Ejikele 37 - Bibilia Buk na Ŋun nagon koti luŋu a

Pirit na ’dir nagon a jore ko kuyu loteyok

¹ A riŋit na MATAT gwe köyö i mugun, a nye ’dokoddi nan kaŋo i riŋit na mulökötyo lonyit, a tiŋdi nan kak i kiden na pirit na ’dir nagon a jore ko kuyu.

² A lepeŋ nyömöddi nan i kuyu kiden, a nan meddi kuyu jore parik logon aje teteyon parik nyu i pirit na ’dir.

³ A lepeŋ pipije nan adi, Ŋuro lo ŋuto, kilo kuyu bubulö gwon jörun le? A nan waddi adi, Do a den pon MATAT ŊUN.

⁴ a lepeŋ köti takiŋdye nan adi, Keŋ keju, taki kilo kuyu adi, Ta kuyu loteyok, yiŋge ta kulyaet lo MATAT.

⁵ MATAT ŊUN lo kulya ko ta kuyu adi, Mete ta, nan mo titikin köbuŋöt i lupö kasu i mugunya anyen ta yuyukan a ta mo rune ru.

⁶ A nan mo to ’depakiŋdye ta murilö, a lokore na mugun mo juuŋdye juuŋdya kasu, a nan mo muŋge ŋina lokore ko ’böriköt, a tiŋdi köbuŋöt kasu i mugunya anyen ta yuyukan, a ta mo gwe jörun; a ta mo deŋdi adi nan logon a MATAT.

⁷ Nyena a nan suluje keju gwoso na saraki ’e nan nu; a na keŋ nan nu, a nan yiŋge kuyu i woŋon adi kayak kayak, a se liŋ geleŋ geleŋ totomorakiŋdye ’börik i pirit na geleŋ.

⁸ A na meddi nan nu, a nan meddi adi lepeŋat aje to ’de-paki murilö, a lokore na mugun iŋge juuŋdya kase, a ’böriköt muŋge ŋina lokore, ama yukan ’bayin kase.

⁹ A kirut lepeŋ takiŋdye nan adi, Do ŋuro lo ŋuto, keŋ keju i kulya ti köbuŋöt, taki lepeŋ adi, MATAT ŊUN lo kulya adi, Do köbuŋöt, wukuŋdye i swötön iŋwan ti kak, lupökine i kilo lo tatua anyen se köti gwon jörun.

¹⁰ Nyena a nan keŋ keju gwoso na sarakiŋdye lepeŋ nan nu, a yukan lupökine kase i mugunya, a lepeŋat gwe jörun, a gwo ’de gwo ’dan a teŋ na ŋutu jore parik.

¹¹ A kirut lepeŋ takiŋdye nan adi, Ŋuro lo ŋuto, kilo kuyu a kötumit ’bukuluŋ na Yisaraele. Mete, se kulya adi, Kuyu kaŋ gwe a loteyok, yenet nikaŋ aje ’baka; yi aje ’duŋöji kaŋo asut.

¹² Nyena kikiŋdye lepeŋat adi, MATAT ŊUN lo kulya adi, Ta ŋutu kwe, mete ta, nan mo ŋaŋa gulömö kasu, a mo toŋiuŋdye ta kaŋo kasu i gulömo, a nan mo nyomuŋdye ta mede i jur lo Yisaraele.

¹³ Ta ŋutu kwe, ta mo deden adi nan logon a MATAT i diŋit na ŋaji nan gulömö kasu a toŋiuŋdye ta kaŋo kasu i gulömö nu.

¹⁴ A nan mo tiŋdi mulökötyo lio kasu i mugunya, a ta mo gwe jörun, a nan mo tiŋdi ta i jur losu; a kirut ta mo deŋdi adi nan MATAT aje jambu kine kulya a nan mo kone kon se. Kilo a kulyaesi kwe ti MATAT.

