Ejikele 38 - Bibilia Buk na Ŋun nagon koti luŋu a

Nebi Ejikele a kikiŋdyö Goga kulya narok

¹ A kulyaet lo MATAT poki köyö adi,

² Ŋuro lo ŋuto, komorgi Goga kasaranit lo Rosi, ko lo Meseke, ko lo Tubala yu i jur lo Mago-ga, ko keŋ kulya narok i kulya kanyit.

³ Kulyani adi, MATAT ŊUN lo kulya adi, Mete, do Goga kasaranit lo Rosi, ko lo Meseke, ko lo Tubala, nan a miriku ilot.

⁴ Nan mo lölöpuk do, a nan mo rekakiŋdye jabadalan konut i lukalaya; a nan mo pikuŋdye do kaŋo ko ŋutu kulök kamörök liŋ, ko kusanjin ko kajoŋak kase. Kilo ŋutu liŋ a jupu tito möriesi, lepeŋat jore parik morga ’bukwö na ’di ’dik se ko dumalak. Lepeŋat liŋ morga baŋdujin.

⁵ Ŋutu ti Parasa, ko ti Kusa, ko ti Put gwon ko ŋutu kulök i pirit na geleŋ; lepeŋat liŋ gwon ko ’bukwö ko tere-bukan logon a witiöt.

⁶ Köti ŋutu ti Gomer se ko teŋon kase liŋ, ko ti Bete-togarema se ko teŋon kase liŋ lo po i ’dutet na kak i swöt lo lobot kulo a mora ko ŋutu kulok—iŋkoi, kweja adi gweyajin jore parik ti ŋutu gwon ko do i pirit na geleŋ.

⁷ Do se ko tepon ti ŋutu liŋ logon a momora konut nyona kilo, gwe ta ajo ko möŋdi ta ajo, ko ti do gwe a duma lose.

⁸ A i mukök na perok jore a ta mo lupuni lupu i mörö; iŋkoi, a i kiŋajin ti ’dutet a ta mo lupöni i mörö ko jur logon a nyököki i gwolor nanyit na kokwe i mukök na mörö, kweja adi ŋilo a jur logon ŋutu kanyit aje po kaŋo i jurön jore a momorakiŋdye i merya ti Yisaraele logon yeŋon a rubajin ko diŋit a najo kulo. Kilo ŋutu köju a jwe kaŋo i jurön, lepeŋat liŋ soŋinana si ’dani ’bura ’bak kujönö;

⁹ a ta mo poŋdi ŋerot gwoso libibiu, a do se ko tepon kunök liŋ mo muŋge kak gwoso ’diko, kweja adi kilo a gweyajin jore parik ti ŋutu lo gwon ko do i pirit na geleŋ kilo.

¹⁰ Nan MATAT ŊUN lo kulya adi, A mo gwe sona i ŋilu lor a yeyeesi mo lupökine konut i töili, a do mo yeyeji koŋdya po naron.

¹¹ A do mo kulyani adi do mo tu i mörö ko jur logon turön kanyit a ko gömö ko goroma nagon a maripan, a do mo ’dorone i ŋutu logon ti mörö, logon si ’da kata ’bura ’bak kujönö kulo, kweja adi, kilo a ŋutu logon si ’da ’bak goroma nagon a maripan a gwe ’bak kötumitön ko rigilesi kulo.

¹² A do mo iti i ryaggu na toro ’bo a yekaddi se kaŋo, a do mo iti i mörö ko ŋutu logon si ’da i piritön nagon köju a rubajin ama soŋinana si ’darikin si ’darikin kune. Kweja adi do mörö ko ŋutu logon a momoruŋdya kaŋo i jurön, logon a ryeju toro ’bo ko tito, kilo a ŋutu logon si ’da i kiden na kak.

¹³ A ŋutu ti Seba, ko ti Dedan, se ko katu-gwörök lo gwon Tarasisa kulo, ko katujarak kase liŋ mo pipije do adi, Do po i ryaggu le? Do aje momoruŋdya tepon kunök i yekaddu na ryakat, ko i ’dokoddu na pödö ko dakap, ko i meyaddu na toro ’bo, ko i yekaddu na tito, kweja adi ta po i ryaggu na po jore, ’bayin sona le?

¹⁴ Nyenagon ŋuro lo ŋuto, keŋ keju, taki Goga adi, MATAT ŊUN lo kulya adi, I lor logon ŋutu kwe Yisaraele si ’dari ’bura ’bak kujönö lu, do mo deden, ’bayin sona le?

¹⁵ A do se ko gweyajin jore ti ŋutu lo gwon ko do i pirit na geleŋ kilo mo ŋiu kaŋo konut i pirit suluja i ’dutet na kak i swöt lo lobot, ta liŋ a teŋ duma parik na kamörök logon wökön ko kusanjin.

¹⁶ A ta mo ’diku i mörö ko ŋutu kwe Yisaraele gwoso ’diko na muggö kak. Kweja adi i perok lo popo a nan mo joŋdi ta i mörö ko jur lio, anyen jurön böpö deden nan i diŋit na tokitaji nan do Goga i kweja na kelan nio kase i komor nu.

¹⁷ Nan MATAT ŊUN lo pija adi, Do a nye logon nan köju a jambu i kulya kunök ko nebijin ti Yisaraele köliŋönök kwe i kutusen, logon a keju kipajin jore adi nan ködyö jojon do i mörö ko lepeŋat. ’Bayin sona le?

¹⁸ Nan MATAT ŋun lo kulya adi, I lor lo pöri do Goga i mörö ko jur lo Yisaraele nu, a woran nio mo yune yu.

¹⁹ A i yulön nio se ko i woran nio na pape a nan mo milyeji milyeju adi, ’Diri ’diri i ŋilu lor rigirigi mo gwon kata i jur lo Yisaraele.

²⁰ A somot ti tör, ko kwen ti ki, ko kijakwa ti mu ’diŋ, ko po liŋ lo gwöŋtu kak, se ko ŋutu liŋ lo gwon i kak ni kulo mo böŋdi böŋdu köyö i komor, a merya mo dukani kak, iŋkoi, a merya logon ko wilön mo ’do ’done ’do ’do, a goroma liŋ mo duyömökine kak adi yurum.

²¹ Nan MATAT ŊUN lo kulya adi, nan mo luŋgu tokujönöesi liŋ ka ’de ka ’de i mörö ko do Goga, a ŋutu kulök mo toreme ko ’börik.

²² A nan mo kitani ko twanti iŋgo se ko tatuja i ’dupökiŋdyö na do na putet; a nan mo to ’do-ji kuduöt dumalak logon ’do ’dokon, ko torok ti kudu, ko kimaŋ se ko pisek konut loki, ko i tepon kunök, ko i gweyajin jore ti ŋutu lo gwon ko do kulo.

²³ Nyena a nan mo kweji todumalan nio se ko kelan nio, a nan mo tiŋdi mugun i dena ko ŋutu jore i komor. A kirut lepeŋat mo deŋdi adi nan logon a MATAT.