Ejikele 35 - Bibilia Buk na Ŋun nagon koti luŋu a

Nebi Ejikele a kikiŋdyö ŋutu ti mere Seir kulya narok

¹ A kulyaet lo MATAT poki köyö adi,

² ŋuro lo ŋuto, komorgi mere Seir, keŋ kulya narok i kulya ti ŋutu kanyit;

³ taki lepeŋat adi, MATAT ŊUN lo kulya adi, Ta ŋutu ti mere Seir, mete ta, nan a miriku losu, a nan mo riöddi könin lio kaŋo i mörö ko ta, a nan mo koŋdi jur losu a murwö ko a ruba.

⁴ A nan mo koŋdi köjinö kasu a rubajin, a jur losu mo konani a murwö; a ta mo deŋdi adi nan logon a MATAT.

⁵ Ta aje wowoja tomirikulan na yeyeŋon, a na gwoŋdi se i diŋit nagusu nu, kweja adi i diŋit na riparikin se i ’dutet nu, a ta iŋge pakiŋdya ŋutu ti Yisaraele i tatua ko baŋdujin;

⁶ nyenagon nan MATAT ŊUN lo kulya adi, ’Diri ’diri gwoso na gwoŋdi nan na, nan mo tetenakin ta i tatua, a rima na ’buköro ta kune mo kepoddi ta, iŋkoi, ta a ’buköddu rima, nyena a rima mo kepoddi ta.

⁷ A nan mo koŋdi mere Seir a ruba ko a murwö. a nan mo tu ’baka ’yi kata ŋo liŋ lo popo ko lo tutu.

⁸ A nan mo töjoreji merya kasu ko ŋutu kasu lo tatua, iŋkoi, a ŋutu logon tatua ko baŋdujin kulo mo ’do ’done i lurwat, ko i piritön na ’dir, ko i luruki liŋ ti jur losu.

⁹ A nan mo koŋdi jur losu a murwö ŋupi, a köjinö kasu mo tine si ’darikin. A kirut ta mo deŋdi adi nan logon a MATAT.

¹⁰ Ta kulya adi, kulu gweyajin murek ti ŋutu, kweja adi kulu jurön murek mo gwon a kasu, a ta mo morgi se a lomo-riot kasu, ma ’di ködyö nan MATAT gwon nyu.

¹¹ Nyenagon nan MATAT ŊUN lo kulya adi, ’Diri ’diri gwoso na gwoŋdi nan na, nan mo roropakin ta woran nasu ko be ’ya nasu nagon ta aje kwekiŋdya adi ta a maŋdu lepeŋat; a nan mo tiŋdi mugun i dena kasu kiden i diŋit na ’duŋökiŋdye nan ta putet nu.

¹² A ta mo deŋdi adi nan MATAT aje yiŋ ’dö ’döju nasu nagon ta ’dö ’döji merya ti Yisaraele adi, Lepeŋat aje kölöki kana ’bak ŋutu, lepeŋat aje tiki yi i ryakaddu a kaŋ.

¹³ Ta aje bu ’ya ’börik i lauŋdya na nan, a ta jambi kulya naŋon jore i kulya kwe, nan ko mugun nio aje yiŋ ta.

¹⁴ Nan MATAT ŊUN lo kulya adi, Nan mo kökon jur losu a murwö, anyen kak ’bukuluŋ lyölyöpon ko ta.

¹⁵ Nyena nan mo kokonakin jur losu gwoso na lyöŋgi ta ko jur lomore lo kötumit na Yisaraele kogwon nye a kona a murwö. Do mere Seir, iŋkoi, do jur lo Edom liŋ mo gwon a murwöki kweja adi i swötön kulök liŋ. A kirut ŋutu mo deŋdi adi nan logon a MATAT.