayin lo tokujöŋdu se, a se mo böŋöni yu nase na kusik se ko dumesi liŋ nagon se köju a dudumuje nan kune.

²⁷ A i diŋit na momoruŋdye nan se kaŋo i jurön ti merok kase, i kiden na gweyajin ti ŋutu a joŋdi se mede nu, a nan mo kweji mugun a loke kogwon kulya kase a jurön jore memeddya.

²⁸ A lepeŋat mo deŋdi adi nan logon a MATAT ŊUN lose, kogwon nan köju a son lepeŋat i to ’dupien i kiden na jurön, a nan mo nyökuŋdye se bot i pirit na geleŋ kase i jur lomore. A nan mo tine pitökin lele lose bot kwöŋ i kiden na jurön.

²⁹ A nan köti kwöŋ mo tine ’de ’ya komor nio ko lepeŋat, kogwon nan a ’bukökiŋdyö mulökötyo lio i kötumit na Yisaraele. Kilo a kulyaesi kwe ti MATAT ŊUN.