Kötumit na Yuda ko na Yisaraele mo gwe a tumatyan geleŋ

¹⁵ A kulyaet lo MATAT poki köyö adi,

¹⁶ Ŋuro lo ŋuto, ’dumuŋdye ture ko wuŋe lepeŋ adi, Ŋilo ture a lo Yuda ko lo ŋutu ti Yisaraele logon mora ko lepeŋ kulo. Köti ’dumuŋdye lele ture ko wuŋe lepeŋ adi, Ŋilo ture a lo Yosepa ko a lo ŋutu ti kötumit liŋ na Yisaraele logon mora ko lepeŋ kulo. (Ŋilo ture Epuraima lo ’debba.)

¹⁷ Ti do tomorakiŋdye kilo turya i pirit na geleŋ anyen gwon a ture geleŋ konut i könin.

¹⁸ A nagon ŋutu kasu pija do anyen kwekiŋdya se ko ŋina ŋo kweja nyo nu,

¹⁹ taki lepeŋat adi, MATAT ŊUN lo kulya adi, Mete ta, nan ’du ’dumun ture logon a lo Yosepa ko a lo kötumitön ti Yisaraele logon mora ko lepeŋ kulo (ŋilo ture Epuraima lo ’debba), a nan tomorakiŋdye ture lo Yuda i lepeŋ, a kilo turya murek mo gwe a ture geleŋ köyö i könin.

²⁰ A turya lo wur do kulo mo gwe konut i könin anyen lepeŋat memet.

²¹ A kirut kulyani ko lepeŋat adi, MATAT ŊUN lo kulya adi, Mete ta, nan mo jojon ŋutu ti Yisaraele kaŋo i jurön logon lepeŋat aje tu kata kulu, a nan mo momoruŋdye lepeŋat i swötön liŋ, a nan mo nyökuŋdye lepeŋat i jur lose.

²² A nan mo koŋdi se a jur geleŋ i kak nase i merya ti Yisaraele, a lepeŋat liŋ mo gwe ko mor geleŋ; a lepeŋat köti mo tine gwon a jurön murek, kode kora a tumatyanjin murek.

²³ A lepeŋat köti kwöŋ mo tine toluddya ’börik ko nyö-muejin logon a ŋunyen kase, ko konesi kase na mamana, se ko lauŋdya nase na saresi kwe; a nan mo lwökuŋdye lepeŋat kaŋo i toronjin kase liŋ na kukuto-di se bot kune, a nan mo toke ’yi se; a se mo gwe a ŋutu kwe, a nan mo gwe a ŊUN lose.

²⁴ A köliŋönit lio Dawidi mo lo gwe a mor lose, a se liŋ mo gwe ko kayukunit geleŋ. A se mo kebbi jujuwesi kwe, a tirikuni ’debba saresi kwe lo wurö.

²⁵ A se mo gwolore i jur logon nan aje tikin köliŋönit lio Yakobo. (Ŋilo a jur logon merenyejin kasu si ’da kata lo.) A ŋutu ti Yisaraele ko ŋwajik kase se ko nyakwariat kase mo si ’dani nyu ŋupi ŋupi; a köliŋönit lio Dawidi mo gwe a kasaranit lose ŋupi.

²⁶ A nan mo teteŋdi tomoret na taliŋ ko lepeŋat, a ŋina tomoret mo yeŋe ko lepeŋat ŋupi, a nan mo tiŋdi lepeŋat i gwolor nyu a mo tuŋdije se, a nan mo tiŋdi pirit nio nake na rurwan kase kiden ŋupi.

²⁷ A pirit nio si ’daet mo gwe ko lepeŋat i pirit na geleŋ; a nan mo gwe a ŊUN lose a se mo gwe a ŋutu kwe.

²⁸ A jurön mo dene den adi nan MATAT a tiŋdu ŋutu ti Yisaraele i gwon a ŋutu kwe loke lomore, kogwon pirit nio nake na rurwan gwon kase kiden ŋupi.