Ejikele 36 - Bibilia Buk na Ŋun nagon koti luŋu a

Ŋutu ti Yisaraele mo nyönyokwe bot

¹ Nyena do ŋuro lo ŋuto, keŋ keju, taki merya ti Yisaraele adi, Ta merya ti Yisaraele, yiŋge ta kulyaet lo MATAT.

² Nan MATAT ŊUN lo kulya adi, Merok a kweni ko ta adi, Aha! piritön nagon a ko ’dulan na yeŋ nyin kune gwe a kaŋ.

³ Nyena keŋ keju adi, MATAT ŊUN lo kulya adi, Ta merya ti Yisaraele, ta aje ryaka i swötön liŋ, a iŋge kölöki kana ’bak ŋutu, anyen kulye jurön morga ta a kase, a kulya kasu ’dumani a jamiat ko a po na ’dö ’döyö.

⁴ Nyenagon ta merya ti Yisaraele, yiŋge ta kulyaesi kwe ti MATAT ŊUN, na kulyari nan ko merya, ko lurwat, ko karya, ko piritön na ’dir, ko piritön nagon a murwoki, ko köjinö nagon aje kölöki kana ’bak ŋutu ko a ryaka, nagon ŋutu ti kulye jurön lo didipö kulo ’dö ’dö se.

⁵ Nyenagon nan MATAT ŊUN lo kulya adi, I yulön nio na pape nan jambu po narok i kulya ti kulye jurön, kegga nan jambu i kulya ti Edom. Ŋutu ti Edom ’de ’dekan jur lio a lose, lepeŋat lyölyöpi ko töilyet liŋ jambu ’da ’daresi, anyen morga jur a ryaggi nye.

⁶ Nyena keŋ keju i kulya ti jur lo Yisaraele. Taki merya, ko lurwat, ko karya, se ko piritön na ’dir kune adi, MATAT ŊUN lo kulya adi, Mete ta, nan jambi i yulön nio na pape, kogwon ŋutu ti jurön a tomijö ta ko ’dö ’döyösi.

⁷ Nyenagon nan MATAT ŊUN lo kulya adi, Nan a milyeju adi, ’Diri ’diri jurön logon dipö ko ta kilo, lepeŋat ko ’börik mo tomiö ko ’dö ’dö-yosi.

⁸ Ama ta merya ti Yisaraele, kenia kasu mo wiwilan, a mo rade ludweki a ti ŋutu kwe Yisaraele, kogwon lepeŋat mo yiyito mede i diŋit a na ’dit.

⁹ Kogwon mete ta, nan juŋdyo ta, a nan mo löpuköddi kasu pini, a kak nasu mo kuruni kuru a weyani weya.

¹⁰ A nan mo tupöije ŋutu anyen si ’da kasu pini, kweja adi kilo a ŋutu ti kötumit na Yisaraele ’bukuluŋ. A köjinö mo si’darikin si ’darikin, a piritön nagon a rubajin kune mo nyököni ’dukö.

¹¹ A nan mo tuŋdije ŋutu ko kijakwa kasu pini, a se mo ŋdine ŋdi jore parik, a nan mo tiŋdi ta i si ’darikin gwoso i diŋit na ’beron köju nu, a nan mo konakiŋdye ta ’bura lwölwöŋ na köju nu, a kirut ta mo deŋdi adi nan logon a MATAT.

¹² Iŋkoi, a nan mo tiŋdi ŋutu i wörö kasu loki, kweja adi kilo a ŋutu kwe Yisaraele, a lepeŋat mo ’debbi ta a lomoriot kase, a ta mo köti tine toliki-ŋdyö ŋwajik kase kwöŋ.

¹³ Nan MATAT ŊUN lo kulya adi, ŋutu jambu adi do Yisaraele a jur logon tatuja ŋutu a tolikiŋdye ŋwajik lo gwon konut lukata kulo,

¹⁴ nyena a do mo köti tine tatuja ŋutu kwöŋ, a do mo köti tine tolikiŋdyö ŋwajik ti ŋutu kulök konut lukata kulo, ŋilo a nan MATAT Ŋun lo kulya.

¹⁵ A nan mo köti tine tin do i yiŋga na ŋutu ti jurön i ’da ’daŋu na do, a ŋutu mo köti tine tomijö do ko ’dö ’döyösi, a köti mo tine tiŋdu jur ilot i ’doro kwöŋ. Kilo a kulyaesi kwe ti MATAT ŊUN.

¹⁶ A kulyaet lo MATAT poki koyö adi,

¹⁷ Ŋuro lo ŋuto, i diŋit nagon koju ŋutu ti kötumit na Yisaraele gwolor kase i jur nu, lepeŋat a tolut jur lose ko kikolin ti gwiliŋisi kase ko konesi kase; gwiliŋisi kase köyo i komor meta gwoso ŋuto nagon lolokia.

¹⁸ Nyena a nan iŋge ’bukökin woran nio ko lepeŋat loki kogwon rima nagon se a ’buk i jur kune, koti kogwon nyömuejin logon a punyen logon se a toluddye jur kulo.

¹⁹ A nan iŋge torekin lepeŋat i kiden na gweyajin ti ŋutu, a lepeŋat iŋge gwo-gwölöki i jurön, a nan ’duŋökiŋdye lepeŋat putet kogwon kulya ti kikolin ti gwiliŋisi kase se ko konesi kase.

²⁰ Ama i diŋit nagon lepeŋat aje ’durökin i juron liŋ logon lepeŋat tu kata kulu nu, a lepeŋat koŋi karin kwe nake na rurwan, a ŋutu jambi kulya kase adi, Kulo a ŋutu ti MATAT, ama lepeŋat agu ködyo kökolökin jur lonyit.

²¹ Ama a nan delyani karin kwe nake na rurwan, nagon kötumit na Yisaraele aje kör kune i kiden na jurön logon lepeŋat tu kata kulu.

²² Nyena kulyani ko kötumit na Yisaraele adi, MATAT ŊUN lo kulya adi, Ta kötumit na Yisaraele, nan gwe nyona ko koŋdya na nene po; nan koŋdya ŋina po ti gwon i kulya kasu, ama nan koŋdya nye kogwon kulya ti karin kwe nake na rurwan nagon ta aje kör kune i kiden na jurön logon ta a tu kata kulu.

²³ A nan mo kwekiŋdye adi karin kwe nakukwön a nake na rurwan. Kine karin kwe a körö i kiden na jurön, kilo a ta lo köŋu kine karin i kiden na kilo juron. A i diŋit nagon nan mo kweji mugun a loke kogwon kulya kasu a ŋutu ti juron memeddya nu, a lepeŋat mo deŋdi adi nan logon a MATAT, ŋilo a nan MATAT ŊUN lo jambu.

²⁴ a nan mo joŋdi ta kaŋo i jurön, a pepenuŋdye ta kaŋo i jurön liŋ, a nyökuŋdye ta kasu i jur.

²⁵ A nan mo gwagwaddi ta ko pioŋ nake, a ta mo tokelani tokela i lut kasu liŋ, a nan mo toke ’yi ta i nyömuejin liŋ logon a punyen kasu kilo.

²⁶ A nan mo tiŋdi ta toilyet ludukö, a mo tiŋdi yeyeesi ludukö kasu i mugunya; a nan mo ’dumaddi kaŋo töilyet iŋgo gwoso ŋurupo kasu i mugunya a tiŋdi ta töilyet ti mugunya.

²⁷ a nan mo tiŋdi mulökötyo lio kasu i mugunya, a nan mo tiŋdi ta i wörö köyö i saresi lo wurö kulo, ko i tiriku i ’debba na jujuwesi kwe.

²⁸ A ta mo gwolore i jur logon nan aje tikin merenyejin kasu lu, a ta mo gwe a ŋutu kwe, a nan mo gwe a ŊUN losu.

²⁹ A nan mo lwökuŋdye ta kaŋo i konesi kasu liŋ nagon a lut kine, a nan mo saŋi ’bolot anyen radan jore, a nan mo tine jakiŋdya ta dyaŋ.

³⁰ a nan mo tiŋdi ludweki ti kaden se ko ŋo liŋ lo toran i meleseno i radan jore, anyen ŋutu ti jurön köti böŋö gwon ti ’dö ’doju ta kwöŋ i kulya ti magor.

³¹ A kirut ta mo yiyiuŋdye kikolin kasu lorok se ko konesi kasu nagon köju ’bayin a na ’but kune, a ta mo maŋdi ’börik kogwon kulya ti toronjin kasu se ko konesi kasu na mamana kune.

³² Nan MATAT ŊUN lo kulya adi, Ta kötumit na Yisaraele, dene ta den ’bura adi nan ti koŋdya kine kulya i kulya kasu. Gwe ta ko yu na kusik se ko delya kogwon kulya ti kikolin ti gwiliŋisi kasu.

³³ Nan MATAT ŊUN lo kulya adi, 1 lor logon nan mo toke ’yi ta i toronjin kasu liŋ nu, a nan mo tiŋdi köjinö i si ’darikin, a mo tiŋdi piritön nagon a rubajin kune i nyökö ’dukö.

³⁴ A kak nagon a kölöki a murwö na mo kuruni kuru, a ŋutu lo lwöŋöddi nyona kulo mo köti tine met nye a murwö.

³⁵ A ŋutu ti diŋit na popo mo kulyani adi, Na kak nagon köju gwon a murwö na aje wora gwoso melesen na Edene; a köjinö nagon köju a rubajin, ko kunie a murwöki, ko kunie a kökörötu kune soŋinana si ’darikin si ’darikin a gwe ko mariŋan nago.

³⁶ A kirut ŋutu ti jurön logon mo kölöki kasu nyona kulo mo deŋdi adi nan MATAT aje nyöggu ’duggö piritön nagon a kökörötu, ko aje nyöggu ’yuddu meleseno nagon a murwöki. Nan MATAT aje jambu kine kulya, a nan mo kone kon se.

³⁷ Nan MATAT ŊUN lo kulya adi, Nan mo köti rurukökin kötumit na Yisaraele i pija na nan i kitakiŋdya na lepeŋat. Iŋkoi, nan mo tutuŋdi ŋutu kase gwoso teŋ na yidin.

³⁸ Nyena a köjinö nagon köju a rubajin kune mo jorene jore ko teŋon ti ŋutu, gwoso teŋon ti yidin na gwon Yerusalema kune anyen wuki a rubaŋgajin i diŋitan ti roriot. A kirut lepeŋat mo deŋdi adi nan logon a MATAT.